 |
| Lee Jae-yong cu palek nih bia an hal i an chuahpi lio. foto: AFP |
Miding a si lomi nih ram an hruai tikah rawhralnak a phan an ti tawn bang South Korea cu Park Guen-hye President a si chungah tam tuk a rawk i a man a tla. Amah lila zong ziknawh le eihmuar a hman caah President ttuan caan a dih hlan in an dawi. Zik an nawhtu pawl zong duhsah tete in an tlaih hna. A bikin S. Korea chawlehnak lei i an mirum pawl nih an tuar cuahmah.
Tu zarh chung ah S. Korea biaceih zung nih Samsung Company ro a cotu Lee Jae-yong, S. Korea ah a rumbik pathumnak a simi cu kum nga chung thongthlak ding in bia an chah. Kum 49 a simi Lee zong hi President hlun Park Guen-hye (April ah khan ziknawh ei ruangah an dawi.) he ziknawh le eihmuar kong ah pehtlaihnak a ngeimi an si caah a si. Cucu The Guardian nih a ttialmi a si.
Taza a cuaitu Cozah nih cun kum 12 chung thong thlak an duh.
Samsung cu 2016 ah khan Galaxy Note 7 an chuahmi a puah caah US Dollar 5 Billion hrawng kan sung lai tiah an rak chim. Asinain Billion 3 hrawng lawng a si lai tiah theih a si. Cu ruangah Samsung cu Europe le America ah cun a man a rak tla.
An company nih an minchiatnak vialte remh le thianh tthan ding ah fakpi in an i zuam nain ziknawh eihmuarnak an tuahmi pawl tu kha aa phuang i an ttumchuk chinchin.
Lee Jae-yong thongthlak ding biaceih a si hnu in cozah le chawlettu hna, sehzung pawl le a dangdang Technology lei ngeitu hna rianttuan ttinak cu duhsah tein a dih caan a hong phan lai tiah chawleh lei thiamsang hna nih an chim. South Korea le Japan cu politics le chawlet pawl kar pehtlaihnak an fek ngai hna. Vawleicung i an min a langhnak zong hi cozah le politician pawl nih an ram chawlettu pawl le mirum pawl he rian an ttuan tti caah a si tiah an ruah.
Lee nih hin President an an tthumhmi nu Park Guen-hye a hawile nih an tlaihmi bu (organizations) pawl kha phaisa tampi a rak bawmh hna. Cucu a hlawk tampi hmuhding ruahchannak he a rak si. Mah ti aa thawk zong cu 2014 i a pa a dam ti lo hnu in amah nih Samsung a hruai hnu in a si.
Samsung company chungtel ahohmanh nih Organizations pawl ah phaisa kan bawm hna lo, ti an chim lo. Nain Samsung nih ruahchannak he a tuahmi a si lo ti cu ziknawh an puhmi hna kong ah an chim. Thil sual kan tuah lo an ti pinah President Park zong nih "Keimah he pehtlaihnak a ngei lo." a ti ve.
Lee a pa zong hi 2009 ah khan ngunkhuai (tax) a fir caah kum thum thongthlak ding in tazacuai a rak si nain a luat. South Korea chawlehnak le khuasaktintuk a tthanchonak ah a biapimi bawmtu a si tiah biaceihtu nih thong an rak thlak lomi Lee Kun-hee a si.
Tutan a fapa bia an ceihpiakmi hi zeitluk indah an i biatak timi cu Lee thong a tlak tak le tlak tak lo, asiloah zeicandah a tlak tak timi nih tampi lai a rel te khawh. Samsung a hmailei kong siseh S. Korea chawlettu pawl le cozah kar rianttuan ttinak zong a fiang zau lai.
Atu i a fiangmi tu cu Samsung hi a ngeitu dang a si lo zongah, hruaitu dang a hong ngei te lai. A hnubik chuak Samsung Galaxy Note 8 hna kha aa dawhning le aa tthatning cu a mak ko ee, an ti.
Chirhchan: The Guardian, E24, Finance.yahoo.com
Comments
Post a Comment