Harry Kane nih Tottenham le England caah goal a sut thluahmah i nihin bawlung Vawlei ah a min a linsabik ah a hong cang. Real Madrid nih an duhnak an thup kho ve lo. Atu hi zeitindah kan cawk lai i zeitikahdah cawk khawh a si lai, ti an bawh ko.
Nai FIFA nih C. Ronaldo cu Best Player ah a thim nain Kane kong tu ceih a tamdeuh.
Real Madrid le Tottenham hi an pehtlaihnak a ttha ngai i Luka Modric zong an rak cawk hna. Cun Tottenham tuanbia ah man tambik in zuarmi Gareth Bale zong Real Madrid nih cawkmi a si. Real Madrid president Florentino Perez nih Kane hi a man dintuai lai lo ti a hngalh ko.
FIFA awards peknak hmun ah Perez nih "Kane cu a thiam taktak tiah ka ruahmi a si pinah a no tuk rih i caan tampi a ngei." tiah a chim.
Harry Kane zong mah ni ah cun Press/media a ton ve hna, i hmailei ah zeidah a duh timi thup lo tein a phuan.
"A thimbik min cazin ah itel ka duh ve. Ka caah cun ni kum nakin tu kum tthadeuh in chuih khawh hi a si. Messi le Ronaldo nih kan zapi cah ri an kan rin piak. Anmah pahnih tluk khawh hi cu a har tuk lai." tiah FIFA-TV ah Harry Kane nih a rak chim.
Florentino Perez nih a zumhnak ah Tottenham ngeitu David Levy nih Harry Kane kong hi 2017/18 bawlung kum a dih hlan ah cun ceih a duh lai lo ti a si. Cun a zumhnak ah Kane hi PSG nih Neymar an cawkmi nak tamdeuh an hauh te lai. Intervio tuahtu nih Levy he hi kong nan ceih cang maw tiah Perez cu a hal.
Perez nih, "Kan i ruah rih lo. Hei chawn ning law £250million a ti hnga." tiah a leh. "Modric le Bale kan cawk hna hnu in Tottenham he kan i pehtlaihnak a ttha ngaingai." tiah a bia a peh.
Real Madrid manager, FIFA best manager 2017 a simi Zidane zong nih Kane cu a tling ngaingaimi bawlungchuih thiam a si, tiah a thangtthat. Cun Benzema le a dang pakhat khat he thlen chih ding zong a lam pakhat an kawl. A va si khawh lo sual zong ah Market caah England mi pakhat paoh cu cawk an i tim.
Cc: EveningStandard
Comments
Post a Comment