Neymar: Keimah Nakin A Thinphang Mi An Um Lo

Russia i World Cup chuih ding thla khat aa duh ah Brasil captain Neymar cu training a hun tuah kho tthan. Kan hnu kum thar thawk i a rak i khawnmi ruangah World Cup chuih khawh lo ding hi a rak ttih tuk kong i sum lo in a chim.

– Keimah tluk in hohmanh nih an ttih lai lo. Ka chuih khawh lo ding an phang ngai nain keimah tluk cu an si lai lo. Brasil aiawh in ka chuih khawh lo ding hi ruah ah  Keimah nakin a lungre theimi an um lai lo ee, tiah Neymar nih Globo TV interview ah a chim.

Neymar hi thinphan mawh lo a si.

Kum 26 a si cangmi Brasil le PSG hmaikal Neymar hi February a rak i khawnmi ruangah World Cup chuih ding a dawnh te lai tiah an rak ruahmi a si. Asinain May 17. khan PSG he training a tuah kho tthan, nain thaizing i Caen he an chuih dingmi France Cup final ah a chuih kho lai lo. - Mah tluk aa khawn a saumi cu Ligue 1. Player of the Year an pek.

Barcelona in PSG aa tthial ahhin leicung bawlung chuih thiambik si a duh caah si ko tiin sawisel a rak tong. Atu zong Real Madrid ah tthial a duh ti a si i an mawhchiat ngaingai. Vawleicung a thiambik si khawh nakding asiloah a thiambik minthatnak hmuh khawh nakding caah World Cup hi a tei a herhmi biapi ngaingai a si caah ttha tein chuih khawh lai lo ding hi a ruah ah a celh lomi a si.

Neymar hi Mi Ttha Lo Te Cu A Rak Si Ko Rua

– World Cup ka tanh lai lo ti hi ka rak phang tuk. Operation an ka tuahmi kong an ka chimh i zeicandah i dinh hauh lai ti an ka chimh hnu in tampi ka lung a hung tthawng tthan, tiah Neymar a chim tiah Reuters nih a ttial. Atu cu Training zong a tuah cang i bawlung chanh le tlaih te hna ttha tein a cawng cuahmah. Ka sia a rem ngai cang tiah a chim.

Brasil kan cawisan tthan lai.

Mah tluk a ttih le a phan hi a rak mawh lo, a rian hi thil hmete a si lo. An ram Brasil hi World Cup ah cawisan tthan le teinak i tlunpi ding hi a liang ah khinh a si. Asinain avoi khatnak World Cup a chuih 2014, Brasil World Cup ah mitthli a rak luang. Colombia he Quater final an chuih ah a keng an khawn i an rak chuahpi caah Semifinal cu Germany nih 1-7 an tei hna lio a rak zoh.

Caan nih a liampi dih kho lo. Cucaah tutan Russia World Cup ah Brasil aiawh a chuihtu hna an lian cung a ummi rian hi thil fate a si lo. A hlei in Brasil cu World Cup voi nga a tei i a tambik a si caah an i zuam taktak a herh.

– Rammi le ttanhtu hna nih an i ruahchanmi a sang tuk. Anmah lawng si lo in keimah ca hrim ah a biapi tukmi a si, tiah Neymar nih a chim.

Brasil group ah Switzerland, Costa Rica le Serbia an si. Tutan World Cup an tei ahcun avoi ruknak a si lai i Neymar mi a lian taktak ve cang lai.