August 28. ah North Korea nih Japan cung ah "Rocket" a zuanter thawng ka theihka cu USA nih a kap lai lo ti a ruatmi keimah hmanh ka thin a ka phanter nawn. North Korea hi tu seh, a lor tuk cang ti a ruatmi tampi an um. Sihmanhsehlaw, kum tampi a ram minung paw rek in hriamnam a sermi North Korea kah le phomh ding timi cu thil tetuai a si lo. Tuning i tlirhkhawnh sasawh, pehtlaihnak le chawleh phih men hin cun North Korea hi a rauh hlan ah pawpi ah aa chuah lai.
President B. Obama nih amah chawngtu ding Donald Trump cu North Korea hi USA caah ttih a nungmi, asiloah National Security caah a pakhatnak chiah ding a si tiah ralrinnak bia ro a rak vuih ta tiah Wall Street Journal nih a ttial. Zan i a ka hngilhter lotu hi North Korea a si ti zong Trump ruahnak petu pawl he lakphak din pah biaruahnak ah a rak chim.
Trump president a si hnu in North Korea nih Rocket tam ngai a kah i April ah khan an khualipi ah an hriamnam ngeihmi hmuhsaknak a rak tuah. Lam hla a zuang khomi Rocket an sermi an hlawh a hong tling ngai hoi.
Click: Atom Bomb kong theihtlei
Cu a si ruangah North Korea hi keimah ka hmuhning ah cun USA siseh, UN zong nih a si khawh chung in ton i biaruah awk a si ko. Kap hna sehlaw, fawite in an tei hlei lai lo, nain an tei zong ah raltuk hnu a theipar hi Asia nih kan zun kho lai lo. South Korea nih a tuar kho lai lo. Cucu USA le Vawleipi nih an ttihmi a si i an ttihnak a ruang biahalnak he tlawmpal ka hon ttial.
1. Atom Bomb hi Kim nih zeicadah aa tuahnak lai?
Kim Jong-un nih aa timhmi le a saduhthah cu North Korea hi Vawleipi nih Atomb-power ngei pakhat ah an cohlan ding hi a si. Atu hi a hmuitinh a phan cuahmah cang tiah Peace Research Institute in Oslo (PRIO) nih a chimning in theih a si. Kim nih an ram khuasaktintuk tunmer ding hi a duh, sihmanhsehlaw Vawleicung ah Atom-power ngeimi si i ram dang nih duh paoh in ti ngam lomi si kha aa zuam hmasa.
Chuahpi ral a simi South Korea, USA le Japan nih International ah an namneh tuk, a phunphun in phih an zuam ruangah a ram minung cu an tuar tuk nain aa tinhmi tlin khawh ding caan ttha tampi a rak ngei.
2. Zeitluk hla dah Kim ngeihmi Rocket an zuan khawh?
Atom bomb cu a ngei. Zeitluk hla dah an zuan khawh? An sermi hi vanlawng in thlak khawhmi a si maw? Zeitluk fa le hmual ngeidah an si ti biahalnak a um. Media pawl nih Expert pawl an hal hna i an chimmi aa dang cio, an zumhmi aa dang cio. Asinain South Korea ram ning in a phan khomi Rocket a ngei i fiangtein kan theihmi cu Japan a phan khomi a ngei ti kha August 28. ah a lang. Atu bantuk i an tthanchoter khawh a si ahcun kum tlawmte chung ah American ramtthen Hawaii cu a phak khawh lai tiah VOx nih a ttial. Nain Center for Strategic and International Studies (CSIS) nih North Korea Rocket pawl hi USA i Seattle, San Francisco asiloah Los Angeles an phan kho lai a ti ve.
3. South Korea le North Korea ralkap thazang zeitluk in an i dan?
 |
| American ralkap S. Korea in North Korea an terh hna nak hmun. fofo: NTB scanpix |
CSIS ning in North Korea nih ralkap 1.2 million hrawng a ngeih, Tank 3500 in 4300 kar hrawng hi raltuk ding redi in an to hna.
