Manchester United nih Ferguson chawngtu ding ah Wenger an rak duh bik. Mah cu 2001 i Alex Ferguson nih kaa din lai a ti lio ah United a ngeitu le hruaitu a rak simi Martin Edwards nih a chimmi a si.
"Ferguson nih ruah lopi in kaa din lai tiah biakhiahnak a tuah cu kan ar ko. Cohlan kan rak i harh ngai. Asinain a lungtak a si ti kan theih in cun Arsenal manager Arsene Wenger hi laak ding in pakhatnak bikah kan chiah. A ruang cu 1996 in Arsenal ah a ra i hlawhtlinnak a hmuhpi hna. A kum khatnak ah Premier League le FA a teipi colh hna. Caan karlak ah harnak a ton (a vaivuan pah) nain Alex a chawng ding ah cun amah hi a tthabik lai tiah biakhiahnak kan rak ngei." tiah Edwards nih a chim.
Asinain ruah lopi in dinh a rak i timmi Ferguson cu a lung aa thleng tthan i 2013 tiang United a hruai tthan. Premier League 13, le Champions League 2 a tei.
Edwards nih a chimnak ah Wenger hi Arsenal ah zumhtlak tein a ummi a si. Wenger nih Arsenal nih a dirpimi ruahnak (value) hi a duh, cu pinah Arsenal biatak tein a tthawn tthannak ding i a thawktu a si ve caah a dihdongh tiang zumhtlak tein hi Club cu pakhatnak ah a chiah ruang ah United rian a rak lak lomi a si kong Telegraph ah Wenger nih a chim.
Manchester United rian cu duh cio a si ko. Nain Arsenal ah kaa nuam maw? Kai nuam. tiah Wenger nih a chim.
Bawlung biathli ngai rih hna usih:
Frank de Boers cu Premier League an thawk in voili tiang Crystal Palace a sunghpi hna caah rian phuah a si. Amah hi Wenger rian chawng ding ah an rak ruah balmi a si. Atu cu Crystal Palace puai li lawng a hruai manh hna hnu ah amah rian a chawngtu ding an kawl a hau cang i England manager hlun Roy Hodgson nih a chawn lai tiah an zumhnak Mirror nih a ttial.
Sport News
Manchester United Antoine Griezmann (kum26) hi an duh peng rih tiah Daily Star nih a ttial i No.7 zong amah caah an chiah ko ti a si. Manchester Evening News nih a ttialnak ah Bale he hmai kum ah laak an timh hna.
Diego Costa hi Atletico Madrid lawng ah kal a duh. A chungle zong Madrid ah an i tthial cang tiah Football365 nih a ttial. Costa cu Chelsea ta a si rih ko, nain an chuihter duh lo. January ahhin an zuar te lai tiah ruah a si.
Mirror nih a ttialnak ah Pep Guardiola cu a Captain Vincent Kompany cungah a thinghung tuk. A ke a khawn bu in Belgium caah minute 90 (worldcup qualify) a chuih ruangah a si. Club nakin a ram pakhatnak a chiah caah Kompany a hmailei kong hi a thar in ruah ding in biatung a dirh.
Manchester City nih 5-0? in Liverpool an tei hna zanlei ah Thierry Henry nih Arsenal in aa tthial tharmi Oxlade-Chambarlain cu fak taktak in a sawisel.
Chambarlain nih Liverpool-website ah Klopp hi manager ttha a si i hlannak in a thiamdeuhmi ka si khawhnak ding a ka bawmh khawh lai tiah ka ruah. Cun Liverpool ihawikomhnak le dawtnak a um tiah a chim. Arsenal ah teh cu bantuk cu a um lo maw? tiah Henry nih a chim.
"A ngakchiat lio tein ka ngiat lengmangmi a si. Atu tiang hi zeibantuk dah a thiammi a si ti ka hngal rih lo." tiah Henry nih mithmai zoh lo tein a chim.
Relchih: Bawlung Tuanbia Thar An Tial
Comments
Post a Comment