"Chinram cozah phaisa hmannak pawl hi mipi nih theih a herh, i Chin Media Lawng nih a zaat lo caah cozah nih Taungzalat Times cu thlatin kan chuah ko lai." - Chinram cozah aiawh chimrelnak nawl a ngeitu Minister Salai Isaac Khen nih the Voice ah a chim.Hi kong he pehtlai in Chin Media Network (CMN) nih fakpi in an doh. Rampumpi cozah thawngzamhca a simi Kyimong le Mirror hi ramtthen dang nih cun an hman cio ko hna. Chin Cozah nih Chinmi kan holh cio in kan chuahmi thawngthanhca pawl ahhin tlamtlin in an thanh khawh i mipi he pehtlaihnak a ngeih khawh tukmi a si ve ko. Asinain Chinram Chief Minister Pu Lian Luai zong Chin Media hmang duh lo in Kawlca chuah media pawl lawng a tongmi a si pinah atu bantuk in Minister pakhat tang in Cozah nih thawngthanhca kan chuah lai an timi cu zumh an tlak lo chinnak a hong si kho.
Relchih: FAKE NEWS Belte Zei A Si Theih A Herh!
Cozah thawngthanhca asiloah TV tibantuk hi communist le nawlngeih-uknak a hmangmi ram tamdeuh nih an tuahmi a si. Tuluk, North Korea, Russia le Myanmar hi naihbik in theihmi an si. Democracy lam zul in thimmi cozah nih atu bantuk in Thawngthanhca, mipi pekmi ngunkhuai in an chuah lawng si loin a cozah hrimhrim nih "Censorship" tuahmi le tawlrelmi cachuah a si caah mipi le anmah karlak i zumhnak cu a tthalei a panh ding hi a harngaimi a si. Cathiam lo, hramhram uk a rak tong i aa ziak cangmi pawl nih cu an izumh khawh men. Mipi nih cozah phaisa hmannak le kan rianttuannak an theih a herh tiah thawngca chuah cu a dik tukmi zong a lo nain mah hmai imilhnak men "abuse" a si khomi a si caah a ttha lo tukmi a si.
Democracy ram a simi Norway nih NRK timi TV-line a chuah i Party thleidannak um loin le cozah a tlaimi party, MP aho nawlngeihnak hman tello in Institution pakhat ah an hman. Zaran media nakin a tthawngdeuh i Journalist-minthatnak siseh an article le cozah/MP hna kong an ttialmi ah mintthatnak tampi Media lei le zalonnak a upatmi phu in an pek lengmang. Cucu "Fourth Estate" ti a si i rampi uknak le hruainak a ngiathlaitu a si. Cu bantuk media-institution lawlaw ser ttung lo le Chin Media he rianttuan tti lo in "cozah phaisa hmannak/mi vialte mizapi nih an theih khawhnak hnga." tiin ca chuah cu a ngaitu le theihtu caah ningzak ngai a si. An chuah zong ah mah le mah kong i ttial a si caah zumhtlak a si lo i "Boicott" cio ding a si.
Chin Media pawl belte hi fakdeuh in nan i zuam a herh chin lengmang cang tinak a si ko. Zeicah tiah Chin Media thawngthanhca pawl hi Laiholh i "thawngthanhca" asiloah Kawl nih "Tadin-sar" an timi thawngpang a cangmi ttial le chuah bantuk men in cahmai a khah caan a tamngai. Thawngpang ttial zong a thiam rih lomi nan tam tuk. Chin Media ah Chinland Post le Chin World hi min lang, a chan zong saumi an si cang i thawngpang hlathlainak leiah thazang an chuahdeuh a herh. A chungdeuh luh le kan miphun buainak a chuahpitu a phuang khomi "investigative journalism" hi i hmaithlak ding an i zuam a hon biapit ning tutan cozah Cachuah nih a langhtermi a si.
Tahchunnak ah Chinland Post nih "Chinram kulh kokek thil chuak cawk le lak" a duhmi an tam kong March 5. ah a ttialmi bantuk hna khi thukdeuh in luh le a si kho na lo in phozar timi journalist rian cu a si i thangthat a tong ngaingaimi a si. Cu bantuk in Chin State Cozah rianttuannak siseh, Eihmur le ziknawh kong tiang in a phozar khotu journalist kha Chinram nih a herh i Journalist Association (JA) an dirhmi zong hi chawva le an cachuah cawk in thazang pek ding a si. Chinram Cozah nih an rianttuan ning a dikthlir rammi theihter ding an duh taktak ahcun Chin media le JA hi tha a pek i runvennak a tuah ding a rianpi taktak a si deuh tukmi hi Chin mipi nih hngalh awk tlak ngai a si.
Nihin March 5. Kawlram ah "zalong tein duhmi chimrel khawhnak" caah lam a zawhmi tampi hmuh khawh an si. Mah cucu mivialte caah a biapi tuakmi a si. A biapit ve bantuk in a manfak tuk i nihin ah journalist tampi cu thah an tong i a thattu hna zong cu cozah le bawi siseh mirum he aa hawikommi misual pawl kut an si nain Journalist a thattu "Case" 10 ah 1 lawng hi palek nih an phuan khawh ti a si. Cu tluk in ttih a nungmi rian hi Chinmi nih Online in duhsalam in kan kutdong kan hman peng rih komi tu hi cu a poi tukmi a si. Hi hi Online in careltu hna zong nan lung a fim tuk cang lai tiah ka ruah. Chinmi nih Online News phun, media phun, zei si huaha lo vok bang a hmun ah i bualh peng hi cu a si kho ti lo, a hlei in ram ttha le caan upatnak ram, mifim ram i a phan cangmi nih kan ruah a herh cang.
Online cattial pawl nawl i cawn in Chin Cozah nih Media in phaisa kawl an i tim ve cang hih, ti hna si sual lai,......
Kawlram Cikhat!!!
Photo: Sibmlian/private. Vice-president H. VanTthio Thantlang siizung a veh lio.
Comments
Post a Comment