Tutan Tuluk Party Congress a dih lai ni ah Xi Jinping min cu Tuluk Communist Party phunghrampi ah ttial a si i Mao Zedong hnu in an ram ah amah tluk a lianmi an um ti lo tiah oct. 24, chuak thawngca kip le Tv ah chim a si. Xi Jinping ruahnak le kalpimi lam cu an phunghram ah ttial a si. Cucu tutan Congress (oct. 25, in dih lai.) thawkka tein rak zumh cangmi a si. Mah cu nih Xi Jinping hi an ram le party ah nawlngeihnak caan saupi a pek lai tiah zumh a si.
Tuluk Communist tuanbia ah biapi tuk a simi Deng Xiaoping, reformer a simi hmanh hi a nun lio ah a ruahnak le kalpimi lam an phunghram ah ttial a rak si lo caah a min hi a thih hnu lawng ah phunghram ah ttialmi a si.
Vawleicung ah iteltum chinchin aa tim
Congress a dih hin cun an Party Secretary General a Term hnihnak a peh lai i President zong Term hnihnak a thawk lai. Ngiathlaitu Experts nih an lung in an hngalhmi cu Xi Jinping hi Term thumnak zong a peh tthan te lai ti a si, i mah tluk cun a nawlngeihnak a sang cang.
Xi Jinping hi Socialist le Marxist a rak uar ngaimi a si i Mao he an i dang ngai tiah ruah a si i Deng tu hi an i naihdeuh nain Xi nih chan thar le caan thar chung ah zeihmanh ttihnak ngei lo in karhlan aa zuam ti tiah Paul Denlinger nih a chim. Socialism nih kan ram hi a tthanchoter lai tiah a zumh.
- Tuluk miphun le ram nih a tthadeuh le a ceudeuhmi caan a ton chin lengmang lai, tiah Congress a dih lai ah a donghnak bia Xi nih a chim.
Deng Xiaoping nih cun "Mi dang an rum hlan ah pakhat paoh cu an rum hmasa hrim ding a si." a rak ti i cucu Xi Jinping president a si hlan tiang an rak zulh. Cu bantuk in Tuluk ram ah mirum an karh tuk, Leicung mirum cazin zong ah an i tel nain an ram ah sifak le mirum an hlawh aa dang tuk, an sining aa hlat tuk ning hi cu Xi Jinping nih thlen a herh tiah a ruah. Mirum le sifak i dannak hi a zor khawh chung in zorter ding ttuan le zuam ding a kalpi lai.
 |
| Tuluk communist an pa, chairman Mao Zedong le Reformer Deng Xiaoping. foto: AFP/Nrk |
Xi Jinping nih a ralaimi 2049 chung ah Tuluk cu "a tthawng i chan thar he aa tlakmi Socialist ram a si lai." tiah timhtuahnak a ngei. Nitlak lei ram pawl nihlawh (inncome) tluk hmuh khawh ding hi pakhatnak ah a chiah. Asinain Tuluk nih nitlak ram Liberal-democratic le capitalism cu zulh le cawn aa tim lo.
Xi Jinping nih khuacaan/climate kong hi biapi ngai ah a chiah. Thli thiang le van thiang hmuh le dawp khawh tthan kan i zuam lai ti hi tutan Congress ah a chimmi lakah uar a tong ngaingaimi a si.
Relchih: Tuluk Nih Innka Kaudeuh On i Vawleicung ah luh le chuahdeuh aa tim
Xi Jinping hi miphun a daw taktak mi (nationalist) a si ti a langhnak cu Japan hei pehtlaihnak (ralpi lio kong siseh) ah fiang tein a lung aa thlek kho, atu i Vietnam le Philippines ramri kong ah fekte in a dir i ramri hal le cuh aa tim (International le hi ram pawl nih cun faktuk in an thlauh, an tthawl, an i er) nain hnu a kir duh lo.
A tang ah cabia aa peh
 |
| Relchih: (Facts About) Xi Jinping le Tuluk Party Congress |
Vawleicung milu tambik ram a uktu a si i, ralkap le sipuazi in leicung a lianbik pahnihnak a simi Tuluk ramhun Xi Jinping nih a zumhmi cu Vawleicung ah daihnak kan herh nain cu daihnak cu thazang (ralkap le chawva) in kan tthawn lawng ah hmuh khawh a si ti hi a si. Cucaah ralkap thazang siseh hriamnam lei zong in tthancho aa zuam lai tiah ruah a si.
A donghnak ah tutan Congress a dihni Oct. 25, ah an Party phunghrampi thlennak le remhnak ah a min ttial a si i cu a min ttialmi cu Party chungtel 2300 nih lungtlinnak Vote an pek dih ti a si.
Cucaah a ralaimi kum le caan chung ah zeidah a lawh te hnga timi cu zoh rih hau ko.
Atang ah Tutan Congress lio i Tuluk nih Kawlram a ttanhnak kong rel chih. Teirial Catialtu facebook Page zong Like le Follow philh te hlah.
Comments
Post a Comment