 |
| CBCUSA mission consultation 2016 lio a si. Biaknak hruainak ah nu zeitluk in an tlawm rih? |
2050 Ah Lai Zeizatdah USA Ah Um Te Lai?
Dr. Hai Vung Lian | USA | 21 Sept. 2008 @Laiforum
USA hi ram ropui taktak a sinak cu, vawleicung miphun kip tlinnak ram a simi; nunphung kip, vunhawng kip le muisam phunkip tlinnak ram a simi hi a si. USA timi aa thawkka in, nihin ni tiang ah Mirang hi a tam bik peng an si. Mirang nih an khuhnenh zungzal. Asinain, 2042 ahcun USA ah miphun kip hi "majority" timi a um ti lai lo. Kan zate in "minority" kan si cang lai ti a si. Cucu kan caah thiltha maw a si lai? Thil chia dik?
 |
| Dr. Hai Vung Lian. Foto: Facebook/private |
Nihin ni sining zoh tik ah, USA milu hi million 299 (2006) an si. Cazin ah rellomi minung tampi an um kho men. Cu chung ah Mirang (White) timi hi zatuak 74% (White Hispanics relchih in) an si. Million 221.3 an si. Hi chung ah Mirang (White taktak) hi zatuak 66% (198.1 million) tluk an si. Hi Mirang hi 2042 ahcun 50% an tling ti lai lo i, US miphun dihlak hi "minority" viar an si cang lai ti a si. US cozah tuaknak ah, 2050 ah hin White hi 50% hrawng an si te lai tiah an ruah nain, kum 10 tuan deuh ah 50% tang an si lai ti a si.
Zeicadah Mirang taktak (Hispanic thi tello) pawl hi, hi tluk rang in an milu a zawr hnga? A ruang bik thil 4 a um. (1) Upa tar an tam i a thilomi an tam; (2) Fa an hrin ning a tlawm i a chuakmi nak in a thimi an tam deuh; (3) A thi dingmi le a karh dingmi tuak tik ah an i milh lo. Hi hna pathum hi Mirang milu an zawrnak bik a ruang a si.
Nihin ni thil sining tein a kal ahcun, 2050 ah US milu hi million 439 kuakap an phan lai. Hi chung ah Mirang hi 203 million an si lai. Kum 44 chung ah, million 5 kuakap lawng an karh lai tinak a si. Chim duhmi cu hrinmi an tlawm i a thi mi an tam tinak a si.
USA ah a pahnihnak milu a tam bikmi miphun cu, Hispanics (Anak he a rang he) an si. 2050 ah hin million 133 kuakap an phan lai tiah tuak a si. 2007 ah 45.5 million tluk an si tiah tuak a si. Cucaah kum 44 chung ah, million 77.5 tluk an karh lai tinak a si. Zeicadah Hispanics cithlah hi hi tluk rang in an karhnak a ruang 4 a um. (1) Chungkua 9.9 million tluk an um i, cu chung ah zatuak 62% cu mino kum 18 tang a ngeimi chungkua lawngte an si; (2) Chungkua 44% hi kum 18 tang ngakchia a ngeimi nuva no an lawngte an si; (3) A thimi nakin a chuakmi a tam deuh zungzal; (5) Ramleng in a rak lutmi hna ruang ah (Ramleng lutmi hi cu tambik an karhnak hi a si lem lo ti a si).
Hispanics i an policy le politics thabik cu milu karh hi a si. 2004 ah Hispanics vote pe kho tu hi 7.6 million cuang an si. 2008 ahcun an karh chin deuh rih lai. Cucaah zeitluk in dah US ah Hispanics an biapit timi cu hmuh khawh a si cang. 2050 ahcun an tam ngaingai lai caah, US politics hi tamtuk a lutaw an mer khawh te lai. Hi tining tein, Hispanics an karh I, Mirang an zawr ahcun, 2100 ahcun Mirang nakin Hispanics hi an tam deuh te kho men. 2150 ahcun USA hi Hispanics ram pakhat ah aa chuah kho te mi a si. A ho nih dah a chim khawh hnga?
USA ah a pahnihnak a tambikmi miphun cu, Minak asiloah African cithlah pawl an si. Nihin ni ah USA ah zatuak 14% an si. An karh ning a fum ngai. 2050 ah hin zatuak 1% lawng an karh lai i, US milu i 15% (million 66) an si lai ti asi. 2050 ah hin, Hispanics hi Minak let hnih an si lai ti a si.
Asian milu hi atu lio ah zatuak 5% lawng kan si. Asian ti tik ah, Middle East hrawnghrang hi telh an si theng lo. 2050 ah hin 9% (41 million) kuakap an si lai. Native American hi atu lio ah 1.6% an si i, 2050 ah 2% (9 million) an si lai ti a si.
Laimi hi Asian miphun chung ah telh kan si. Nihin ni ah US Laimi hi zeizat dah kan si hnga? Kum khat ah zeizat dah kan thi i, zeizat dah nauchuak an si? A karh lei maw kan si te lai a zawr lei dah? Zatuak kan zawr maw kan karh dah? 2050 ah khin US Laimi hi zeizat dah kan si te lai? 2050 ahcun Hispanics le Minak nih US Politics le business hi tampi an khuhnenh te lai. Khi lio caan ah, Laimi kan dirhmun khi zeidah a lawh ve te hnga? Zeitluk in dah US hi Laimi nih kan thathnem ve te lai?
__________
Note: Dr. Hai Vung Lian hi theologian a si i Laimi nih bochanmi, cabia ttha tampi a ttialmi a si. USA ah khua a saknak a sau ngaingai cang. Atu a capar hi 2008 i a rak ttialmim a si i Nihin USA ummi nih zeitindah a cuai nan thlai?
A ttha na ti cun Share ve.
Foto: CBCUSA tonnak khi http://lairambawiparam.blogspot.com ah lakmi a si.
Comments
Post a Comment