USA nih ni 120 chung ralzam lak a rak ngol chungmi cu nihnihni ah khan lak thawk tthan ding in Trump nih nawl a chuah. Asinain "ttihnung/zumh raih lomi ram" ah ruahmi pawl cu tu hnu ni 90 chung an hngahter rih hna lai.
January i White House ah aa tthial in Trump nih a tuah hmasami cu ralzam phih chung le ramchung luh khapnak a tuahmi kha a si i June in khan a caan a rak chap. Mahhi cu ram zeimawzat in USA luh khawh lonak ding a rak tuahmi ceih a tong ngaimi ah aa telmi pawlasi a si.
Ralzam an lak tthan cang lai, nain USA nih cu hlannak in tthadeuh le rengdeuh in khontrol (control) tuah an si lai, i Social Media le Internet i pehtlaihnak an ngeihmi vialte zong zoh chih a si lai.
Hi kong Trump nih a chim lio ah ralzam lak rih lo ding ram an um kong a chimmi ruang ah Muslim ram pawl nih mawhchiat le sawisel a ton pinah USA le ram dangdang ah "Muslim zong minung" ti le "USA hi muslim zong nih kan dawt ve ko." tibantuk lung langhnak an tuah.
Obama nih ralzam 110000 lak ding in White House a um lio ah a rak cohlan cangmi a si, i tu kum September tiang phaisa-kum (budget?) chung ca a rak si. Trump nih ralzam lak a phih chung caah lak an si lo. Cu pinah Trump nih 53000 lawng lak ding in a rak tthumh i 2018 phaisa-kum caah 45000 lawng (a tthumh hoi) lak a timh.
Obama chiahtakmi (ro) HealthCare hloh le hrawh aa zuam tuk i Ralzam kong hi cu tlawmpal a ngaihthiam ti khawi a si.
Kan hnu i ka rak ttial cang bantuk in USA le EU, nitlak ram timi pawl nih ralzam, phundang in chim ahcun Muslim pawl hi lak an duh lo chin lengmang. Sweden zong nih a ralaimi kum in cun Asylum le ralzam a tlawm khawh chung tlawm in kan lak cang lai, a ti (Trump cu an uar lo ngai nain America First cu i cawncio a duhmi an rak um rua.). Norway zong nih hlannak in hardeuh in Asylum sokmi le ralzam phantharmi kan chiah hna lai, a ti. Norway ah Asylum an zok ngam ti lo, zatuak zaceo nak tlawm lo a zor.
USA nih ralzam lak lo ding asiloah tu hnu ni 90 a hngahtermi hna hi an ram min cu a chim lo nain lak dingmi pawl kha an umnak ah ttha tein khontrol le check hmasat ding ti cu a fiang.
 |
| Relchih: Tuluk Communist Party Tuanbia Ah Min Lianbik A Simi Xi Jinping nih Trump tukbakhur ah a van chem cang. |
Refugee-organization pawl nih an chimning ah phih chih a simi ram pawl hi Egypt, Iran, Iraq, Mali, North Korea, Somalia, South-Sudan, Sudan, Syria le Jemen an si.
(©NTB/NRK)
Comments
Post a Comment