South Korea nih ralkap 630000 a ngeih i USA ralkap 29000 hrawng cu an ramri ah an um. USA le S. Korea hi Technology le hriamnam in an sangdeuh lai, i ral cu an tei khawh ko lai. Asinain North Korea ralkap nih South Korea fakpi in an hrawh khawh ve pinah USA zong raltuk man a sungh ding a tampi.
4. North Korea hi kap hna sehlaw N.K nih a let kho hna lai maw?
PRIO i a ttuanmi nih a chimnak ah North Korea nih hin Atom Bomb ngei hlah hmanh sehlaw USA nih a kah zong ah fakpi in a lehrulh khawh ve ko lai. Aruang cu minung 25million umnak South Korea khualipi Seoul ciam lak in a tuah ko ding Rocket, Miakpi kan timi (ArtilleryCanons) tam taktak (a cung i an thazang chung Tanks tibantuk) cu ramri ah Seoul lei hoih in an chiah. Mit tthep kar ah a phut kho ding an si.
Kim Jong-un nih hin Seoul hi ciamlak in ka tuah khawh tiah aa hrocer bal. Miakpi (Artillery) pawl Rocket pawl ramri i a chiahnak hi atu tiang USA nih an thei rih lo.
 |
| S.korea nih an hmuhmi N.korea le an ramri ker N.korea hriam umnak. Koogle.tv |
5. Kim nih Weapons of Mass Destruction timi hriamnam lian dang ngei maw?
South Korea ralkap ngiathlaitu pawl nih an chimnak ah North Korea nih Atom Bomb pinah Chemical Weapons (CW) tampi a ngei ti a si. CW pawl cu Miakpi hmang in kah khawh a si pinah Rocket zong ah bunh khawh an si. Cu a si caah Seoul hi Gas-siivai in phum khawh an si.
6. Zeitindah mahtluk rang in Atom a ngeih khawh?
Pakhatnak ah North Korea nih anmah tein Atom-bomb ser an thiam. Cucu Joshua H. Pollack nih NKNews ah a chimmi a si. Ukraine asilo ahcun Russia ah a thli in an Rocket-motor pawl hi an lak lai tiah NYT ah an rak ttial. 2011 le 2015 ah Ukraine cozah nih NorthKorean pawl an rak tlaih hna i cucu Atom-bomb sernak cawk/lak ah a rami an rak si tiah aa khatmi thawngca nih a ttial fawn. A donghnak ah Tuluk nih a bawmh tiah ruah a si. Afghanistan ah an herhmi thilri lak khawh ding Tuluk ram khi lam ah an ser tiah an ruah. Cu pinah IS, Taliban, Russia kong an buai kar ah caan a rak hman khawh ti a si.
7. USA nih N.Korea he chawnbiak (negotiate) aa tim bal maw?
Aa tim bal. 1994 ah khan Atom Program hi ngol ding le hawi dang cio bantuk in pehtlaihnak ngeih ding hnatlaknak an rak ngei. Cu hnatlaknak cu atu le tu a rawk i 2003 tiang kha an rak i zoh sawh ti a si. George W. Bush chan ah hnatlaknak pahnih an rak ngei kho nain pakhat cu an karlak entaunak ruangah a rak rawk tthan.
8. President Trump nih Korea Cung USA Politics a thleng maw?
Barack Obama nih a rak kalpimi cu WSJ i a chim bantuk in le President a ttuan lio aa dirpimi "Lungsau thinfualnak" he North Korea cu a rak ngiat i Rocket le Atom an hneksak lengmang a si ahcun chawnhbiak a rak tim lo.
Trump nih North Korea hawi ngeihchun Tuluk aa bochan, Obama zong nih Tuluk hi voi tam ngai Korea buainak kong ah a rak mawhchiat ve. Trump cozah nih "Lungsau thinfualnak caan a dih cang." tiah an ti ve nain atu tiang cu a kut a zao rih lo.
