Tu zarh chung ah USA President hlun George W. Bush le Barack Obama cu Party khat an si lo bantuk in politics ah an dirhmun zong aa khat lo nain nihin USA politics cu kaltak cangmi hlan chan ta a si i daite in kaltak ciami a si, tiah Trump min chim lo in nihin Trump nih a kalpimi politics cu lung khat tein an mawhchiat i an sawisel.
Trump president a si hnu in Obama hi daite in khua a sa. President a ttuan chung he pehtlai in cauk chuah an tim i cucu a buaipi. Voikhat hnih te a kam a pau hi cu an rampi caah a biapimi kong, mipem pawl, ngandam he aa pehtlaimi le khuacaan thlennak kong lawng ah a si.
- Nihin i kan hmuhmi politic cheukhat hi cu hnulei chit in kan kaltak diam cangmi an si tiah ka ruah. A luancia kum 50 a cuan tthanmi minung kong kan chim. Atu hi cu kum zabu 21. (21st century) a si, zabu 19. a si ti lo tiah nilini ah khan Obama nih a chim. Mah cu New Jersey i Election-meeting ah a si.
- Kan democracy caah ttih a nung cang, tiah Obama nih a chim chih, i cucu president Donald Trump politics a sawisel a si tiah fian a si.
George W. Bush zong Obama president a ttuan lio ah sawiselnak a tuah a um lo tiawk a rak si, daite in a rak um. Asinain amah party chung chuak President Trump politics hi a lungdong ngai rua, a thaw a hon i chuah ve.
– I ttihnak le nautatnak a karh tuk. Kan politics hi ttawn chom (conspiracy theories) le ronh chommi an hong lo chin lengmang. Nautatnak le cuar raang pawl hi a dang nakin minung an sideuh ti zumhnak cu kanmah American a kan fonh khomi a si lo, tiah Bush nih Trump cozah kong chim lo in a chim ve.
Barack Obama nih a chimmi chung ah Bush he aa lawhnak cu, "Thimnak tei na duh ruangah rammi tthencheunak na tuah a herh a si zong ah na tei hnu ah na hruai kho tthan ti hna lai lo. Na pum in na fonh kho tthan ti hna lai lo, a timi hi a si. Cu zong ah cun Trump min a chim lo.
A tang ah cabia aa peh!
 |
Daihnak President In Ral-president Ah Aa Thlengmi Obama |
George W. Bush biachimmi cu Trump president a si hnu in American politics lam a pial tiah a ruah caah a si lai tiah Experts nih an ruah ngai. New York ah a chim hi a si i USA democracy hi nautatnak le a diklomi phuahcawp le cuar thleidennak nih a tlaihhrem a ti.
- Ruahnak i alnak pawl hi i ralnak ah a chuak, hmuhning le pomning i khah lonak nih minung nih tuah lomi tuahnak a chuahter. Hi caan ahhin a kan tthentu nih a chuahpimi thazang hi a kan fonhtu thazang nakin a tthawngdeuh tiah kan ruah khawh men, tiah Bush nih a chim.
Bush nih hin USA Election ah Trump cu vote a rak pe lo, a pa zong nih a pe lo ti a si. Bush cu Iraq a tuk ruangah USA a lar lo ngaimi a rak si pinah USA president hna lakah uar lobik lei ah aa tel. Vote a pek duh lomi hi a nau Jeb Bush cu Trump nih a thlak ruang lawng cu a si lai lo tiah ruah a si.
Laimi tamdeuh nih cun Bush hi an uar ngawt!
Bush hi Trump i US luhnak a phihmi hna kong ah aa sum kho ti lo.
- A zalenmi Vawlei, chawlehnak le Vawleicung pehtlaihnak ah kan pil chin lengmang ti kan hmuh. Cun irunven tuknak (protectionism) nih sifahnak, Vawleipi remdaih lonak le pakhat le pakhat kar iralnak a chuahpi ti hi kan philh cang. I erhnak, innka khar khumhnak a chuak tthan. Kan himnak cu a langtlang i a ummi buainak le i lungrumhnak pawl nih hna a hnawh ti hi kan philh cang, tiah President hlun Bush nih a chim.
Tuluk Ramhun Xi Jinping nih cun innka kaudeuh in kan on lai tiah tutan Congress ah a chim.
Cc: Guardian, Aftenposten, NTB
Comments
Post a Comment