Nihin hi November 22, 1963 ah Dallas, Texas i an rak thahmi US president John F. Kennedy thihnak kong he aa pehtlaimi ca, hmanthlak le hlathlainak vialte zapi theih ding in chuah duh ahcun a caan a si. Mah cucu president Trump nawl a si lai, i amah nih cun Oct. 25. ah phozar ding a si ko tiah Twitter ah a ttial.
The National Archives (USA) nih an chuah bal lomi File 3000 leng cu chuah ding in an timhtuah dih cang. Hika hin Files cu an thlah lai. Cu hlan ah File 30 000 hi zapi nih rel khawh ding in an rak chuah.
Kum 54 a hong rau cang nain President JFK thahnak kong ah biafiang taktak a chuak kho lo. Mi thattu a si tiah an tlaih khawhmi Lee Harvey Oswald cu an tlaih a thaizing November 24, 1963 palek thonginn i a um lio ah NightClub ngeitu Jack Ruby nih a rak thah caah Warren Commission (JFK thahnak hlathlaitu phu) nih amah lawng hi kong ah a sual (mi nih an bawm lo) tiah an zumhmi kong hi cohlan a rak har ngaingai. JFK hi Oswald lawng nih a that kho lai lo, tiah ruah a si.
JFK thahnak kong cu caan sau nawn a rak dai nain 1991 ah "JFK" timi film/document pakhat cu Oliver Stone nih a rak tuah i "Zeidah a rak cang taktak mi a si?" tiah mi tampi lung a hun hlauh tthan hna. Cucaah Washington Post nih cun "JFK" film cu tuni i JFK File pawl chuah dih ding timi kong ah a thangtthat ngaingai.
Medias le hi kong a lung ummi pawl nih zei ko dah thuhmi a rak si, zei thil thar dah phuan a si lai, ti ah an i hngah hlang ngaingai.
Cold War lio a rak si caah le Mafia an rak tthawn tuk lio a si caah hin Oswald lawng nih a thah lai ti cu an zum kho lo. FBI le CIA nih JFK a thah a si hlan tein Oswald (Russia zong ah saupi a um.) hi an lunghrinhnak a rak sau ngai cang, i amah zong nih a hawikom sinah JFK thah a duh kong hi a rak chim len tiah Guardian nih a ttial. JFK a thah lai ah ni ruk rau in Mexico a rak tlawn zong CIA nih an rak theih ko nain JFK thahnak kong he pehtlai in a cawlcanghnak an rak thei lo.
Cuba he zeitluk naih in pehtlaihnak a ngeih timi hngalh a si lo nain Cold War lio a rak si tikah Russia nih Atom-rocket tam nawn Cuba ah a chiah ruangah American a thin hung i Cuba tuk le lak ding in Cuba-tapung/hriamtlai pawl a rak bawmh hna nain an tlamtlinh lo. Cu ruang ah Cuba lehrulhnak zong a si kho ti a si.
 |
| Relchih: Kum 88 Chung Ah CUBA Vawlei A Lam Hmasabik USA President |
Kum 54 a rau cang nain Trump nih a theihmi JFK thahnak Information vialte a phuan dih a si ahcun ruahnak a phunphun a chuak tthan lai ti a ruatmi an um bantuk in Trump nih ka phuan lai a timi a phuan tthan lo a si ahcun JFK thahnak kong ah CIA/FBI maw a silo ah pakhatkhat zumh raih lo an si chinchin lai, cun zeidah an thuh timi lunghrinhnak a thar in a chuak lai tiah John F. Kennedy kong cauk a ttial bal vemi Philip Shenon nih Boston.com ah a chim.
JFK thahnak kong ah Vice-president Lyndon B. Johnson hi zumh lomi, amah zong a thattu ah aa tel lai tiah ruahmi (conspiracy-theories) chung ah aa tel.
Tuni i Trump nih a chuah/phuanter hna a si ahcun CIA le FBI nih Oswald kong an rak theih ngai ko nain Secret Service pawl an rak chimh hna lo ruangah zeidah a cang, timi le CIA le FBI nih an rak tawlrelning zeimaw aa tel lai tiah zumh a si.
News Agency/media a si lo caah hika blog cun hi vialte information a si. Biaruahnak le nan fb ah Share ve te u tiah kan sawm hna.
Comments
Post a Comment