Champions League an chuih tthan cang lai, i tu zan aa tong ding Real Madrid le Tottenham kong hi a hnubik bawlung Vawlei ah ceihbik le a linsabik a si ve. Real nih Premier League hmai kal pakhat paoh cawk khawh ding aa tim tiah thawng a leng.
Tulio goal a sut kho ngaimi Harry Kane cu Daily Mirror ttialning ah Real Madrid nih £150 million in hmai kum World Cup dih in cawk ding ah an hal hna timi thawng pang nih tu zanlei Champions League an iton zoh a nuamhter khun khawh men.
Harry Kane cu Europe ah tulio te hi a ke chuah saling a si. Premier League zong ah kum hnih peh in goal tambik suttu a si i England nih an i zohthla tukmi a si. Asinain Tottenham nih £150 million cu a tlawm tuk an ti. A tlawmbik £200 million tello cun kan siang lo an ti, tiah The Times nih a ttial.
Relchih: Ferguson nih a zumhbikmi Club
Real Madrid nih cun pakhatnak ah Kane an duh. Tottenham nih thlah an sian lo i a vaivuanh sual a si ahcun Manchester United an mino Marcus Rashford hi pahnihnak thim ding ah an zohmi a si.
Arsenal le Mesut Ozil cu min thar ttial ding lungtlinnak an ngeih khawh rih lo caah Arsenal nih January ahhin zuar ding timhtuahnak an ngei ko tiah Daily Mirror nih cun a ttial. Manchester United he pehtlaihnak a ngei peng nain atu hi Inter nih lak te dawh in a um. Free in kalter nakin cun man tlawmte zong in zuar an duhdeuh.
Newcastle cu a ngeitu nih zuar a timh. Mah cu Fans caah thawngpang ttha tuk a si. A cawtu nih a tthadeuhmi Club ah a ser tthan lai tiah ruahchannak an ngei. 2007 ah a rak cawk i amah hlan a ngeitu leiba vialte a cham ruangah duhning in an tthawn lonak a si, ti a si.
Chelsea hi Premier League an tei tthan lai ti zumh an si lo nain Champions League ah cun Manchester United nakin an zumhdeuh ngai. Cup pakhat tel tei khawh nakding ah cun hmaikal pakhat cu an herh rih caah Alvaro Morata a chuih lo caan i hman ding hmaikal pakhat cawk aa tim tiah Telegraph nih a ttial.
Manchester United hruaitu nih Jose Mourinho a lung an tluanh kho rua lo, tu zarh ah khan kum saupi hi Club ah um kaa tim lo tiah PSG puai an zohnak i bia an rak halmi ah a chim. 2019 tiang hi United he min a thut, i a kum chap ding an duh ko nain Mourinho cu phaisa a duh tuk i si ttheo lai, a hlawh an sanh lawng ah um aa tim tiah Guardian nih a ttial ve. Phaisa a ngei tukmi PSG ah manager ttuan ding a lung in a um tiah medias nih an purhdah.
Mauricio Pochettino hi Mourinho he an idang ngai. Tottenham ah tu hnu kum 15 um ding in min thut aa tim. Hlawh kong ah a buai lo. Lodon Evening Standard nih a ttialning ah Tottenham nih tu hnu kum 15 chung um chap ding an duh bantuk in amah zong aa lawm ngaingai ti a si.
PSG-hmaikal Edinson Cavani hi Neymar hi an i sik hnu in PSG ah aa nuam ti lo ti a si, i Manchester City ah a kal lai tiah bia a chuak.
Barcelona nih Chelsea kehlei hnukham Marcos Alonso (k. 26) cu an duh ngaingai tiah Daily Mail nih a ttial. Jordi Alba a chawng kho ding caan sau caah ruat in Alonso hi an thimmi a si.
Foto: Daily Mirror
Comments
Post a Comment