Washington an zanlei sml. 2:00 ah President Trump cu White House in bia a chim lai i a chim dingmi nih Vawlei ralpi zong a chuahter khawh i daihnak laksawng zong a coter khawh.
Cucu Iran-Deal timi Iran-nuclear program kong i USA le a dang ramkipfonh bu pawl lungtlinnak rak ngeihmi cu Trump nih a duh lo caah president a si in hrawh aa tim peng. - Iran nih Nuclear hriam ser a ngol i US le EU pawl nih an phihmi tampi an on piak tthanmi kha Trump nih a duh lo.
Obama nih daihnak caah fakpi in a rak i zuammi a si. Rian an hon chawngtu Trump nih hrawh ding aa zuam i UK, Germany, France, EU le UN siseh Russia le Tuluk zong nih hrawk lo ding in fakpi in an chimhchawnh.
Cucaah hrawh bak si lo in, Trump nih a duhning in thlen le remh te dawh in ruah a si.
Hi Iran-Deal hi a hrawh bak a si ahcun1. US tello in Iran nih a pehzulh khawh. Aruang cu EU, UK le a dang nitlak lei ram pawl pinah Russia le Tuluk nih an hnatlakpimi a si caah a poi lo. Cucaah Iran president nih US nih a duh lo zongah hi lungtlinnak cu kan zulh tiah a chim chih.
2. US Company harnak an tong lai. Iran-Deal ruangah phihnak an on tthan i Iran ah rian a ttuanmi US company pawl caah thil har ngai a si lai. European hlawknak a umdeuh lai. Cutik ah Trump cu EU ram pawl cungah a thinhung tthan lai.
3. Iran nih Atom-program thawk tthan ding in aa hrocer ve. I fawite in a thawk khawh lai timi al awk a um lo. Cuti a si ahcun Israel nih a kah colh dingmi a fiang fawn. Cu tikah Iran nih Atom sernak a ngeihmi Uran hi Arab rampawl ah a rannak in fawite in a zuarh hna lai.
4. USA le Israel nih ralkap thazang a hman colh lai. Iran-Deal um lo ahcun USA le Israel nih Iran kahnak ding ah dawntu a um lai lo. Atu hmanh ha Iran nih Syria a bawmh caah Israel cu a lungre thei tuk cang i puh lo le puh lo Iran a puh cang. Libanon le Syria lei in Iran nih a kan kah lai ti an phang. Cu pinah Trump le Netanyahu nih cun ralkap thazang hman lawng ah daihnak a um lai ti an zumh.
5. Zinan man a kai lai. Ram hruaitu hna nih ral thawhnak bia an chim tikah zinan man a kai lengmang. A luancia thla khat chung hmanh ah a kai ngaingai ti a si. Chawleh an phih lai caah Iran ah zinan rian ttuannak a zor lai i zinan man a kai tuk lai. A hlawk ding cu Norway a si lai :D
North Korea le South Korea an i chawnhbiak khawhmi hi Trump nih amah thawng ah aa ruah. Republican nih an i zumh. Cucaah Nobel Daihnak pek awk a si tiah an au. North Korea nih biaruah le ramdang he i chawnhbiak a hon duh hi Trump hrocernak thawng in a si ti cu biadik lo a si. Asinain Trump zong hi Korea kong ah mintthatnak pek tlak a si.
Cu lio ah Iran-Deal hi hrawk lo in um sawh law daihnak laksawng pek awk a tlaak chin lai.Cu silole amah duhning in thlen le remh khi si sehlaw, Iran he a thar in bia aa ruah hnga i remdaihnak cu a chuak deuh hnga tiah ruahnak a um.
Hi panga pinah van chap cio ulaw, theih ttha ngai si lai. Kai lawm.
Photo: VG/Thomas Nilsson
Comments
Post a Comment