Bawlung chawdawr an khar cang nain bia chuakvai tete an um pah rih. January i dawr an on tthan tik caah dai lo in rian an ttuan rih hna.
2018 World Cup cu Russia ah an tuah lai i atu hi World Cup chuih khawh ding ram kip an i zuam lio a si. Belgium hi a Russia tel lo in a hmasabik World Cup ah aa tel ding a fiangmi an si. Argentina le Chile hi ah pakhat paoh cu World Cup ah i tel dawh an si lo. An ram hnih zong in itel lo khawh an si. Tu hnu voi hnih veve an chuih lai i Chile hi Brasil he a donghnak ah iton ding an si caah ruahchannak an ngei tuk lai lo.
England cu an group ah a tthawngbik an si. Asinain Tottenham caah thawng chia ngai a simi cu Harry Kane nih Wembley Stadium i goal a sut khawh lomi hi a si. Malta i an chuih ah Kane he goal 2 a sut nain zahan i Wembley i Slovekia he an chuih ah minute 90 chung an chuih nain goal a sut lo.
Chelsea ngeitu nih Deadline Day i Ross Barkley le an manager Conte an tonter hna lo ruangah Barkley a lung aa rak i leet. An tonter hna lonak a ruang hi Alex Xlade-Chamberlain he an iton lio ah a hlawhtlin lo caah a si, tiah The Times nih a ttial. Manager he an i chawnh lo caah khawika (position) ah ka chuih lai timi fian lo bu in Chelsea ah minthut cu a rak ngamh deuh lo ruangah Barkley cu Everton ah Rooney he an chuih tti rih lai.
Barcelona nih Paulo Dybala hi nai bawlung chawdawr an on chung ah khan voi hnih tiang laak khawhnak caan an rak ngei nain an rak la lo, tiah AS nih a ttial. Juventus nih Euro 120million in kan sian an rak ti nain Barcelona nih Coutinho laak khawh ding lawng an rak i zuam. January ah Coutinho laak khawh ding an i tim tthan.
Zidane a uar tuktu Eden Hazard nih Real Madrid ah chuih a duh kong a chim tiah Mirror nih a ttial. Caan saupi hnu ah a ke a hon ttha i an ram ca zong in a chuih kho cang. Chelsea nih a dam lai an i ngaih tukmi a si, tu zarh innrin-ni ah a chuih kho cang lai dah.
Manchester United caah thawngpang ttha pakhat cu Atletico Madrid nih an hmaikal Antoine Griezmann cu Euro 200million an rak hauh nain atu cu 100m ah an ttum UK le Spain media nih an ttial. Griezmann hi United nih cawk an duhmi a si nain Atletico Madrid cu mi cawk an sianh hna lo caah an rak zuar kho lo. Nihin bawlung chawdawr ruah ahcun United caah a kum no rihmi Griezmann man hi a tam lai lo. January in cun cawk khawh a si te ttheo lai.
Nai Deadline-day ah khan United nih Leicester City alaikal Riyad Mahrez an cawk lai tiah an rak ruah cio nain an caw lo. Mourinho nih cawk ding ah a ruat lo ti a si.
Foto: the sun
Comments
Post a Comment