Tuluk (China) President a si kum 2013 in Jouarnalists le Tuluk experts nih Xi Jinping hi caan saupi nawlngeihnak tlaih ding lungthlitum a ngei tiah an rak purhdah. Cuti an ruah cu ziknawh le eihmuar a hmangmi pawl tamtuk a rak tlaih hna, a hleiin an party chungtel rengsang ngei tamngai a rak tlaih hna ruangah "Vom nih a thau aa hraankan" an ti bantuk in a nawlngeihnak a zuamcawh kho dingmi aa hrawh cia hna an rak ti.
Xi Jinping hi a muisam le khuahoi her hrim in mi a hip ngaingai bantuk in duhsah tein aa sersiam i nihin ah cun a luancia kum tampi chung i Tuluk President pawl hna nakain a nawlngeihnak a sangdeuh cang. Kum nga a liam i tutan avoi 19.nk Party Congress tuah an thawk ni ah Xi Jinping cu suimilam pathum chung Party-chungtel 2200 leng hmai ah bia a chim.
"Vawleicung ah hmunhma kan ngeihmi hi atu tluk in a tthawng i a kau ballo." tiah 2012 i Party hruaitu a si cangmi Xi Jinping nih a chim. Tuluk ram ah amah hi a bawibik a si ti aa chim he zong aa lo.
"Xi Jinping hi Deng Xiaoping hnu in Tuluk ah a liannganbik hruaitu a si cang. Theih lo cun Mao Zedong he an nawlngeihnak le an bawining hi aa tluk lai, tiah Tuluk-expert a simi Carl Minzner, Fordham Law School nih a chim.
Donald Trump dirpimi "America First"-politic nih USA i Vawleicung a rianttuan khawhnak tamtuk a zorter i Tuluk hi nawngeihnak tampi a hon ngei tiah Experts siseh ramhruaitu tampi nih an chim. Mah cu nih cun Xi Jinping hi Leicung huham lianbik a si tiah The Economist nih a thim. Ralkap siseh sipuaizi (economic) zong in USA cu a tthawngdeuh ko nain a zalenmi Vawleipi ah ram khat le ram khat i pehtlaihnak, rian ttuanttinak le a remdaimi Vawlei sernak ah hruaitu si hi tu chan ah pakhatnak ah an chiah ruang ah a si bik.
Tutan an Party Congress a dih hin a ralaimi kum nga chung a bawi tthan lai i nawlngeihnak fekte in tlaih khawh aa zuam lai tiah an ruah.
The Chinese Dream
The American Dream bantuk in Chinese Dream timi Xi Jinping nih 2013 i President a si thawk in a rak chimmi biafe a si ve. Chinese Dream a tlin khawhnak ding ah Xi nih a ralaimi a bawi chung cu aa zuam lai. Zeitindah Tuluk Chunmang kan tlinter lai timi hi tutan nihra chung a saumi Congress ah a ceihhmaipi hna lai tiah theih a si.
Tuluk tuanbia thar (Communist chan) ahhin Mao Zedong, Deng Xiaoping, Jiang Zemin le Hu Jintao khawh in hruaitu a panganak cu Xi Jinping hi a si i "innka kaudeuh in on" hi Tuluk ram tthannak a si ti a cohlang khomi a si.
The Chinese Dream timi nih hin Socialist ruahnak tampi a phurh chih tikah Communist party caah thil tharngai a rak si. A ruahnak cu a tlaangpi cu "Thought on Socialism with Chinese Characteristics for a New Era" ti a si i The Guardian siseh Xinhuanet tibantuk zong nih a muru an chim lo. Asinain a ruahnak le a kalpimi pawl ruangah ah thlennak a chuahpi lai tiah an ruah.
Aa timhmi cu Tuluk ah ramdang chawlet le a hramsih rianttuan duhmi zalong tein an luh le an ttuan khawh ding innka a on chap lai. A rammi tampi ramleng ah tlawn le sianginn kai khawhnak a zalenter chinchin lai. Kaudeuh in innka kan on paoh ah rammi an i nuam, an tthangcho i ram a ttha tiah a ruah. cu ti a ruahnak a dirpi khawh a si ahcun Tuluk tuanbia ah a min lian lai i Mao Zedong tluk a si lai, tiah an zumh.
 |
| Relchih: Tuluk Party Congress le Xi Jinping Kong Tawi |
2012 i Party hruaitu ah an thim lio tein an president Hu Jintao he aa lawh lonak a um ti a si. An ram hlasak thiam minthang he an i um ruangah mi nih hngalh le theih khun a rak si i pumpak a ruahnak le politic kalpimi pawl a hlawhtling.
Ni kum ah khan Communist Party nih a sangbik minthatnak an pekmi "Core Leader" cu Xi Jinping an rak pek. Mah hi thangtthatnak hi Hu Jintao nih a co ballo. "Xi Dada" tiah a rammi nih cun an kawh i amah kong bia le hla an phan. An ram cozah thawngpang phu pawl nih an tthangtthat. A tang ahhin Xinhua News nih Video a tuahmi hi zoh chih khawh si:
Personal charisma of President #XiJinping fosters a love of #China in countries all around the world #ChinaDiplomacy pic.twitter.com/6z0wGOdy59
— China Xinhua News (@XHNews) 3. september 2017
A nawlngeihnak a fek.
Xi Dada nih a luancia kum nga chung cu amah zuamcawh kho ding pawl an thazang a der ding a rak tuah khawh. Cun an party nih ruahnak thar le lam thar a zulh khawh ding biatak tein a rak i zuam, i politic ruahnak thar a rak chuahpi.
Cu ti thlennak a duhmi le innka kaupi on a duhmi Xi Jinping nih cun Tuluk ah Communist Party pakhat lawng um le a tthawn ding biapibik ah a chiah. An cozah Media pawl zong an Party thawngthanh le cawisan kha pakhatnak ah an chiah ding a fial hna.
"Party tteng-nge vialte nih party duhnak hi pakhatnak ah a chiah lai, Party nawlngeihnak a fehter lai i Party tthen lo ding a a fehter lai." tiah Xi nih a chim.
Mah hi a bia pawl ruangah hin zeitlukindah nawlngeihnak a caah a biapit timi le uknak tlaih aa zuamning a langhter. Ziknawh le eihmuar dotu phu (anti-corruption campaign) nih an ram i bawi (rengsang) million pakhat deng an rian a chuah hna. Mah cu Xi nih pumpak a bawinak fehternak caah a tuahmi a si tiah an ti phahnak a si i a hleiin ni kum ah khan amah a zuamcawh kho bik ding hmailei Tuluk hruaitu a si te lai tiah zumhbik mi Sun Zhengcai cu bawi/nawlngeitu sinak in a tthumh.
Note: Na duh i theihttha a si tiah na ruah ahcun na hawile sinah Share ve.
Comments
Post a Comment