Football Thawngpang Bultan Tete

Europe Football Season a hun dih cang. World Cup kan i ngaih cio hna lai. Cu hlan ah bawlung thawngpang chawkvai tete van dawi pah:

MESSI INTERVIEW
Sui Kedan a cotu Argentina le Barcelona hmaikal Messi nih "Real Madrid ah NEYMAR a kal a si ahcun a poi tuk lai," tiah a hnubik interview an tuahmi ah a chim. Aruang cu Neymar hi Barcelona caah mi sunglawi a si, ttanhtu thinlung zong ah a caam i an dawtmi a si. Barcelona he teinak tampi a hmu, Champions League zong a tei bal. Real M. i aa tthial ahcun kan zapi caah a nuam lo ngai ding a si, tiah a chim chih.

C. Ronaldo nak thiamdeuh si kaa zuam ballo, tiah Ronaldo kong an halmi cu a leh hna. Hi hna pahnih hi Sui Bawlung a la tamcem an si i ahodah thiamdeuh timi nihin tiang an i al lengmang hna. "Ronaldo hi ka zuamcawh ballo, tha a ka petu a si. Champions League hi kum tin tei ka duh, La Liga zong tei peng ka duh i zuamnak ah teitu si cu ka duh zungzalmi a si bantuk in anih zong teitu si a duh vemi a si." ti dawh ngai in a chim. A hnubik interview an tuahmi ah a chimmi a si.

Messi nih Argentina hi tu kum World Cup a teipi hna a si ahcun tuanbia cauk ah a thiamcem asiloah mi liannganbik a si lai. Vawleipi caah a si lo hmanhah Argentina ah cun Maradona nakin a min liandeuh lai tiah zumh a si.

ARSENAL MANAGER ding ah Players nih an duh lo.

Wenger cu kum 22 hnu ah Arsenal FC a hun chuah tak ruangmang. A dihmi cu a dih cang, Arsenal caah a tuahmi vialte cung ah thangtthat a tlak tukmi a si. Amah hnu a hun ra ding Manager nih amah nakin rian tthadeuh a ttuan kho lai maw? Hodah a si lai? Ferguson a chuah hnu i United a tlak bantuk in Arsenal hi atu nakin a ttumchuk lai maw? Zeitin nan ruah?

Arsenal manager caah min tampi media nih an chuahtermi chung ah a hnubik i an zumhmi cu Manchester City i Pep Guardiola a bawmtu Mikel Arteta hi a si. Arteta cu Everton ah saupi a chuih hnu ah Arsenal ah kum tlawmpalte a chuih manh. Manager sianginn aa lim in Pep Guardiola nih bawmtu ah a lakmi pa a si. Arsenal players a tamdeuh nih Arteta (sil a thlirmi khi.) cu an manager ding ah an duh lo tiah Mirror nih a tial.

Tottanham ah thlennak tampi chuah dawh a si. Nai chung vialte kha Stadium an ngeih lo caah Home-match paoh Wembly ah an rak chuih. Stadium an sak caah phaisa tampi an herh i hlawh ding an duh ning in an pek khawh lai lo caah Player tam nawn zuar ding khua an ruat ti a si. Hlawh a sangmi pawl zuar i mino le mandeng deuh tu cawk ding an i tim. Cu ve bantuk in an managet Mauricio Pochettino zong Club aa thleng lai tiah media nih an ttial ngai cang.

Liverpool hi minthar cawk len an i tim i mi zong an i zoh cang. West Ham alaikal Lanzini khi an cawk hmasa cem te lai tiah zumh a si.


Hi vial si chung seh. Photo: Dun Emmert & TV2