Arsenal FC manager Arsene Wenger nih nihin i bawlungchuih thiambik Lionel Messi hi Cesc Fabregas he cawk tti kan rak timh hna nain Messi caah Barcelona nih pek an duhmi kha Arsenal nih kan rak pek khawh lo caah Fabregas lawng hi kan rak cawk tiah a chim bal.
Messi caah Barcelona nih zeidah an tuah piak khawh hleimi a si?
Lionel Messi cu aa chuahpimi zawtnak ruangah a tthang kho lomi a rak si. A tthan cem ah 150 centimeters lawng a sang lai tiah a siibawi pa nih a rak chim. Asinain a lam phunphun a rak kawl piak i nihin ah cun Messi cu a rak uar tukmi Diego Maradona nakin a tung sang deuh cang.
- A niam tuk mi a rak si hnga. Atu nakin 20 cm hrawng cu a niamdeuh ding a rak si tiah Argentina siibawi Diego Schwarzstein nih Messi kong he pehtlai in a tongtu TV2 Journalist pahnih cu a rak chimh hna. Schwarzstein nih Messi kum kua a si in a thlawp.
- Lionel Messi cu bawlung a chuih lengmang i a tthan khawh lo caah a lungre a rak thei tuk. A tung niammi ruang ah minthang bawlungchuih thiam ka si kho lai lo ti a rak ruat, tiah a siibawi pa nih cun a chim.
A siibawi pa Schwarzstein nih a tung san khawh nakding thlawp a thawk i a paw le a tai ah sii a chunh, a ban zong ah a chunh hna. Ni khat voi khat in a chunh i a sang deuh lai ti ruahchannak an rak ngei. Sihmanhsehlaw, a sii man a rak tam tuk. Argentina i mi damlo bawmhnak nih an bawm kho ti hna lo i Cozah bawmhnak cu an hmu ti lo.
Relchih: Messi Kong Tialmi Pawl
 |
| Messi a rak thlawk hmasatu Schwarzstein |
Mah lio te ah cun Barcelona nih pahrang a ngeimi Messi cu an rak hmuh. An club i ngakchia sin a chuih ding ah an rak hal hna. Cu lawng silo in a tung san khawh nakding sii man vialte kan liam dih lai ti zong an rak kamh hna. Cucaah kum 13 a rak simi Messi te chung cu Spain ah an rak kal.
- Spain i an i tthial hnu zong ah pehtlaihnak kan ngei peng. Barcelona hi ka uar ngaimi khua a si caah ka va tlawng tawn hna, Email zong in ca kan i kua lengmang i amah zong Argentina a phak ah cun a ka leng tawn tiah a siibawi pa nih cun a chim.
Argentina bawlung tuanbia ah tung-niam hi khuaruahhar awk a rak si lo. Leicung minthang Diego Maradona cu 167 cm lawng a sang. Messi hi a niam kan ti nain Maradona nakin a sang deuh.
- Thlawp kan i thawk ahhin "Na tha chia hlah seh, Maradona nakin na sang deuh te lai. Amah nakin bawlung chuih thiamdeuh na si lai ti cu ka chim kho lo nain amah nakin na sang deuh te lai." tiah ka rak chimh ee tiah siibawi pa Schwarzstein nih a chim.
A sang deuh taktak ko. Lionel Messi cu 169cm a si i Maradona nain 2cm a sang deuh.
- A luancia kum zeimaw ah khan kan rak i tong i "Lio, ka chimmi kha na theih ti maw, Maradona nakin na sang deuh lai kan ti lo maw? A tangmi cu: Amah nakin na thiamdeuh maw?" ka rak ti i a ka let lo tiah a nih pah in siibawi pa nih cun a chim.
TV2 journalists nih "Rak thlawp hlah u law atu bantuk bawlungchuih thiam hi a si hnga maw?" tiah siibawi pa cu an hal.
- Ka hngal lo, a thiam lo deuh kho ko. Zei si hmanh ah mah pate hi ka nun chung i ka hmuhmi hna lakah pahrang a ngeibik a si caah a thiam deuh kho ko. Hodah hngal hnga?
Lionel Messi cu kum 13 a si in Spain ah a um cang nain a ram Argentina caah lung dong lo in nihin tiang Bawlung a chuih i tu kum World Cup zong ah Maradona bantuk in teinak a hmutu si ding aa zuam tthan lai.
 |
| Argentina Nih World Cup 2018 A Tei Khawh Nakding |
Note: TV2 an ttialmi careltu caah a fiannak in lehmi a si.
Comments
Post a Comment