GCCF Rianṭuannak A Kau Chin Lengmang

Global Chin Christian Fellowship (GCCF) hi 2010 ah khuaza um Chin Khrihfabu vialte hmunkhat te rianṭuan ṭi khawh nakding ah rak dirhmi a si. Nihin ah cun thawngṭha karhternak lawng silo in kan miphun ṭhancho le tunmernak ah fakpi in rian a ṭuan cuahmah cang timi a tanglei bantuk in hmuh khawh a si.

2017 March ah Baptist Church of Mizoram (BCM) he rianṭuan ṭi ding in hnatlaknak an rak ngei kho i 2014 May ah WACC he zong hmunkhat rianṭuan ṭi ding in an rak i cohlang.

WACC Ah GCCF corporate member in an cohlan hna i GCCF a ton hmasami international org. a si. foto: wacc

2018 march ah GCCF nih Rezua le Matupi ah Solar Power hman khawh ding in an va tuah piak hna tiah Executive Secretary, Rev. Dr Hla Aung sin in theih a si. Rezua siizung caah an tuahmi cu a ngan ngaimi a si caah siizung pinah a pawng inn tam nawn mei a pe kho ding a si. Cucu Ks. 32,500,000 man a si. Amah belte mah bantuk hi Cozah nih an onh lai maw timi theih a si rih lo caah cu kong he pehtlai in cozah bia hngah a si ko tiah theih a si.

Kan Laitlang hmun dangdang electric a phanh lonak i sizung hna zong ah solar mei hi pehzulh in tuahpiak cu an i tim. Hydro an laak ciami zong an hlun cang lai i thlen piak le a tharchuah piak ding saduh an thah kong zong Dr. Hla Aung sin in theih a si.

MATUPI siizung zong hi 2016 ah an rak tuah piak cang hna i 2018 march ah an va veh ṭhan. System an thar chuah piak hna pinah siizung nih a herhmi thil suknak, Oxygen peknak le tisa sonak tiang in an va sersiam piak dih hna tiah theih a si. Matupi siizung bawmhnak an pek chapmi $2500,- man a si tiah Dr. Hla Aung nih a chim.

Matupi Union Theological College (UTC) nih a herhnak paoh ah tlamtling tein hman khawh ding in Solar cu bawmh le tuahpiak an si ve. Ti pumhnak, photo copy tuahnak le zan mei vannak ca vialte caah a za dih lai. System complete inn tuahpiak hna i a dihlak ah $3,000 man a si.

GCCF ṭuan ṭi hawi German pawl zong nih an zulh hna i Biogas tuah te ding kong zong an ruah. An tuah khawh a si ahcun ramh in sermi Biogas technique hi hman an i tim i hmun zong an zoh pah.

Lairam cu thli a pang/tam ngaimi a si caah thli in Electric chuahnak hi ṭha tein tuah khawh a si lai tiah zumhnak an ngei. Dr. Hla Aung nih a chimning ah Germany i an ṭuan hawi Organization upa pawl he iton in ceih ṭhan ding a si.

A tang ah cabia aa peh:

Relchih Awk: CHIN KHRIFA POLITIK

Hi vialte hi Kawlram cozah nih nawl onh a herhmi rianṭuannak a si. Chin State Cozah nih biatak tein a ṭanpi ding a biapi tuk. Hi pinlei ah rian tampi an ṭuan khawh nak ding ah Chin MPs le State Hluttaw nih fakpi in ruah piak an herh.

GCCF an website www.globalchinchristianfellowship.com hi an lim lo i Info. tam hmuh khawh a si lo. GCCF phunghram le bylaw theih a duhmi nih HIKA hi click khawh a si.

Executive Director cu Rev. Cung Cin (Canada) a si.

Note: BMC he an itonnak hmanthlak khi BCM website ta hmanmi a si.