South Korea hi 1986 thawk in World Cup ah an i tel kho, i Asia ram hna lakah anmah tlukin World Cup hlawhtlinnak a hmumi an um lo. 2002 World Cup cu Japan he bawm in an rak don Europe le America ram pawl he tahchun tlak an si lai ti a zumtu an rak tlawmte. Asinain South Korea nih Spain le Italy cu an rak tei hna, cun SemiFinal tiang an rak phan. Cu lio a rak chuihmi hna cu Hong Myung-bo, Yoo Sang-Chul le Ji-Sung Park (Manchester United) hna an si i an chan ah Hero taktak an rak si.
2002 kum bantuk in an hlawhtling ti lo nain Russia i tuahmi World Cup ah an i tel kho rih lai tiah an rak zumh hna. Asinain 2018 World Cup Qualify an chuih i puai nga chuih dingmi ah pathum an sungh caah an Coach Uli Stielike rianphuah a si. Russia ah itel khawh dawh an si ti lo. Shin Tae-Yong cu Coach ah an hun lak i a taangmi puai hnih cu sung lo in a chuihpi khawh hna ahcun an Group ah pahnihnak an si lai i World Cup ah an i tel kho lai. An saduhthah a tling. Russia hi avoi 10.nak World Cup an itel a si lai.
 |
| South Korea captain thar Ki Sung-Yueng, Celtic i a goal lio. Foto: Scanpix |
An ram i World Cup an tuah hnu in South Korean bawlung chuih thiam pawl nih Europe club pawl chuih kha an i zuam. Cu hlan cu an ram le Japan club pawl ah an rak i za, nain Premier League ah Ji-Sung Park cu thlitu bang vung! tiah a hun lar colh. Cu nih cun an rammi caah innka a hun i nihin ah cun Premier League ah Korean pawl hmuh ding an um leng cang.
Tutan an Captain Ki Sung-Yueng hi a no tein England ah a phan vemi a si. A ngakchiat deuh lio ah Australia i a rak cawnmi mirang-holh nih bawlung a chuihnak ah tampi a bawmh. 2002 World Cup cu Australia in a rak zoh i ni khat khat cu kan ram caah ka chuih ve te lai tiah a lung in a rak i seh chih. Kum 20 a si ah a chuihnak Club FC Seoul cu a kal tak i Celtic ah a chuih, i a thiam ngai caah Swansea an lak i 2012 thawk in Premier League ah a chuih kho. Ruah lopi belte in Swansea cu tu kum hi Premier League in an tla.
Ki hi Celtic a chuih lio in an ram ah a laar tuk colh. Kum 21 a si ah 2010 World Cup cu a chuih kho i Ji-sung Park hruainak in "the eighth final" tiang an rak phan. Park hi Ki nih zohchuntlak taktak a si ee tiah a hnu interview ah a rak chim. Atu cu amah nih a hruai cang hna lai.
England ah pangpar bantuk in aa sarh cuahmah mi Korean pa a um, i cucu Heung-Min Son a si. Tottenham ah goal a sutmi zong a tam ngai cang. Aa zuam. Goal a sutmi zong an i dawh dih, i a mithmai panh kho pengmi nungak nih an i cuhmi a si. Asia nakin nitlak lei ah kal ahcun ka tthangchodeuh lai tiah kum 16 a si in Germany i Hamburger SV ah a chuih i Bayer Leaverkusen an duh caah aa tthial. 2015 ah Tottenham nih an tuah bal lomi Asia mi cawk kha a si nain Son cu an mitthi tuk i 30 million euro in an rak cawk.
 |
| Son nih Colombia he an chuih ah a goal i aa lawmh lio. Foto: Scanpix |
An i cawk fuh bak!!! Goal 30 a ngeih i Assis 13 a ngeih caah Premier League i a chuihmi Asian lakah record thar a si. A ngakchiat lio a rak i zohchunmi Park cu a lonh diam. Cu caah an Captain thar Ki nih zaa ah zaa in a zumh i a bochan.
“He’s scored a lot of goals for Spurs and has shown his quality that he can play striker, winger or as a No10. He’s got great ability and hopefully he can score some goals for us. I think opponents will be afraid of him. His quality is dangerous. Whenever he gets a chance, there’s always the possibility of scoring goals.”
A dang pakhat cu kum 22 a simi Hee Chan Hwang hi a si. Red Bull Salzburg ah a chuih i Europa League zong ah a lang ngaimi kha a si. Austria League ah Salzburg in champions voi thum, Cup voi hnih a teipi cang hna. Zalzburg nih a minthut an hal lio ah Korea ah a thiambik a si tiah an rak ti, i atu hi World Cup chuih ding in redi a si cang. Liverpool le Tottenham nih cawk ding in an bawh tiah bia a chuak.
Son le Ki hi World Cup ah an i tel bal cang i zeidah a lawh ti kha an theih, nain Hwang cu avoi khatnak a si lai. 2002, 2010 ah an hlawh a rak tling ngai ko nain 2014 ah khan cun an group i Belgium le Algeria nih an tei hna hnu ah Russia he an rak i tluk caah an rak kir colh. An ram an phak ah ttanhtu rammi nih an volhpamh hna, khaicek le mutthai hna in an rak cheh hna. Sungh hlei ah a fak tuk!!
Manchester United a rak chuihmi an Captain hlun Ji-Sung Park nih Semi-final phak ding cu a har tuk cang tiah a ruah. Cucaah tutan World Cup i an hmuih tin taktak cu Group in tlaak lo hi a si. Asinain fawi dawh a si lo. Group F ah an um i pakhatnak la ding ah zumh ngaimi Germany, Mexico hi group men in a tla ballo, cun pkhat cu Sweden an si. Son nih a fawi lomi group ah kan um ee tiah a chim.
Ki Sung-Yueng cu Swansea in a chuak. Minthut caan a dih. Cucaah aa tinhmi le a rian lianbik cu World Cup ah ttha tein chuih khawh hi a si. South Korea aiawh in bawlung ral a tu ding hi mino lawngte an si, i amah hi upa pawl a si. An ram caah Hero si ding a saduhthah a si. A naule ralttha tein hruai ding ah redi a si.
South Korea kan ttanh hna lai maw?
Cc: EN.AS.COM / FIFA.COM / Wikipedia
Comments
Post a Comment