Champions League 2017/18 cu thaizing 9/12 in an thawk cang lai. Cu he pehtlai in Group A chung in Basel he aa tong ding Manchester United manager cu the Times nih interview a tuah i manager na ttuan chung i training na pekmi hna lakah a tthabik na timi hodah a si tiah an hal.
Jose Mourinho cu minthang a si ve bantuk in Bawlung chuih thiambik timi Cristiano Ronaldo, Zlatan Ibrahimovic, Samuel Eto'o, Didier Drogba, Andrej Sjevtsjenko le Kaká te hna training a pek bal hna. Asinain hi hna chung in pakhat hmanh a tthabik an si lo.
The Times sinah a chimmi cu naite i a cawk tharmi Nemanja Matic hi a si tiah Independent nih a ttial chin.
"Nemanja Matic hi manager ka ttuan chung ah Nemanja Matic nakin tthadeuh in ka ttuan tti mi an um lo tiah ka chim khawh lai." tiah Matic kong cu Mourinho nih tihin a chim:
"Mi puitling (professional) a sinak ka cungah a langhter khawh. Chelsea le Southampton an chuih lio (oct. 2015) ah mi thlengtu ah ka chiah i minute 45 hnu ah ka luhter. Asinain minute 75 ah ka chuah tthan. A ngaih rak chia tuk. Keimah zong ka ngaihchia. A ruang cu a chuihtu le keimah caah a nuam lo tukmi a si. Mah bantuk hi Manager ka ttuan chung ah voihnih ka tuah cang." tiah Mourinho nih a chim.
Mah cu a thaizing ah Matic cu Mourinho sinah a va kal i bia a va ruah.
"Zahan kha ka lung a tling lo. Asinain keimah palh a si, nangmah palh cu a si lo. Mi ka chaan hna nain thlen tthan ding ah ka rak i tlaak caah a si." tiah Mourinho cu a va chawnh tikah Mourinho nih a philh lomi ah a cang.
Mourinho cu Chelsea nih an dawi hnu zong ah Matic hi pehtlaihnak a tuah lengmang. Tthaal bawlung chawdawr an on lio ah man fak ngai in a rak cawk tthan ve. Atu tiang Premier League i United caah a biapi ngaimi ah a hon i chuah.
Champions League cu Group A, B, C, D an chuih lai. Kip ah a tangmi Group li an chuih ve lai.
Comments
Post a Comment