Vawleicung mirum cem ah aa chuah zau lai tiah zumhmi Facebook ngeitu Mark Zuckerberg cu European Union (EU) Parliament nih biahalnak le Facebook hmangtu hna runven ning halnak an ngeih.
Bia fakfak in an ti, bia phunphun an hal i amah pumpak cung tiang biahalnak an tuah.
Na rel cang maw?: Facebook Phung Thar
- Kan hnu kum khat-hnih chung ah khan kan i relh lo in Facebook hmangtu hna Data a la khotu thilri/system pawl khamnak ttha tein kan rak tuah kho lo, i cu bantuk thil nih cun mi tampi caah rawhnak, le tthat lonak a chuahpi. Fake News siseh ram pakhat cozah thimnak ah ram dangmi tak i thlaak te hna hi a chuahpi lawng si lo in mi Data/kong kha duhsalam (abuse) in an hman, tiah Mark nih an hmai khap lo ngai in a chimh hna.
- Kan rian kaupi in kan rak ttuan lo. A palh ngaimi a si, i ka lung a ttha lo tuk ve tiah a bia a peh.
Mark Zuckerberg hi EU-parliament nih Brussel, Belgium ah an kawh i bia an hal cu a si. Facebook hmangtu million 50 an Data cu Cambridge Analytica (CA) nih a rak fir i Trump president aa cuhmi bawmhnak ding caah an hman. Mark cu Jew miphun a si i Trump hi a rak ttanh vemi a si.
EU biahalnak cu innka khar khumh ding an rak ti nain Marck lungtlinnak a um caah TV in an thlah (a tang youtube in a um.). Mah bantuk hin tuhnu ah mi dang Data kha Democracy ram ah duhpaoh in hman ti lo ding hi amah zong nih a duh kong a chim.
- CA app bantuk a simi a dang App 200 hrawng zong kan zumh hna lo caah Facebook in kan dawi cang hna i min-deu le app kan zumh lomi cu kan hloh lengmang hna lai tiah a chim chih.
EU-parliament hruaitu chungtel Guy Verhofstadt nih tihin bia a hal:
- Zeitindah Vawlei mi nih hin hun ka chinchiah te hna seh ti na duh? Steve Job le Bill Gates te hna bantuk in Vawlei le kan zatlang ah tthathnemnak a chuahpitu tiah maw tuanbia ttial na duh? Asiloah, mi thluak ttha le mifim a si ko nain Democracy le kan zatlangnun a hrawktu Digital-monster tiah tuanbia tialmi dek na duh?
Hi Blog chung FACEBOOK Thawngpang vialte rel khawhnak.
I'm sorry!
Comments
Post a Comment