Rel Chih: Trump nih aa ken pengmi AtomBomb
9. Tuluk le North Korea zeitlukindah an i pehtlaihnak a tthat?
North Korea chawlehnak i a pehtlaih khawhmi cu Tuluk hi a si. Tuluk in a lutmi thilri/eidin hi an nunnak a si, an pawcawmnak a si. Zinan tiang in Tuluk nih zuarh hna. Cu a si caah Tuluk nih Korea cungah mithmai a ngei.
Tuluk nih a ttihmi cu USA nih North Korea a kah i ral an thawh a si ahcun Tuluk ram ah ralzaam tam tuk an lut lai ti a phang. Mah hi ral a thawh ahcun Tuluk lawng si lo, Asia ah ralzam tamtuk kan karh lai tiah ka chim lengmang. Tuluk nih North Korea kong i a tuahmi khawhmi le a tuah khawh lo ding hi aa zat lai. USA nih chawlehnak phihter a duh. Asinain Tuluk nih nan i chawnhbiak khawh ding i zuam u, a ti ve. Mah cu USA nih a cohlan awk a si, tiah North Korea kong i Expert Geir Helgensen nih NRK ah a ttial. Chawlehnak phit sehlaw North Korea zeitindah a um lai? South Korea he i rem u ti lawng hi Tuluk nih N.K a chimh khawhmi a si rih.
A ruang cu Tuluk nih chawlehnak a phih i Zinan a phih, an bank a hmanter lo a si ahcun North Korea nih a tuah khawh ding pakhat lawng a um. Cucu ttih a nung tukmi a si. Ralhrang (trrorists) pawl sinah a hriamnam a zuar a hau, atom tiang a zuar a herh lai. (Nihin tiang zei ram hmanh (uktu chiakha zong) nih ralhrang pawl sinah Atom Bomb an zuar rih lo. A ruang? Ruat ve te.
10. Cuti si ahcun zeitindah an tuah ne lai?
A duh nalo in zeitindah cabuai cung ah auh in chawnhbiak khawh a si lai timi lam pakhat a um tiah PRIO i a ttuanmi nih a chim. Mah cu dah ti lo raltuk in hi buainak kan daihter lai ti cu ttih a nung tukmi a si tiah Norway Foreign Minister siseh Europe ram tampi nih a chim.
April 2017 i North Korea Rocket a tlawlhmi cheukhat kha American nih an hrawhpiak (hacked) hna caah a si lai tiah an ruah. USA nih hin Iran zong an Atom-Program cu caan saupi Cyber-attack a rak tuah. A luancia kum thum zong ah khan Obama nih North Korea zong ah cu bantuk Cyber-attack hman ding in Pentagon cu nawl a rak pek ti a si.
Iran bantuk in an Atom-program hi Cyber-Attack an tuah i an hrawh piak hna, asiloah an tuaitam khawh hna a si ahcun Kim Jong-un cu cabuai ah chawnhbiak awk ttha lo in lungdongh khawh a si hnga tiah PRIO le CSIS i a ttuanmi hna nih an ruah.
August 28. i Japan cung an zuantermi Rocket kong ah UN meeting an to colh. Asinain Pentagon nih USA ramri a tawng lo, hna a hnawh lo tiah a chim. A fiangmi cu North Korea nih USA ramri ah a kut a thlak hlan lo cun ruahchannak a um rih ko. Cucu Tuluk zong nih Lungsau caan a dih cang nain ruahchannak a um rih, tiah kap hnih iton le chawnhbiaknak ding cu UN le Tuluk nih an forh. Cuvial!!!
A ttha nan ti cun nan Share ve te u law.
Ref:
WSJ: Obama warns Trump on Kim
MT/CSIS: Missiles of North Korea
NRK: USA nih Tuluk bia a ngaih awk a si
Globalsecurity: Seoul lei hoih in N.Korea rockets
NYT: Obama nih Cyber-attack tuah ding nawl a pek
Aftenposten: Zeitindah N.Korea nih Atom rangtuk in a ngeih?
Comments
Post a Comment