Messi Thar Si Aa Timmi Neymar

Lyon he an chuih lio ah Penalty chuih aa cuhmi Neymar le Cavani. Foto: Christophe Simon

Vawleicung bawlung chuihthiam lakah man tambik in cawkmi si cu hmai a hngal ko lai. Cu bantuk in uanthlarnak le duhfahnak zong a tam chin khomi a si. Club pakhat nih minthang asiloah man tambik in an cawk tharmi pawl hi an Club ah nawlngeihnak an duh lengmang tawn i an chuih ttimi pawl he i er-nak tete a um tawn. 

Atu ah Neymar cu PSG nih €222 million in an cawk i an Club ah amah hlan i a rak ummi Cavani he an i rem lo. Media pawl nih an chimnak ah Neymar nih Cavani hi zuar ding in an Club hruaitu a chimh hna.

Mah bantuk hi Club dang zong ah a um tawn. Abiana ah Messi hi Barcelona ah cun President le Siangpahrang bantuk in khua a sami a si i Barcelona Admin. chung i hruaitu pakhat nih a sawisel ruangte ah a rian phuah a si. Cu pinah Messi nih Zlatan zuar ding zong a rak fial hna i a bia al ngam lo ah Pep Guardiola nih a rak zuar tak. Neymar PSG a kalnak zong hi Barcelona ah cun Messi a lal, amah hi pakhatnak ah chiah a si caah a si bik. 

Relchih: Ferguson nih a zumhbikmi Club

Messi lawng a si lo, Ronaldo zong Real Madrid ah amah tluk in goal a sut khomi, goal sut a dawntu a simi cu a rem hna lo. Higuian he an rak i rem lo caah Higuain cu an rak zuar.

L'Equipe a phaw cuangmi.

Cavani hi Zlatan PSG ah a um lio ah khan Zlata nan zuar lo ahcun keimah hi ka zuar u tiah a rak chim bal ve ti a si. Zlatan a um ti lo hnu ah amah hi papek in pakhatnak ah an chiah. Asinain atu hi PSG nih man tampi in an cawkmi Neymar le Cavani cu Penalty chuih an i cuh. Cavani nih a kian duh ve lo. 

Nai Lyon he an chuih ah Penalty an ngah i Cavani le Neymar nih chuih an i cuh, an Captain Thiago Silva nih a tlaangtlak hna. Cu hnu minute pahra hrawng ah Penalty an hmuh tthan i an i cuh tthan. 

Neymar hi Messi thlapale si a duh ti lo caah le Vawleicung minthangbik si a duh ve caah PSG ah aa tthial hi a si i Goal tampi a ngeih khawhnak ding caah cun aa zuam tuk vemi a si. 

France an thawngca lianbik nih Cavani le Neymar an i rem lo tiah an ttialmi cu Cavani nih a dik lomi a si tiah a chim. 

"Mah bantuk hi phuah chom an si nain a ruang ka hngal lo. A taktak tiah cun mah bantuk cu a si tawnmi a si ko." tiah Sport ah a chim.