Premier League an thawk kum 1992 thawk in Liverpool cu a thiambik pakhatnak a si bal lo, voithum lawng pahnihnak a si bal. Manchester United nih voi hleithum pakhatnak an lak cang. Asinain United nih English League (PL) lak tam ah Liverpool a tei cu naite lawng a si. Chim duhmi cu Liverpool cu England ah min lian pakhat a rak si.
Tuni, zarhteni Oct. 14, ah Football tuanbia lawng ah siloin chawlehnak siseh zeidang zong in aa zuamcawh bikmi khua le Club cu an chuih lai. Mi tampi nih cun tu kum avoi khatnak Premier League puai an ti phah.
Liverpool le Klopp caah thil fawi a si lai lo.
Phundang in chim ahcun United tei ding cu a si kho lo. An tuanbia ruangah Liverpool cu mi tampi nih an upat hna, i ruahchannak lianpi an ngei. Asinain 2004 in Liverpool manager a rak ttuanmi Rafa Benitez nih "Liverpool nih Premier League tei ding ahcun khuaruahhar thil a can a hau." a ti. Minthang club pakhat caah theih nuam lo ngai a si nain Rafa a palh lo tiah mi tampi nih an cohlan. Leicester City bantuk kha cu phiang kum ah a chuakmi si dawh a si.
Phaisa aw a thang tuk.
"A ngaingai ti ahcun pakhatnak a lami Club chung in 90% cu phaisa a hmang khobik le a ngeibik an si." tiah Rafa nih chim. Nihin bawlung chawdawr kan zoh tikah a fiangmi cu kan rak ruahning nakin phaisa hi a rak biapi.
Liverpool nih pakhatnak an lak ti lonak hi phaisa ruang ah tampi aa tel. Rafa Benitez nih a tlai hnu in Europe ah phai lut tambik pariatnak lawng an rak si i United le Chelsea nih an rak tei. Rafa chan kha zoh tthan tikah United asilole Chelsea nih pakhatnak an rak lak. Rafa a kal hnu zong ah phaisa lut a karh lo caah Champions League hmanh an chuih ti lonak a hong sau cang.
Brendan Rodgers nih a hruai hna kum 2014 kha pakhatnak an rak lak luklak ve, asinain mirum nih a cawk tharmi Manchester City nih an rak lak kanh hna.
Zeiruangahdah Liverpool nih phaisa a ngeih lo?
FourFourTwo nih a ttialning ah Liverpool FC nih Stadium thar an sa kho lo, cun ni kum lawng ah an Stadium cu minung 45 000 tlum in 54 000 tlum ah an kauh khawh. An tuanbia a lianh tluk in an thilri an zuar thiam lo. Cu tikah Manager pawl nih teinak an hmuhpi khawh lo a si ahcun Sport-director pawl le Admin. mawh tampi a si cang.
Liverpool hi ttanhtu (fan) an karh lo ti a si. United cu kan hnu kum kua chung ah United caah phaisa thawh in Fan a simi 30 000 hrawng an i chap ti a si. Cu a si ruang ah si lai, 2015/16 kum ah United nih £100 million leng an phaisa lut an ngeih ah Liverpool cu £50 million hrawng lawng a rak lut.
Manchester United cu Sponsor thim cawk lo an ngei. Chelsea? 2003 in Russia mirum Roman nih a cawk. City tiah le zinan mirum nih a cawk i Premier league teitu cu anmah hi an si cang.
Phaisa tam ngeih cu mi thiam cawk khawh a si. Bawlungchuih thiam tamdeuh cawk khawh paoh ah a phichuak cu a tthadeuh ve ko. 2010 hnu in an phaisa hman zoh tikah phaisa a hmang khodeuhmi Club nih pakhatnak an i cuh khawh bik ko.
Transfermarkt.com ningah an phaisa hman hi Liverpool cu tamtuk in an thlau. 2010 hnu mi cawknak an phaisa hmanmi:
City: 859,2 millione pund
United: 621,9 millione pund
Chelsea: 296,8 millione pund
Liverpool: 225,3 millione pund
United, City le Chelsea nih cun hlawh sangpi an pek khawh fawn. Cu tikah puitling bawlungchuih thiam cia a simi Paris Saint-Germain, Juventus, Barcelona, Bayern le Real Madrid a chuihmi an cawknak hna hi a si.
Liverpool nih an cawkmi pawl hi a naibik Klopp chan zoh usih law, Southampton, RB Leipzig, Roma, Arsenal, Newcastle, Hull City, Schalke 04, Mainz 05 le FC Augsburg i a chuihmi an si. Klopp an cawkka ah ruahchannak a rak sang tuk nain a mi cawk khawhmi ri a ngeih tikah cun Premir League tei ding cu Rafa chim bang a fawi hnga lo.
Nihin an chuih ding hi Liverpool inntek an si lai, i United nih an tei hrimhrim hna lai ti cu ka chim kho lo nain Mane aa khawng i a chuih kho lai lo. Hnukham a ttha taktak mi a ngei hna lo i Pogba a chuih lo buin United hmaikal hi Liverpool nih an kham kho hna lai ka zum lo.
DErby an timi pawl nakin a zoh nuamdeuh lai ti a fiang. Pelh lo tein rak zoh ve cio u.
Photo: Telegraph
Comments
Post a Comment