(TUESDAY, 29 NOVEMBER 2016): President Barack Obama nih a rian chawngtu ding cu “Vawleicung ah huham a ngeibik mi” (the most powerful in the world) timi min a roh ta lai. A ralaimi January ah 2016 USA president thimnak a teitu Donald Trump nih a co lai i kum li chung a phurh ve lai. Donald Trump President ttuan ding hi a ruang phunphun ruangah a duh lomi an tam ngai. Cu he pehtlai in American President nih ngawlngeihnak zeitluk tam dah a ngeih timi biahalnak a um.
“Super Power” timi min a pumi USA hi siipuazi le ralkap thazang a tthawn lawng si loin kan Vawleipi kong ah harnak siseh, a tthatnak tiang in aa tel lonak a tlawmte. Mah cu ruangah cun American President cu Leicung ah nawl a ngeibik pakhat ah a ser.
Sihmanhsehlaw, International ah siseh an ram le Washington zong ah President nih a duhduh in zeipaoh a tuah kho hlei lo.
Relchih: Trump Kong Biahalnak
American cozah ah President nawlngeihnak cu 1787 i an rak ttialmi an phunghrampi ah fiang tein a lang. An ram cu President uknak in an uk nain, “Congress” le “Supreme Court” nih uknak an i tthen ve. Mah ti ngawlngeihnak an i tthenmi ruangah mi pakhat lawng nih nawlngeihnak sangbik, asiloah phundang in chim ahcun mah duh paoh nawlngeihnak hmannak nawl an ngei kho lo. “Checks and balances” timi an ngei kho peng.
“Congress” cu Senate le House of Representatives khi an si i Representatives 435 le Senate 100, an zapi 535 an si. Representatives cu kum hnih dan in thim an si, i Senate ah thimmi cu kum ruk an ttuan bantuk in nawl zong Representatives nakin an ngeihnak a tamdeuh. “Supreme Court” cu USA ah biaceihtu sangbik an si, i President nih a thimmi kha Senate nih a lungtlinpi a herh. Thim cangmi cu amah tein aa ngol, asiloah phungbuar in biaceih a ton ti dah lo, thih hlan lo biaceihtu a si lai. Atu hi Supreme Court ah chungtel pariat lawng an um i pakuanak cu Obama nih a thimmi kha Senate nih a duh lo caah a thim kho ti lo i, Donald Trump nih a thim te lai, Senate nih an lungtlinpi a herh tthiam lai.
Relchih: USA President Impeach tuah khawhnak a lam
Congress le Supreme Court kong a tawinak siseh law, a herh si le kan ttial chap te lai.
President nih zeitluk indah nawl a ngeih timi kha USA Constitution Article II ah aa ttial.
A tawinak in:
1.) Ralkap le hriamnam kong ah nawl a ngeibik mi (ralbawi lianbik) a si.
2.) Ramdang politik (foreign politics) kong ah nawl a ngei, i amah nawl in biachahnak a tuah khawh.
3.) Phungphai ttial tharmi fehternak min a thut lai, a duh lo ahcun Veto hmang in a kham khawh.
4.) Phungphai thar ttial ding a chuahpi khawh.
5.) Acozah chungtel a thim, Ambassador a thim, Supreme Court i biaceihtu le an ram ca i rianttuan ding paoh a thim hna.
6.) USA Budget a ser, a chuahpi khawh.
7.) Congress ah thimnak, asiloah caan karlak thil pakhat khat ruangah rian a lawngmi um cun President nih rian peknak nawl a ngei i cu caan a dih in, an rian a dih ve lai.
8.) A sual tiin biaceih cangmi kha luatnak a pek khawh.
President cu a cozah le a ram hruaitu “Boss” a si. An phunghram pi leng in a tuah khawhmi nawlngeihnak a um len rih. Biana ah President nih a chuahmi Order cu an ram i “federal agencies” (CIA, FBI le a dang agency vialte) nih zulh ding in rian an ngei.
President Nawlngeihnak cu “Ri” a ngei ve i cucu:
1.) Congress nih President cu bia a ceih “Impeachment” khawh.
2.) President nih Veto a hmanmi kha Congress ah vote an thlak lai i cheu thum ah cheu hnih lungtlinnak in an hrawh khawh.
3.) Senate nih President i a thimmi minung kha a lungtlin a herh.
4.) International i biachahnak a tuahmi cu Congress i cheu thum ah cheu hnih hnatlaknak lawng in fehter a si.
5.) Supreme Court nih President nih Order a chuahmi cu phung he aa kalh tinak nawl a ngeih.
President uknak a si bantuk in nawl a ngeihnak a tampi. Sihmanhsehlaw, Congress nih a thil tuahmi an lungtlin lo caan ah vote thlak in a bia an al khawh. Cu a si caah President thimnak tluk in Senate le Representatives thimnak hi a biapimi a si i, Congress ah President a ttuanmi Party an tamdeuh a si ahcun President nih a duh ning in rian a ttuan khawh deuh. Obama nih Supreme Court a thim khawh lonak a ruang cu Senate ah Obama party an tlawmdeuh caah a si ko. Cu lawng a si rih lo, President a ttuan liomi party kha Congress ah a tamdeuh zong ah (atu hi Congress ah Republican an tamdeuh), an ram le miphun caah a ttha lo tiah an ruah a si ahcun Congress nih an President cu a biaceih in a rian phuah khawh a si.
Note: TUESDAY, 29 NOVEMBER 2016 ah Chinland Post chuahmi DC caah rak ttialmi a si.
Comments
Post a Comment