President Trump Nih A Kalnak Kip Ah Atombomb Ai Ken

Agent nih atom suitcase a put lio. Foto: Kevin Lamarque/Reuters

President Donald Trump cu a thei lomi kan um lo. 2016 laifang in nihin tiang i media ah a min tial a tambik a si lai tiah ruahmi pa a si, i kan umnak Norway hoi hna ah cun avoi in 58 000 leng kan hman tiah Medier24 nih tu zarh ah a ttial i kan Prime Minister min cu 22 000 hrawng lawng media ah hmuh khawh a si, a ti. Min ngei thawngzamhca Dagbladet nih a ttial ning ah Norway mi pahra ah pasarih nih Trump cu vawleipi himdaihnak ding caah ttihnung le dawnkhantu a si tiah an ruah. Trump nih kan vawleipi cu a hninh ko. Asinain Trump hi kan ttih hleinak ding a um maw? Asiloah zeiruangahdah an ttih cio hnga?


A uartu caah cun chim awk a um lo. Asinain President Trump nih hin a duh tik paoh ah Atom ral a thawhter khawh timi le a duh tik paoh ah Atombomb a puah khawh timi tu hi cu a fiang.

American president a congtu Agent cu phung ning tein Trump he meter pakhat aa hlatnak ah a umkal i Suitcase pakhat aa put lai. Mah cu Suicase chungah Atom-ral he pehtlai in President nih nawlpek khawhnak ding ah a herhmi a tling. President nih a duhmi tuah khawhnak ding ah amah a sinak (ID) a theihter khomi ai tel chih. A sullam cu President nih Congress hnatlakpinak tello in Atombomb hi a puah khawh tinak a si ko.

Tu zarh chung ah Trump nih Atom in North Korea lehrulh ding a chim lengmang. Nithumni i a chimmi hoi hna cu Trump ruahnak a petu pawl lila hmanh an lau, tiah The New York Time nih a ttial. "Mei le thinhunnak" he kan lehrulh lai tiah a chim fawn.

Tu hrawng cu hi ram hnih nih hin tulio cu ttihnak le biaalnak tampi an chuahter.

Cu ti Trump bialehnak cu North Korea nih "khua a ruat lomi" President tiah a leh ve. Cuti an i ertau tikah President ruahnak petu pawl nih American pawl cu "zan ah lungdai tein i hngilh ko u" an ti hna i President nih a zoh sawh lai lo tiah Secretary Rex Tillerson nih a chim.

Cabia Dang: Zeidah An I Dannak A Si?

North Korea kong ahhin Trump nih Atombomb a hman lai ti hi an phan ngaimi a si tikah atu i minung pakhat lawng nawlngeihnak a simi American system hi a ttha taktak maw ti biahal awk ngai a si.

Atombomb/rocket puahnak ding ah President pakhat nawlngeihnak lawng a um, i cu minung pakhat nih cun ttuanvo a lak ve. Asinain a dang dirhmun a simi Rocket kahnak te hna ah cun minung pahnih nih a dang veve in an tuah. Movie pawl ah kan hmuh lengmang, ti tang lawng pawl in Rocket kah an duh tikah Captain le ralkap lak i a rank sangbik pakhat nih Code rel hnu ah an lungtlin in kah a si tawn.

Atu bantuk in President nih nawl an peknak a ruang cu Pearl Harbor, Cold War le 9/11 bantuk ruangah hin a si i ram dang nih Atom in USA an kah ti an theih bak in President nih lehrulh colh khawhnak ding caah a si. I ruah lopi in American an kah tthan a si ahcun a rannak in leh ding hi American thinlung le thi ah a um cang.

Atu North Korea le USA an dirhmun cu Cold War chan bantuk kha a si, USA nih Asia ah a ralkap tamtuk a chiah fawn tikah ttihnung ngai a si. Atu bantuk caan ahhin cun President pakhat khat hrut in molh sual hna sehlaw, asiloah a thinhun celh ti lomi President pakhat nih ral tho sehlaw zei chim awk cu dah a um hnga?

Mah cu a si caah Trump nih North Korea he biaruahnak ngeih ding cu a si kho lo a ti ko zong ah USA nih a tuah khawhmi le a tuah ding ah a tthabik pakhat cu North Korea he iton i minung puitling bantuk in bia i ruah hi a si ko, tiah Siegfried S. Hecker nih Bulletin of The Atomic Scientists ah a chim.

- Atu i a biapi cemmi cu Atom-ral hrial khawhnak ding caah Pyongyang he biaruah a si ko. North Korea kong ah ttihphan cem ding cu an AtomRocket nih USA a phak sual lai timi si loin Washington hi Atom-ral kong ah a ri sual lai ti hi a sideuh tiah a chim chih. Amah hi nuclear le atom lei ah rian saupi a ttuanmi a si.

Hecker nih North Korea tuk le kah ding timi cu "ttihnung le ttuanvo ngeih lo" si a ti.
-------------------------

Source: NYT, Independent, Nrk
Foto: Kevin Lamarque/Reuters

Kai manh in North Korea kong he pehtlai in ka ruahning ka ttial tthan te lai.