USA president Donald Trump nih Israel mi tamdeuh lung a lawmhter khawh ngaingai. Aruang cu kan hnu December ah khan USA Embassy cu Tel Aviv in Jerusalem ah kan ṭhial lai tiah a rak chim caah a si. Iran-Deal a hrawh zarh khat hnu ah Jerusalem khuapi ah Signboard thar an hun chap colh.
Jerusalem khuabawi nih khua chung hmun pakhat cu Trump le USA cung lawmhnak langhternak caah Trump min kan pek tiah a chim. Israel ram le miphun a ṭanhmi USA le an president cung lawmhnak kan langhter khawhmi te a si, a ti.
Kum thawkka ah khan Israel transport-minister nih tlanglawng-dinnak pakhat cu Trump min pek a rak duh kong a chim i a dang MP pakhat nih Jerusalem i Embassy an chiah tak ah cun "Trump-khua" ti zong in pek a phu tiah Trump lung an lawmhter ve.
Trump Aa Tel Lai Lo:
Hmai zarh hi Embassy hunnak cu an tuah cang lai. Hun onnak ahhin president Trump aa tel lai lo tiah theih a si. Vice president Mike Pence zong kal aa timh lo bantuk in Secretary of State thar Mike Pompeo zong kan hnu zarh kha Israel a tlawng cang i aa tel lai lo.
Aa tel ding hna cu Deputy Secretary of State John Sullivan, Finance-minister Steven Mnuchin president fanu Ivanka Trump te nupa an si.
Jerusalem ah Embassy ṭhial a timmi ram cu an tlawmte. Israel le Palestinian kar buainak a hma fung in sawh lengmang an duh lo. Ṭhial ve aa timmi ram pawl cu Guatemala a si i cawn nili ni aa ṭhial lai. Paraguay nih tu thla kan i ṭhial lai an ti i Israel pawl chimnak ah Czech Republic, Romania le Honduras zong ṭhial an lung chuak ngai ti a si.
Na Thei Maw? Israel Nungak Nih Vawleicung Lianbik Hlasak Zuamnak Ah Pakharnak A Lak
Jerusalem cu miphun dang he an i hrawmmi a si. Biaknak dang zong nih a thiang tiah an ruah i an pathian an biaknak hmun a si zungzal. Cucaah atu bantuk in Israel khualipi ah ser ṭhan ding cu a buai ngai kho, i hi ruang ah Tel Aviv khi khualipi ah UN nih a rak chiahpimi a si.
Daihnak Lam Dang Kawl Aa Tim
Trump le Israel hruaitu hna an i ton lio ah Jerusalem ningpi in i lak ding cu a si thiam lai lo caah hmun zeimawzah cu nan pek hna a herh lai, cu a si lo ahcun daihnak a um khawh ding a har tuk lai tiah an rak i ceih. Nichuah lei Jerusalem i a ummi Jebl Mukabar, Isawiya, Shuafat le Abu Dis hi Israel nih nan chuahtak ve lai tiah White House nih Israel's Defense Minister Avigdor Lieberman cu an rak chimhmi a si. Cucu Jerusalem Post nih a ṭial.
Mah cu hmun Israel nih a chuahtak ding cu Palestinian pawl nih an khuapi ah an ser khawh ve te lai tiah ruahnak a um tiah Washington DC nih ruahchannak a ngeih kong a chim. 1967 kum in Israel nih Jerusalem hi UN bawmhnak in an rak lak tthanmi a si.
Israel ram an pek ṭhan hna thawk in Jerusalem hi Israel khualipi a si ahcun a buai tuk lai tiah USA president Harry Truman thawk in Obama tiang an rak duh lonak hi a si. Trump nih Palestinian he lungtlinnak a ser khawh i an duhmi a pek khawh hna a si ahcun, cun Israel zong nih a cohlan a si ko ahcun Jerusalem i ṭhial zong cu a poinak um te men lai lo. Asinain Jerusalem ruangah nihin tiang vawlei a dai lo.
Embassy kan ṭhial lai a ti ahhin nichuah-laifang um ram pawl nih fakpi in an rak mawhchiat. Asinain, Trump nih president aa cuh lio in a rak i kammi a si bantuk in a tuah tak ve.
Foto: Lefigra.fr/vg
Comments
Post a Comment