Vice President H. Van Tthio cu minister tampi nih an hon zulh i a fale le a nupi zong an i tel ve. Mi a hip kho ngaimi muisam a keng i hro zong a kual ngaingai. Lam le sul an sermi hong veh le Lairam i an rianttuannak rak zoh ah a hong tlun cu a si bantuk in mawttaw in tamdeuh cu a rak i chok. An kilven ning cu a ttha ngaingai i a rawlei ding tiang hi check-piak a si i tithiang (yee-tanh) lawng in a rawl chuanpiak a si an ti. TBC ah biachimnak an pek i Pathian bia lawng a chim caah Pastor le mi cheukhat cu an i lunghmuih tuk.
 |
| Vice President Henry Van Thio, CM Lian Luai, Zo Bawi tiin Thantlang siizung an kal lio. foto: Sibmlian |
Siizung hmunhma an zohpi i ihkhun chap ding inn saknak hmun te a zoh hnu ah a kir colh. Cu liote cu ka pi a zual tuk lio a si i ka khuaruahmi a tam ngaingai lio a si. Henry Van Tthio cu Indianapolis, USA i a ummi Hmun Uk (Ni Cung pa) he kawifa an si i Hmun Uk farnu a zualtuk lio ah siizung ah an iton kong hi hei chimh hi ka lung ah bochannak he a rak chuak. Asinain khu le phak in lodiam a kan kirtak colh i cu zanlei ah cun ka pi nih a kan liam tak ve.
Ka pi thih le ramkomh bu Kawlram ah nawlngeihnak sang a ngei vemi Vice President H. Van Tthio kong ka chimnak a ruang cu Thantlang khua ah siseh Lairam le Laimi caah pehtlaihnak a ngeih caah a si. Cucu Laimi nih a biapideuhmi asiloah a hleiin papek (priority) ding thil a um zia hi ttha tein kan ruah ngai a herh timi a si.
Thantlang ah mizaw cu a khuacaan ngeih in an tlawm le tam a um nain mizaw an tam peng. Thantlang peng kan tam ve caah a si. Ihkhun tam hi kan hnu kum sawmthum hrawng in an rak i zuam peng i politisian zong nih mi lemnak ah an rak hman tawnmi a si. Tu chan minung nih ihkhun 100 maw 50 maw an hal tthan. Thantlang peng nih a herhmi a si fawn. Khuapi pakhat zong a si caah ihkhun tamdeuh cu a herh ngaingai.
Asinain, ihkhun nih zawtnak a damh lo, mi a thlawp lo. Siibawi thiamsang (specialist) le a tthami nih mi an damh, an thlawp khawh i mi zaw zong an tlawmdeuh. Thantlang ah ihkhun 25+ a um. Falam ah 200 a um i Hakha he ai zat. Hakha le Falam ah cun Siibawi thiam (Specialist) an um. Ihkhun a tlawm ruang ah khuapi pakhat ah Specialist um lo hi a poi taktakmi a si zia cu ka pi kong in ka ton. Siibawi a um hnihkhat zong i phazo lo bantuk in a ummi ka hmuh tikah Siibawi tamdeuh le Nurse tamdeuh tu hna hi a pakhatnak i kan herhmi a sideuh i Specialist hrimhrim cu ihkhun 25+ a umnak zong ah chiah a herh bikmi a si ko.
Ihkhun 100 caah inn sak ding timhlamhnak hi kum hnih renglo a rau rih lai i cu chung ah mi zeizatdah thlawp manh lo in an thi rih lai? Vice President H. Van Tthio, na thil ti khawhnak a si ahcun a rauh hlante ah Specialist pakhat khat hi Thantlang ah chia kho law tiah bochan ngai in hei chimh le hal khi kan duh ko dahkaw.....
Comments
Post a Comment