Tulio Vawleicung nih a tonmi buainak (conflicts) pawl he pehtlai in ramkip hruaitu hna an lungre a thei, UN ah an ceih. A biapi in North Korea kong hi an buaipi nain Myanmar i Rohingya kong ah Myanmar cozah lawng silo in ramkip hruaitu an lungre a thei. Cu hna lakah UN i Myanmar le Suu Kyi lei a ttangdeuh tiah an ruahmi Russia ramhun Vladimir Putin zong a lungre thei ngaingai lai.
A ruang cu pakhatnak ah Russia i Myanmar Embassy ah fakpi in Rohingya caah a au-khuangmi an hong um ruangah le Putin nih a herh ngaimi Chechnya Republic ramhun Ramzan Kadyrov nih Russia nih Myanmar cozah nih Rohingya an tuahto hna ning hi a mawhchiat lo le a hrial lawlaw lo ahcun Myanmar cung i a ngeihmi Politics hi kan cohlang kho lo tiah an khualipi Grozny i Rohingya a daw ngai bang a aumi pawl sinah a chim caah a si.
Russia nih Myanmar ah ralkap thilri a phunphun a zuar pinah nichuah-thlanglei Asia ram pawl he remdaih aa zuam tuk lio a si. Cun Myanmar nih Islam-ralhrang donak ding caah a bawmh hna ti a si.
Relchih: Syria Kong Russia le USA dirhmun
Chechnya ram cu Islam biaknak a biami an si ve i Soviet-union (hlan russia) in an chuah hnu 1990 hrawng in Independent cawlcanghnak cu Radial Islam (islam ttanhtuk) lei ah an i mer i ralhrang zong an rak chuak. Mah cu a si caah Russia le Putin nih an thinhunter an duh lo. Chechnya ramhun Ramzan hi Putin nih a tlaih khawh ngaimi a si caah Ramzan nih Chechnya a uk lo a si ahcun Russia caah ttih a nung kho. Islam-ralhrang pawl nih Russia ah ralhrang an tuah lai a phang.
UN i Myanmar kong an ceih lio ah Myanmar kong cathluan chuahpimi pakhat rel an timh i Russia nih rel lo ding in a kham ti a si.
Pahnihnak cu North Korea kong a si. Hriamnam le ralkap in tlirhkhonh hi cu Vawleipi caah ttih a nung tukmi a si tiah ralrinnak a chim. Thil ttha a chuahpi lai lo a ti. Cu pinah chawleh siseh chawnhbiak tibantuk pehtlaihnak vialte kan phih a si ahcun a zual chinchin lai. Kim Jong-un nih aa fianmi cu an ram hi Atom-hriamnam aa hngatchan timi hi a si. Iraq le Saddam Hussein kha nitlak lei ram pawl nih zeitindah an rak tuah timi kan theih cio bantuk in North Korea zong aa fiang tuk tiah Putin nih a chim.
UN Security Council nih cawn-nikhatni ah North Korea kong an ceih lio ah USA nih pehtlaihnak vialte chah dih ding le Tuluk siseh North Korea he aa pehtlaimi paoh kan ral an si lai timi bia cu Putin hnasen a tla lo. Asinain North Korea nih atu le tu hriamnam a hniksak hi cu a lungre thei tuk ve.
Kim Jong-un nih cun a rammi an rawlttaam i ram an ttam zong ah a zei poi lai lo. Saddam kha hriamnam a rak ser taktak lo nain amah lawng si loin a chungkhat sahlawh pawl zong an rak thah dih hna tiah Putin nih a chim. Mah hi Kim Jong-un nih a ttih lo kho lo.
North Korea hi chawnhbiak khawh (diplomatic) lawng ah hi er-taunak le thinphannak hna cu a dai kho cem lai tiah Putin nih a ruah ve. Raltuk le meithal puah a kut nih a hiar tukmi pawl a van sik hna.
Relchih: Putin vs Obama
Cc: NRK, TV2
Comments
Post a Comment