Germany nih Angela Merkel cu tuni an ram thimnak ah a tei a si ahcun (atu tiang kum dang nakin a tthawng lo nain teitu a si rih.) a ralaimi kum li chung ram a hruai tthan lai. Tulio Europe le Vawleipi nih a ton cuahmahmi er-tauanak, i ngiarnak, i siknak, buainak le khuacaan kong ah a biapi tukmi a si bantuk in an ram thimnak ah teinak a hmuh tthan ahcun lunglawmh ngai awk a si hnga.
 |
| 2005 in Merkel he rian a rak ttuan ttimi ram hruaitu (G7)pawl. foto: Rueters/nrk |
Angela Merkel (Christian Democratic Union) hi 2005 i Chancellor of Germany ah an thim thawk in French President pali le British Prime Minister pali he Europe ah rian a ttuan tti bal. Cun USA ramhun pathum he zong a ttuan tti i Russia president pahnih le Tuluk President pahnih he aa ttuan tti cang. Mah hi ruangah hin Angela Merkel cu a biapi tukmi politician pakhat a si kan ti khawh.
A rak ttuan ttimi president le prime minister hna cu: Bush, Tony Blair, Chirac, Obama, Brown, Cameron, Hollande, Sarckozy, Trump, May le Macron hna hi an si i Putin, Medvedev (russia) le Hu le Xi (tuluk) hna an si. United Nations GS a simi Annan, Ban le Gutterres he zong an ttuan tti cang.
A cung i chimmi mi hna lakah mi tampi (naite thim thar mi dah ti lo.) cu an tlau nain a luancia kum 12 i Europe hruaitu a simi Angela Merkel cu a sungkhaan duh lo in a ralaimi kum li chung Europe le Vawleipi caah a dir tthan lai.
 |
| Ukraine kong ah Merkel nih Putin a hip khawh ngaingai. Forbes nih huham lianbik ah a thim hna. Foto: Nrk |
Angela Merkel cu Leicung ah nawl a ngeibik nu a si timi al khawh a si lo. Mi tampi nih Europe a hruaitu le a hruai khomi cu amah hi a si ko tiah an pom khawh. Forbes-mekazin nih Putin khawh in Merkel hi Leicung nawl a ngeibik a si tiah voihnih tiang a rak thim.
American nih Donald Trump an thim khawh tlawmpal ah Vawleicung thawngca minthang tampi nih "The leader of Free World" tiah Merkel cu an thangtthat. Cheukhat nih "Chancellor of the World" an ti.
 |
| 2015 G7 meeting ah Merkel le Obama bia an i ruah lio. Foto: Pool/rueters/nrk |
Barack Obama nih "Merkel hi President ka ttuan chung i ram dang hruaitu hna lakah naihniambik in rian ka ttuan tti khawhmi a si." tiah a rak chim. White House a chuah taak hlan a hnubik i phone a chawntu hi Angela Merkel a rak si.
International ah a biapi tukmi a si bantuk in huatu a ngei ve, i cucu Turkey, Greece le Spain te hna nih an huat ngai.
Sihmanhsehlaw, Merkel cu Europe i a rumbik ram a hruaitu a si. Cu ruangah mi tampi nih a ruahnak an cohlan khawh lomi um ko buin amah hi Internatioal Trade (chawlehnak) le Europe ram pawl i pehtlaih ttuan tti khawhnak caah lutlai a si kho. Amah belte Trump president a si hnu in Washington he an pehtlaihnak a tlawmdeuh ngai cang. Angela Merkel hi USA nih Russia cung i a tuahmi phihnak le North Korea kong a thil tuah le a biachim tete cungah a lungtling lomi, daihnak le i chawnhbiaknak in karhlan a duhmi a si caah Trump nih a hrial.
Merkel hi Tuluk he zong Europe le America leinak in aa rem kho deuh i Turkey nih a huat tuknak pakhat cu kan hnu i Turkey President nawlngeihnak chap ding rammi lung an laak lio ah Germany a ummi Turkey pawl kha i tel hlah u, tiah a kham khawh hna ruang a si.
Zei a si hmanh ah Merkel cu Germany a ttumchuk pi lo, khuasaktintuk a tthatter pinah Leicung ah nawlngeihnak le mithmai a hmumi a si ruang ah le an ram ah amah a thleng kho ding minung an um lo caah a ralaimi kum li chung cu international ah amah hi kan hmu lengmang rih ko lai.
Cc: Nrk/Vg/Independent
Comments
Post a Comment