Tu chan mino pawl hi a vaivuan taktak mi an si tiah ruah an si i mawhphurh ngaingai mi an si. Chan chia a si caah maw a si tiah biahalnak a um i chanchia a si nemmam cu hi tluk chan ttha i a chuak le a nungmi mino pei an si cu ti a si. An vaivuan tuk tiah an ruahnak cu tthit-umnak an upat ti lo, Technology chan i an chuah caah kha hlan thil zeihmanh an i chinchiah kho lo i zeipaoh hi a fawituk in an ruah, thil a tthadeuh timi an kawl tuk i ram le miphun khuasak-tintuknak a hmun kho lo ti a si.
Mino tampi nih cun Nokia, Siemen, Sony Ericson tibantuk le Digital i a kal lomi thilri pawl an hngal ti lai lo. Nihin social media channel pawl hlan i Bebo, Space tibantuk le Gtalk, Vivo zeidah um ti? an thei ti lo. Aruang cu zeihmanh nih an lung a tlai kho lo. Bebo le Space, gtalk tibantuk an chuah tak i an thi ko. Ready-made a simi rawl fawite in an ei tuk cang. Fawite in zeipaoh hmuh khawhmi chan ah an chuak.
Na zumh zong zumh lo zong ah chanthar mino hna nih Social Media Platform pawl hi an thah tthan te ko lai. Facebook zong nihin ah hmangtu tambik a ngei nain a rau lai lo, zorlei a panh ko lai. Atu hmanh ah DeleteFacebook timi a hung lar tuk i Facebook hmangtu an hun zor ngaingai.
Mino nih Social Media an uar tuk ti al awk ttha lo. Pew Research Center nih 2018 i hlatnak an tuahmi ah kum 18-29 mino nih 88% le 30-49 kar nih 78% cu Social Media Platform pakhat tel an hmang dih ti a si. Kum 65 cung social media a hmangtu hi 37% lawng an si i mino nih an hman cemmi cu Facebook a si ti an hmuh.
Pew nih hlatnak a tuahmi ah Facebook cu mino nih an uar cemmi Social media platform a si i 81% nih an hman. Kum 65 minung pawl nakin a let hnih in a tam. Cutin a si buah Youtube hi mino nih an uardeuh rih ti langhnak cu 73% American nih an hman i 91% cu mino an si ti a si.
Instagram, Snapchat, le Twitter zong mino hna lakah a lar ngai ve. Asinain Pew nih Facebook an phan deng lo ti a hmuh. Instagram nakin Snapchat hi an hmandeuh i Twitter cu mino nih an hmang tuk lo tiah a hmuh. Hi hlathlainak kan zoh a si ahcun Facebook le a dang Social Media pawl hi zeitindah an thih lai, an zor khawh lai ti ruah awk ngai a si. A si kho lomi a um lo, ti ah ol-zang ngai in chim u sihlaw, Facebook hi mi tamdeuh nih thimmi a si nain zei thil hmanh hi zungzal in a hmun lo!
Tu chan mino cu Privacy a upatmi, asiloah aa khar khumh tukmi kan si tiah an hmuh. Cucaah 2018 thawk i Facebook thawngpang chia ruangah DeleteFacebook timi a hun larnak cu a si. Kan rak ttial cangmi Cambridge Analytica nih Facebook account 50 million leng cu a fir i politics celhnak ah a zuar. 2016 American president thimnak ah Russia aa telnak pakhat a si. Mino hna nih Social Media company pawl hi kan zumh hna, an data kan zumh caah an platform kan hmanmi a si. Cucaah atu bantuk i zumh tlak lo in an um a si ahcun Social media hmangtu a tamdeuh a simi mino nih chuahtak dih khawh a si i a thi ko lai. Bebo le Space, Gtalk ti bantuk khan.
Facebook sertu Mark Zuckerberg caah Cambridge Analytica (CA) thawng cu thawng chia a si. Kan palh ko tiah a chim. CA nih million 50 leng facebook account an lak hi an rak theih ko. Nain Trump a ttanh caah maw a si a rak holh lo. Kan tuah ti lai lo, tthadeuh in kan in runven hna lai a ti i cu tluk an thawngpang chia nain cu thawngpang ruang ah cu Facebook phaisa luhning cu a kai chinchin.
Minung pahra ah paruk nih Social Media chuahtak hi a har lo tiah an chim. Mino kum 25 in 29 kar chung in 60% nih cun olte in chuah khawh a si ko, an ti. Cuti a si ahcun mah hna pawl hi chuak hna seh law social media cu a thi kho ko hnga tinak a si. Privacy kan runven ruang ah Iphone hi mino nih kan duhdeuh tiah cun kan palh tuk lai lo, Mino nih Iphone an cawk deuh ruang ah Brand dang pawl cu thideng in an i zuam lengmang. Mino ruang ah an company a thi kho.
Facebook chuah tak i hman ti lo a tthatnak a ruang hi tampi a um lai. Pakhatnak ah Facebook i na min, na data kha mirum le politician hna nih anmah caah duh tawk in an hmanmi hi a si hnga, nain cu lawng cu a ruang si lo. Facebook na hman caah an company nih internet chung i na zohmi Website vialte an in dawi khawh, Private ngaiin ca na kuatmi vialte private a si lo, an rak hmuh dih i an saved lengmang. A dang pakhat cu Facebook hmangtu 2billion hrawng nih hin a buak-tlak in nikhat ah suimilam pakhat hi Facebook ah caan kan hman. Suimilam pakhat hi nikhat ah 24 lawng na ngeih caah zeitindah na ruah?
For Your Information Only!!!
 |
| FAKE NEWS Timi Careltu caah a ttha lomi Thawngpang Deu Le Hrawkhrol Milemnak Ca Cu Zeidah a si? |
Comments
Post a Comment