Tuluk Party Congress le An President Xi Jinping Kong Tawi

Tu zarh cawn nithumni khan Tuluk Communist Party nih kum nga voikhat an tuahmi Party Congress cu an thawk i Vawleipi nih an cuanh. An party le ram hruaitu aa thleng lo, Xi Jinping tu a bawi chinchin i Tuluk cu Vawleicung ah hmunhma a ngei chin lengmang lai tiah medias hmang in theih a si.

Xi Jinping cu Party Congress ah suimilam pathum leng bia a chim. A chimmi kong he pehtlai in tlawmpal hmuhning le nihin an ram thil sining ka ttial hlan ah Xi Jinping le Tuluk Party Congress kong tlawmte theih a herh tiah ruahmi ka hon ttial hmasa:

XI JINPING cu hodah a si?

2012 thawk in Tuluk Communist Party hruaitu a si, i march 2013 in an ram president a ttuan.

June 01, 1953 Beijing khua ah a rak chuak. A pa cu 1949 i Communist nih an ram fekte in an rak tlaih lio ah Revolution a tuahmi pakhat a rak si ve. A pa ruangah ngakchia a si rihmi Xi Jinping cu khuate ah Tuluk holh le nunphung cawn ding ah an rak kuat. A hnudeuh ah a pa an ngaihthiam caah Xi Jinping zong catang sang le cawnnak sang a kai kho tthan.

Tuluk nichuahlei deuh ah khua a sa i politic le uknak lei ah biatak tein aa thawk hi Shanghai in a si. 2008 ah Vice President ah an rak thim.

A nupi Peng Liyuan cu an ram hlasak thiam minthang taktak a si lawng si loin Tuluk hriamtlai phu, People's Liberation Army ah Officer a si. An fanu hi USA i Harvard University ah ca a cawng lio ve.

2013 i President ah an thim thawk in ziknawh le eihmuar hi pakhatnak ah a ralmi a rak si. An party le cozah i rengsang tampi cu thong a thlaak hna. Cuti a tuahmi cu politics ah a ral simi le a zuamcawh kho ding pawl hrawh a duh hna caah a si tiah purhdah le sawisel a rak si.

Hi cabia tang ah Tuluk Party Congress kong aa peh: 

Relchih Ding: A Ralaimi Chan Minung Hna Ngaihthiam Halnak

TULUK PARTY GONGRESS:

Tuluk ram ah Communist party lawng a um i mah hi party nih hin an ram politic nawlngeihnak a tlaih dih.

Tu zarh October 18, kha an avoi hleikuanak Party Congress an tuah a si. Ni hra hrawng a rau tawn.

Congress hi nawlngeihnak sangbik le a biapibik a si. An party nih chungtel million 80 leng a ngeih caah Vawleicung political party ah a lianbik a si.

Congress hi kum nga dan in an tuah i chungtel aiawhtu 2200 an itong. Hi caan ahhin khuachung cu a si khawh chung dai ding in an tuah i chawlehnak siseh khualtlung mileng caah a harngai tawn. Congress tuah lio caan ah cun ttha tein an congh hna. Internet Social Media cheukhat zong an phih chung.

Congress nih a herh a ti ahcun Party hruaitu thar a thim. Cun an ram politic kong i a biapimi ceihhmainak le biakhiahnak an tuah.

Party chungtel 2200 itel in tuahmi Congress a si ko nain biafuntu le biakhiaktu taktak cu an party hruainak lu tlaitu pawl an si tiah ruah a si.

Cc: Wikipedia, Reuters and NTB