Chanmpions League a peh in a teitu Real Madrid cu Tottenham nih group-puai ah 3-1 (4-2) in an tei hna i Ronaldo le Zidane cung biahalnak a hong tam ngai. La Liga zong ah an tlaak ngai caah Zidane a rian kong ah biahalnak a hon chuak.
A cung youtube hi Tottenham nih an tei hna nak le goal-sutmi an si.
A hnubik an chuihmi La Liga ah Club fate Girona nih 2-1 in a rak tei cang hna i Tottenham nih an hon nolh hna cu Ronaldo caah cohlan a har ngaimi thil a si. Girona i a chuihmi vialte man le Ronaldo pakhat man aa zat an ti. Zeidang si lo in Real Madrid nih nai tthal ah khan minung a zuar hna ruang ah a si ko, tiah Ronaldo nih cun a chim.
"Pepe (Besiktas), James Rodriguez (Bayern M.) le Alvaro Morata (Chelsea) kha kan rak zuar hna ding hrimhrim a si lo. Anmah zaka ah Theo Hernandez (k.19) le Dani Ceballos (k.20) an lak hna nain mino an si rih i an hmuhton a tlawm rih. Kan zuarmi pathum nih tampi an rak kan tthawngter." tiah Ronaldo nih a chim.
 |
| Zidane nih Ronaldo a thlen lio i ronaldo a thinhun ngai lio a si. Asinain an pahnih in an i bawm ngai. Foto: foottheball |
Champions League cu Tottenham nih an tei hna bu in Group cun an kai te lai ti ruah a si, aruang cu Dortmund le APOEL cu mark-2 veve lawng an ngei i a ralaimi Group-puai hnih an chuih ding ah Real Madrid caah hna ngam a si.
LA LIGA belte ah Barcelona nih mark-8 in an thlau cang hna i Spain thawngca lian Marca nih biahalnak a phunphun a tuah cang hna. Real Madrid rian hi Zidane nih a peh lai maw? Aa tlaak maw? Asiloah a chuihtu pawl nih a hruainak tang ah an nuar maw? tibantuk a chuak.
Asinain Ronaldo nih Zidane cu a dirkamh kong le a hruainak tang ah zei buainak hmanh a um lo kong a chim. Thilthlennak chung i kan chimmi vialte cu, cuka ah a dih ko, zeihmanh manager cungah kan lungtlin lonak a um lo, tiah Ronaldo nih a chim.
Zidane zong nih atu i an tonmi ruangah Real Madrid caah a thin phan lonak a chim.
"Ka thinphang lo. Kan kai tthan hrimhrim lai tiah ka zumh. Nihin cu kan sung nain thla tam tuk aa duh rih. Tutan bawlung kum kong ah ka thin phan ding a um lo, i a phang lai lo." tiah RMC ah a chim.
A thin phan lo zong ah zarhpini hi Las Palmas he an chuih lai i an tei lo a si ahcun thil fawi cu a si te lai lo.
Comments
Post a Comment