Milu tambiknak ram Tuluk ram a uktu Xi Jinping cu president thimnak ah altu pakhat hmanh ngei lo in teinak a hmu, tiah March 17. ah thawngpang a chuak. Mah cu tu kum chung ah Vawleipi nih a hngahmi thawngpang a si. A ruang cu Tuluk Communist Party nih uktu thimnak phung thar ser an timh i Xi Jinping caah hlawknak a simi phung a si khawh caah a rak si.
Relchih: Tuluk Party Congress le An President Kong Tawi
Nihin ah cun Xi Jinping cu a nun chung an ram uknak a tlaitu president si khawhnak Tuluk cozah le an party nih fehternak an tuah cang.
Xi Jinping hi TIME nih 2017 Person of the Year (PY) ah a thim lo nain pathumnak a si. 2017 PY cu "Silence Breakers" an rak si. Kan media pawl nih an ttial lo caah a ruah awk kan rak hngal lem lo.
Tuluk Communist Party Congress nih cu hlan vialte tu Chairman le President rian cu kum nga in voihnih (term 2.) cung tlaih khawh a si lo tiah fekte in an rak dirpimi a si. Mao Zedong a thih hnu in ahohmanh nun chung president si i nawlngeitu si kha an rak kham nain atu Xi Jinping hi a thih tiang president si khawhnak phung thar an ser piak.
Zeiruangahdah hi thil a can?
Xi Jinping hi 2012 dih lai khan president ah an thim i cu lio ah Congress member chung in 0.14% lawng nih vote an rak pe lo, a dang 99.86 nih an rak pek. Asinain tutan cu pakhat hmanh bau lo in Xi hi a nun chung president ttuan kho ding in vote an pek ti a si. Cucaah a hlan phung ning in 2023 ah a caan dih dingmi a si nain cu hnu zong ah nawlngeihnak a kut ah a um rih lai.
Relchih: Xi Jinping Pennak A Fek Chinchin Lai
Hi thil a cannak a ruang pakhat cu Xi Jinping nih thih a ttih caah a si ko. Xi Jinping nih uknak a kut ah a tlaih ri thawk in an ram i ziknawh le eihmuar kha fakpi in a do i amah he rank a tlukmi, cun minister tampi zong a rak tlaih hna. An ram mirum le bawi tam tuk thong ah a khumh hna i an ram ah ziknawh le ei hmuar kha a zordeuh tuk ti a si. A hlawh a tling ngai, i hi ruang ahhin Xi hi mi tampi nih an ttih. An huat.
A ralaimi 2023 ah president ttuan caan a dih a si ahcun nawlngeihnak a kut ah a um ti lai lo caah Xi Jinping cu bawmtu, chanhtu a cozah thar le Party chungah a ngei ti lai lo. Ziknawh le eihmuar a tuahmi hna nih zei ah an rel ti lai lo, i President a ttuan lio i a tuahsernak ruangah a nunnak a him ti lai lo. Cu a si caah atu te hin a himnnak ding le hnangam in um khawhnak kha a ruah a herh cang. I, a caah himnak tthabik cu Jesus a si lo. An party le a cozah kha a si. Mah hi a uk khawh hna a si ahcun fawite in an that kho ti lai lo.
Xi Jinping nih nawlngeihnak fekte in tlaih khawh kha a hlannak in aa zuamdeuh cang lai. Tuluk ram nih a hlannak in an tuar deuh lai maw, an i ong in an zalong deuh lai dah timi hi hngalh a si rih lo nain nun chung uknak tlaih aa timmi Xi Jinping nih a nawlngeihnak le pennak cu a herh ning in a humzual lai cu a fiang. Cuti a si ahcun zalonnak nakin harnak le buainak innka aa hong deuh ko hnga.
Relchih: Russia President Nih Leicung Thangchobik Tluk A Tlawn
Russia zong March 18. ah thimnak an tuah lai. President Putin hi aa zuam tthan lai. Teinak a hmuh ding aa zum tuk. Putin nih Xi Jinping sining hi a hngar hrimhrim lai. Russia thimnak he pehtlai in hi Blog ah ra rel tthan te.
Comments
Post a Comment