Pentecost ni ah Pathian nih holh phun tampi a rak hman. Pathian nih miphun kip i cawh in amah thangtthat hi a duh timi a lang. Khrihfa upa, nu upa, mino upa le pastor te nih zeitindah nan ruah ve?
A luancia kum thong hnih hrawng ah Jesus zultu hna cu an i pum lio ah lei bantuk meizik cu an lu cung ah aa rak fu. Hruaitu hna cung lawng ah a rak i fu lo, cuka i aa pummi vialte cung ah a rak i fu. Thiang Thlarau in an rak khat i cu Thiang Thlarau nih chim khawhnak a pekmi hna holh cio in bia an rak chim.
Zeiruangahdah Pathian nih Holh phun khat lawng a rak hman ko lo? Pathian caah a thiangmi Holh phun khat lawng a um ding a si hnga lo maw? Koran hna khi Muslim pawl nih Arabic lawng in an ngei i a dang an lehmi cu "A tling lomi Koran" an ti. Bible zong nihin ah Laimi nih kan lehmi Original he a biafang aa khat lomi a tampi. Cu tikah Bible biacah / biaphuan hna kan fian ning le cohlan nih aa dang tuk kho.
Sihmanhsehlaw, Pathian nih Pentecost ni ah holh a phun phun in a rak holhter hna. Pathian nih miphun vialte hi a thimmi an si. Hlanpi in Holh a rak danter hna timi cu Babel lungrual in a lang cang. Pentecost lio i aa pummi hna a tamdeuh cu Juda/Israel phun an si khualtlawng le mi chawkhlet holh phun dang a hmangtu hna nih an theih khawh nakding caah cu hna miphun dang holh cun a rak holh ter hna.
Holh i dannak, miphun i dannak nih Pathian thangtthatnak a donh hna lo, timi fiang tein kan hmuh. Pathian nih a duhmi a si ti fiang tein a lang.
Sihmanhsehlaw, nihin Laimi miphun khat a simi hna nih zeiruangahdah hmun khat te ah Pathian kan thangtthat tti khawh lo? Zophei, Mara, Falam, Hakha le Thantlang, cung chakthlang Lairam vialte nih kan aw-cawi i khah lo ruang le kan holh tlawmte aa dan ruangah Khrihfabu pakhat ah kan um tti kho lo. Kan biak kan timi Pathian cu aa khat fawn ttung.
Holh theih lo, Laam le khui cu kan uar ngai. Thlarau laksawng kan ti. Asinain zeiruangahdah Falam nih Hakha holh ruangah bu a chuah? Zophei nih zeiruangahdah a chuah? Mah hihi ttha tein ruat hna usih. Miphun dang kan si, an si ttung lo.
#Lamkaltu 2 a zate in rel tikah fiang tein a langmi cu Holh dang cio in an holh a timi kha cu ahohmanh nih theih lomi a chimtu zong nih theih lomi holh a ti duhnak a si lo. An chimmi holh kha a lengmi nih anmah holh cio in an rak theih ko. Holh i dannak hi tthennak ah Pathian nih a duhmi a si lo, Vanram bantuk hmelchunnak a si. Cu holh phun aa khat lomi hna hmun khat i Pathian kan thangtthat ttinak ah amah lila zong aa tel ve. "Ka min in pahnih nan i khawmhnak ah a pathumnak ka si lai." tiah Jesus nih a timi kha a si.
Laimi chung ah Holh phun i khah lo zong hi thluachuah a si. Democracy idea zong a si. Kan i lawhnak, i khahnak a simi Jesus ah hmunkhat te ttan tti le dir tti khawhnak a si. Miphun aa khatmi holh i dan ruang te in Pathian kan thangthat tti khawh ti lo a si ahcun Jesus kan zumhnak ah khuaruah awk ngai a si lai. Jesus Khrih Tehte ttha zong kan si kan ti ngam lai maw? Miphun dang a simi Mirang, Kawl, Tuluk, Muslim le Norway mi hna nih zeitindah an kan hmuh lai? Khrih muisam kan keng maw?
Pentecost ni i Biakinn na phak tikah mah hi ruat. Pathian ah pakhat sinak cu zeidah a si? Zeidah aa khat in kan tincomi a si? Ziah hmunkhat ah Pathian thangtthnak "Fellowship" kan ngeih khawh lo?
Aa khatmi Pathian, Thiang Thlarau le Fapa Jesus kan thangtthat tti ko ttung ah cun hmunkhat te ah Pathian kan thangtthat tti khawh lo ding, bu kan i fonh khawh lo ding a sullam a um lo. Holh theih lo an lo tlau lai, ruahchannak a tlau lai. A si nain Dawtnak cu a hmun zungzal lai.
________
Foto: John the Baptist Artworks
Comments
Post a Comment