Donald Trump nih North Korea kong i hriamnam hman ding aa timhtuah kong cu a fiang chin lengmang, i a hnubik South Korea he raltuk cawn le timhlamhnak an ngeihmi hna kha cu a kah cang lai hlah maw ti awk in an i redi. Cun Kim thluak le thinlung ah thah khawh a sinak taktak zong a erh in aa erh. Amah a pu le a upa nunnak zong a lak hna i a nawl ngai lomi General zeimawzah a thah ve ko hna. Cu bantuk in amah zong thah ding cazin ah a min um kha Trump nih a theihter lengmang cang.
"Kan hawikom runven an herh ko a si ahcun kan runven hna lai i thim ding kan ngeih lo ahcun North Korea ram ningpi in hrawh dih zong a hau te ko lai."
USAs president, Donald Trump, UNGA this year!
Saddam Hussein kha 2003 i USA-ralkap nih an rak luh hlan ah a kuttang rianttuantu hi ni khat pakhat in a rak thlen hna i a ei dingmi rawl cu a teptu an rak um. A riahnak ding hmun ttha tein a mizumh pawl nih an zoh piak ta hnu ah a riak ngammi a rak si. Josef Stalin, Soviet ralkap uknak in a rak uktu zong kha thuhnak tamtuk a rak ngei i ruah lopi in aa thuhnak cun a hong chuak tawn ti a si. Cu bantuk in Kim Jong-un zong a si ve. Riahnak hmun tampi a ngei, i thuhnak zong ah a hman hna.
Kim Thah Hi A Fawi Lai Lo
North Korea i fingtlang a tamdeuhnak hmun paoh cu Kim caah chiah a si i lungkua le Lei tang hmun pawl in a khat i Ralkap umnak caah hmun 6000 in 8000 kar a um i cuka cu Kim nih ithuhnak ah a hman khawh, asiloah a riah tawnnak si dawh a si. Kim nih tuah a timhmi (plan) pawl hi tuandeuh in ceih cang a si zong ah a caan phak in a thlen tthan lengmang. Aruang cu himnak caah a si ko. North-Korea hngaltu (experts) nih Kim a congtu pawl an rianttuan a ttha tuk an ti. Mah cu a si caah USA siseh South Korea ralkap nih thah an duh zong ah fawite in an tuah kho lai lo, ti a si.
North Korea congtu hi a lungthin a tthawng i a fimkhur taktakmi an si. Ttihphannak in a khatmi an si hlei ah an fimkhur tuk, a ruang cu Kim thah a duhmi an um caah a si ko. Asinain Vawleipi hi Atom-ral in a tlirhkhonhtu pa, Trump lila nih "the Rocket man" a timi Kim Jong-un thah ding timi cu lungfim khuaruat thil a si hnga maw?
A thli in Kim thah timi cu hlawh a tlin zong tlin lo zongah ttih a nung tukmi a si lai. Cu hmanh ah hlawh a tlin lo sual a si ahcun Kim Jong-un thinhunnak mei a hlio i aa hlio lai. Thinphannak zong a dai kho ti lai lo. Cu tikah a ngeihmi hriamnam le bomb/atom pinah Chemical-hriam tiang hmang in lehrulhnak tuah lo in a um lai maw?
A tang ah cabia aa peh
 |
Relchih: USA Le Vawleipi Nih N. Korea An Ttihnak A Ruang |
Donald Trump nih Kim Jong-un nunnak a lak khawh ti usih, nain cucu daihnak in a dih lai ti chim khawh a si hlei lo. Kim an thah hnu ahhin North Korea ah a cang khomi pakhat cu, Kim te chung uknak/pennak hi a tlu hlei lai lo. Aruang cu Kim a farnu Kim Yo-jong nih a pu, pa le a tta ro pehzulh ding redi a si. A farnu nih uknak a tlaih dingmi belte an ralkap pawl nih uknak an chuh khawh caah thil harngai cu a si lai. An chuh zong chuh lo zong ah North Korea ah USA le South Korea nih an duhmi uknak/democracy maw thlennak cu a chuak lai lo tiah North Korea hngaltu nih an chim.
Cun Kim Jong-un thah ding an i zuammi a phi chuak cu Kim nih Automatic in Chemical-khuvai a thlah khawh i USA lehrulhnak ah Atom zong a puah khawhmi a si. Mah cu nih cun North le South Korea, China le Japan tel in minung million tamtuk a thah khawh hna lai. Zei a si zongah hi ral ruangah North Korea minung million 20 hrawng chung i a nungmi a tamdeuh cu ralzam ah an cang lai i Tuluk, South Korea le Russia ramri ah zeitluk indah an har lai timi ruah ngam a si lo.
Kan hnu cabia ah Kim Jong-un nih a nunnak le a ram runvennak caah Atom le rocket aa serhmi a si tiah kan rak ttial. Mi tampi nih Kim hi a fimkhur taktak mi hruaitu a si tiah an pom. Atom bomb le rocket pinah Chemical-hriam aa ngeih cang kong caah Vawleipi a him le ral a thawh lo nakding a si ning tein cohlan piak i chawnh biak hi a tthabik hnga lo maw?
Foto: Truefireradio
---
A donghnak bikah Media/information le journalist rian hi mi tthihpheih a si lo. A reltu nih biathlehnak nan tuah lai.
Comments
Post a Comment