Dr. Salai Ngun Cung Lian | Feb 15, 2008 @ Laiforum
Dear Careltu hawikom hna, kan ram cu ahopaoh nih kan dawt dihmi a si ko. Kan ram uknak hi a chiat tuk caah, ram dang khua dang ah kan kal ciomi a si. Kan ram uknak hna aa thlen i, kan ram hna a ṭhat si ahcun, mi tampi cu kan kir ko men lai. Mi tampi cu, zungzal khuasak ṭhan ding ah kan kir ti lo hmanh ah, a len tal in va lenkai ding cu kan duh cio ko lai. Zeica tiah kan ram pei a si cu.... Kan kir lo ah, kan len lo ah.
2001 ah a si rua. Delhi ah International IDEA nih meeting a kan auh i, ka kal ve. Meeting a dih hnu ah, Mizoram ah kal u sih kan ti hna i, kan hawile cheukhat he kan kal hna. Lunglei ah ka u le sin ah ka tlung hna. January thla a si i, a kik ngai. Zan cu, bia hna ka ni ruah pah, ka ba pah i, ka mit ku zong a thaw ngai. Zingka ka thawh in ti kholh ding a si i, Tilum a um ti lo. Tak khawlhnak room te ah ka lut i, ka hmai kaa phiah ah cun, ka hmurmul vialte an dir dih. Zeipaoh a si ah, ram lak ah saupi a rak um bal ve mi, ziah tikik maw ka ṭih lai ka ti i, one-two-three tiah tipung pi cu ka cuai i, kaa tawih. Ka thaw zong a pit dih. A harning cu chimh awk a ṭha lo. Sahpiat zong i thuh ti hlah. Towel he ka hnawh i, ka chuak. Umm.... ka theih lo kar te ah pei ka taksa nih thil ṭha a rak theih tuk cang hi ka ti.
Zingka Bazaar kan kal lai tiah ka u nu nih a ka ti i, ka zulh. Lunglei Bazaar ah kan kal. Bazaar cu ka phak ah cun, Tho cu a tam taktak. USA ah tho ka hmuh lonak a sau tuk cang i, cu le cang ka in, tho nih a fuh mi sa vialte cu ei awk ah ka ruat ti lo. Ngasa car le anthur, Cengkawl le Zawngtah ti ban tuk hlan lio ka duh mi pawl cu a cawk i, kan ṭin. An chuan. Ka ei nain, a thaw ti lo. Ka mit thlam ah tho lawng te a um. Umm.... ramtang ka um lio zei poh a ei kho ve mi, ziah... cu ngai cu.. ka ti...
2002 ah a si. Jarkarta ah meeting a um i, kan kal. Chuncaw ei ding kan ti hna i, downtown ah a um mi, Mall tang i, Restaurant ah kan lut. Kan ṭhu i, rawl kan cah cu, tho tampi Restaurant ah a um. Ka hmai ah a ṭhu mi, tleicia Dr. Eugene Thaike, President Sao Shwe Thaike fapa a si. Rawl cu a kan pek i, kan ei. Ka keh lei kut nih, tho a duai, orh lei kut nih rawl a ei. Ka buai ngai. Dr. Eugene nih aka zoh i, "Tu le Sa Ko Le Sa Pawh Kua" a ka ti. Tho zong ei ve seh, kan mah zong ei ve usih a ka ti. Ka theih lo kar lak ah tho fihnak ka rak ngei... ummm... mah bang lo..
2003 ah Thailand ah Meeting a um i, CNF Vice Chairman te sin ah ka thumh. Zing ka kan thawh bak ah Vice Chairman cu, tak khawlhnak room ah a lut i, ti kik cu aa khawlh pah. Hla hna a sa pah. Ka lut ve i, ti kik cu ka tongh i, Lunglei tlawn lio ka tonmi kha ka mitthlam ah a chuak ṭhan. Ka celh lo i, Chan Chan Nu cu, tilum ka tuah piak ko ka ti i, tilum a ka tuah piak mi cu ka khawlh. Vice Chairman nupi tilum soter cu ka ning a zak ngai ko nain, ka tak sa nih a celh lo.
Kan hnu kum October ah Aizawl ka phan ṭhan. Kan pu Hi Phei inn ah ka tlung i, a cungbik dot ah keimah long in ka riak. Zingka ka thawh i, ti kholh lai ah tilum a chuak ti lo. Ka buai hawi. Zunput ka kai lai ka ti i, Paper Tower a um ti lo. Nan theih kan theih bantuk in, ti pung pakhat le hrai pakhat lawng a um. Zarh khat chung si vang ngai in ka um....
Ziah, kan ram uknak i thleng seh law, zeitin? Biatak tein khua a ka ruahter.
Kan tlung lai i, Tilum le Tikik e a um ti lai lo. Air Condition le Heater e a um ti lai lo. Paper Tower ai awh ah News Paper hna, Tlah an tahnak i hmang awk a ṭha lomi hna kha hman a hau lai. Vok he Ar le, Sia he Caw he Maheh he, Uico he, Minung he kan um ti hna lai. Filtered Water e, Bottle Water e a um ti lai lo. Kan um thiam ti hnga maw? Kani theih lo karlak te ah, kan sining hi tampi a rak i thleng manh.
Cucaah, kan ram a ṭhat tikah kan kir lai maw lai lo timi hi ruah phu a si ngai ko. Asinain, ram dang a phan mi vialte kan zapi nih kan ruah deuh awk mi cu, kan ram a ṭha lomi hi ṭha lak in zeitin kan ṭuan ṭi hna lai i, kan ser lai timi hi a si deuh rua ka ti. Kan ram hi Pu Lian Uk chimh bantuk in Eastern Switzerland bantuk in kan serh khonak hnga ding ah kan zapi lungrual tein ṭuan ti ko hna u sih.
Thailand le India hna cu kan ram nak in a ṭhadeuh ngaimi an si. Asinain, US, EU, Canada, Australia etc. hna ah saudeuh kan um ah hin cun, Thailand le India hna ah khin a um zia kan thiam tawn ti lo. Kan ram chin chin ah cun zeitin?......
Upatnak he,
Salai Ngun Cung Lian
 |
| Dr. Ngun Cung Lian: "Ruah Lopi In Kan Khua Ah Ka Va Tlung" |
--------------------------------------------
Note: Dr. Salai Ngun C. Lian cu USA ah a chungkhar he saupi a um cangmi a si i atu cu Kawlram ah an chungte in khua an sak lio a si. Ram le miphun caah rian a ttuan cuahmahmi a si i Laiforum i ca a rak ttialmi tete hi kan miphun ruah ding tete an tampi. A catialmi pawl nih political buu pawl, revolution siseh miphun dawtnak a chuahpi ngai tiah ka hmuh caah 2008 thawkka i a rak ttialmi Laica ka remh hnu ah ka hon tarmi a si.
Comments
Post a Comment