Champions League final cu zarhteni ah an chuih cang lai i Liverpool le Real Madrid ahhin pakhatnak a hmu ding a fiang ko tiah manager hlun Vicente del Bosque nih a chim.
Vicente cu Spain coach a rak ttuan i World Cup 2010 le Europe Cup 2012 a rak teipi hna. Atu cu aa din cang. Cu lawng si lo, Real Madrid manager a rak ttuan lio ah Champions League voi hnih a rak teipi fawn hna.
Tutan final i Liverpool he an iton cu Real Madrid caah a fawitukmi Final a si lai tiah a ruah. Atu i Real Madrid player pawl khi thlen sian lo ding tluk in an ttha tiah a chim i Mohamed Salah hmanh hi atu Real Madrid team ning tuak ah Real Madrid i a chuih ding ah aa tlak rih lo tiah a chim.
– Real Madrid cu an ttha tuk. Tulio te ah cun Europe ah a tthabik club an si rih i zarhteni hin a lang rih lai. Real Madrid a tthatter deuh kho ding player ka hmu rih hna lo, Salah zong nih a tthatther deuh kho hna lai lo, tiah Vicente nih AS ah a chim.
A bia a peh i Real Madrid nih 4-1 in an tei lai, tiah a zumhnak fek te in a chim.
Sergio Ramos nih Salah, Firminho le Mane hi kan ttih hna lo tiah a chim ve. Hi hna pathum hi an ttang rual ngai i goal an sutmi a tam ko. Club minthang back pawl an pah khawh lengmang ko hna. Asinain Ramos cu redi a si.
- Liverpool hi Final an kai lonak a sau tuk i kanmah hi an kan zumhdeuh ko tiah Ramos nih a chim. Anmah nak zong in kan thiam deuh i thinlung zong in kan tthawng deuh caah a biapimi tei a herhnak ah kan tthadeuh ko lai, tiah a chim.
La Liga ah Barcelona nih 17 points in an tei hna i pathumnak lawng an si. Cup zong an tei lo. Champions League lawng hi an tei ding a taangmi a si.
- Zeitindah kanmah nakin Liverpool nih Champions League hi tei an duhdeuh nan ti khawh? Kan nih cu avoi thumnak a peh in final a kaimi kan si i voi thum peh tei khawhnak a lam um caah zakhat ah zahnih in hi tei hi kan duh, tiah Real Madrid manager Zidane nih Mirror ah a chim ve.
Foto: 24sata.info
Comments
Post a Comment