Fake News Cu Zeidah Si? Ralrin A Herh Maw?

fakenews he pehtlai in ttamhmi a si. Ref: Pinimg.com, psychcentral.com snopes.com

Fake News timi cu thawngpang deu, pumpak/party propaganda, khuaruahhar thil, lih, Conspiration asiloah ttawn le phuahchommi thil kong pakhat khat kha information a dik loning in mi sin phakter kha a si. A hleiin politics ah an hman hna. Cu bantuk ca le thawngpang pawl cu a hman i a si takmi thawngpang an lawh caah na relmi zei a si ti na hngalh lo ahcun an in hlen khawh lai. Na thluak an in ttawl khawh lai.

Cu a si caah hi cabia hi ka ttial. Fawite in Facebook le Blogg/website i Laimi ca kan ttialmi tlawmte nih a kan hlen khawh lo ding hi a biapi tuk.

2016 dihlei 2017 kum thawk Fake News biafang hi biatak tein Social Media le mibu lakah hmunhma a lami a si. Asinain mah hi thil thar a si lo, hlan zong ah a rak um ko cang. Aruang pakhat cu American President thim lio ah hmanbikmi ah aa tel. USA Election kong cabia hna lakah ah Pope nih Trump zeitluk in a uar timi hna aa tel. Mah cu FakeNews-Site kan si aa timi nih an rak ttialmi a si. Thawngpang pakhat a hong um tikah Hillary Clinton min hna kha biatlangpi (title) an hman huar i cu an hmuh tikah an rel duh colh, i Social Media ah an zamh colh. Mah hi USA lawng ah a cangmi a si lo, nihin Laimi kan caan vialte a kan chuttu Facebook i Laiholh relmi thawngpang lettu pawl sin ah a tamtuk.

Click:> Blog Chung Theihtlei-cabia rel khawhnak

Kan hnu i Facebook chung ah "CNF an i tthen" timi thawngpang a chuah lio ah ur! tiah kan zuan hnawh. CNF kong a theitu hna siseh, tulio CNF cawlcanghnak a zuldawimi nih cun a si khawh lonak kha nan hngalh ko lai. Ahnu ah biafiang kan theih tthan. Facebook i Laiholh thawngpang an tar tikah a chung cabia he aa pehtlai lomi mit-hlang hmanthlak, asiloah ttihnung hmanthlak tibantuk a tam. An biatlang tar in an Website kau hlan ah hi cu a dik lomi Fake News ti khawhmi an tam tuk. Fake News cu cattialtu zong nih i theih lo in holh dang in Laiholh ah kan leh khawh, i kan ttamhmoih zong khi FakeNews a si kho ko.

Cuti a si ahcun zeitindah Fake News cu kan theih khawh lai? A tangah hin Fake News theih khawhnak ding tlawmpal rel khawh a si.

Min-deun cattialtu: Ziah a min a hman duh lo? News Website ser in Nu min hna hman, nu min hna in Facebook ah post tibantuk. An ttialmi a dik le a si tak ko ahcun ziah cattialtu min an ttial ngam lo?
Chirhchan (Ref.) ngeih lo: An ttialmi cabia/thawngpang chung ah Link (website a si cun) telh lo, Chirhchanh an laknak ttial lo ahcun an ttawnchom si khawh a si.
Chirhchan Sources/References le cattialmi pehtlaihnak a ngei lomi, asiloah cabia pakhat hna Reference ttha a ngei lomi cu cattialtu aa biatak lomi a si, i Fake khawh a si.
Cattial palh tuk asiloah ca/biafang palh tamtuk te hna hi Fake News an si a langhnak pakhat ah aa tel.


A hleiin Laiholh ttialmi thawngpang le ca a reltu nih kan zoh ding cu Cattialtu hodah a si, Laica asiloah Mirangca a thiam maw? tibantuk zoh a herh ngai. Nan relbikmi Website pawl ttha tein zoh hna u, Laica ttial le Mirang bia an hman tawnmi hmanh ttha tein an ttial khawh lo cun an Deu caah a si kho, an i biatak lo caah a si kho, i biatak lo cu Laimi kan rawhnak a si. Journalist an um rih lo i Thawngca an leh tikah holh a thiam lomi an ca rel a har, i a fiangmi cu an i fianning in an leh ti hi a si. Cucu ttih a nung takmi a si. Thawngpang ttial le leh hna hi cheukhat nih cun Laimi dawt, Laica dawt le thiamhlei ngai ah i ruah khawh a fawite. Asinain thawngpang dik lo, Laimi he aa pehtlai lo i tthathnemnak a ngei lomi le kan caah Irrelevant Information te hna tamtuk Laimi sin phak ter cu vaivuanh phunkhat a si.

Fake News cu a karh fawituk. Asinain pumpak pakhat cio nih meilam kan phiah piak i kan kham khawhmi a si.

Pakhatnak ah Fake News ti na theih ahcun zamh(Share) hlah. Na rel si cun Internet (Google) hmang in a dikmi si le si lo thukdeuh in zoh (biapi ah na chiahmi kong a si ahcun). Fake News si ti na theih ahcun cu he pehtlai in a dikmi thawngpang/cabia khan Comment ah ttial piak. A ttialtu asiloah an ttialnak Website kha zoh law Fake News (phaisa duh men in tuahmi) an si kha theih a si lai.

Conspiration Teory timi minung pakhat a si loah party, miphun le thil kong kha a si kho ti phun in an ttialmi, a fawinak cun kongceih tibantuk pawl kan iralrin a hau. Cu pawl cu Fact ngei tein an ttial tawn hna, a rel an nuam sawk lai, i cabia pipa a si lai. Nain ttha tein na zoh a si ahcun "a si khomi" lawng an rak si. Cucu kan caan a eitu an rak si.

Hi ca ka ttialnak a ruang cu Fake News hi ttih a nung tukmi a si caah a si. Zeitluk in ttih a nun timi hi a theimi an tam lo. Hi cabia lawng siloin mi dang nih tamdeuh le fiangdeuh in ttial i kan mipi theihter (information pek) a herh. Laiholh relnak Website tamtak tak. Chin11news, thechintimes, vakoknews, chinexpress, Senrinews le atu ka tialminak tamdeuh a taang rih, a tam meisei. Mah vialte kan ti hnawh hna mi a si lo.

Chirhchanh (Ref.):
The Telegraph: What is fake news? Its origins and how it grew in 2016
Minerva: 13 Difinasjoner på Falske Nyheter
The Guardian: What is fake news? How to spot it and what you can do to stop it
Wikipedia: Fake News