Guardiola Nih City A Cawisang Kho Tak Lai Maw?

2017/18 Premier League cu an thawk cang. Arsenal nih Leicester City cu 4-3 in a tei. Asinain tu kum ah Premier League a tei kho ding ah ka zumhbik hna caah le Manager ah a thiambik (atu ttuan liomi ah) a si ko lai tiah ruahmi Guardiola nih a hruai hna caah tlawmpal in cuan chung tuah usih.

Cabia dang: Guardiola hi Manager thiambik a si tak maw?

League pakhat teitu si hi a za tawn lo. Pep Guardiola tuanbia hi zoh usih law, Bayern Munchen kha Bundesliga voithum a teipi hna nain Champions League a teipi hna lo caah an sawisel. Mah tikah Barcelona i teinak a rak hmuhmi kha amah thiam si lo in Lionel Messi i ngeih ahcun hopaoh nih teinak kan hmuh ko lai tiah Pep a a uar lem lomi pawl nih an chim ttheo. Guardiola hi "Genius" a si ahcun, a derdeuhmi phu a hruai zong ah teinak pakhat tel cu a hmuh awk a si hnga lo maw?


Barcelona le Bayern an si ti lo zong ah a taktak tiah cun ni kum kha Manchester City hi teinak pakhat tel cu a hmuhpi awk a rak si. Sihmanhsehlaw, hrai pakhat hmanh thlir hlei lo ah pathumnak an rak si. 

Tu kum cu pakhatnak si ding in "Ready" a si. Biahalnak pakhat a ummi cu atu ah bawlung chuih thiambik timi minung aa ngeih hna, mi thar a cawk mi man zong a tam, i zeitindah sawiseltu an kaa a phih hna lai? 

England i Guardiola an zumh lomi hi an mawh lo. Aruang cu a rak ttuan cia nak Barcelona le Bayern nih amah tel lo zong ah "Record" thar an ttial ko. Cucaah Vawleicung ah a harbik le zuamcawhnak a sanbiknak Premier League ahhin zeitindah Pep nih a par phak khawh lai? Luis Enrique nih Barca a ttuan kum khatnak ah hrai-thum a cawi, cun hrai-hnih a hun peh. Carlo Ancelotti nih Bayern cu hrai-hnih a cawipi hna. Guardiola belte cu City a ttuan kum khatnak ah Antonio Conte (a kum khatnak ve) le Pochettino nih Premier League ah an tei. Guardiola mei a lang, ti tiang in sawiseltu nih an rak ti. 

Pep Guardiola nih ka duhmi "System" in a chuih kho ding minung ka ngeih hna lo caah a si, a ti ve. Sagna, Clichy, Kolarov, Zabaleta hi an zate in kum 30 an lawnh cang. An no lio bantuk in an khul rang ti lo i an thabat a fawi cang. Kompany kha le i khawn lawng a rianh tikah "Back" pathum a hman hna (Kolarov hna kha a thar bak in Central-back ah a thlen) i "Wing" kha "Wing-back" ah a hman hna. Mah zawn tu cu Manager "Tactic" thiamnak a lang kho. 4-2-3-1 in a chuihter hna. Beidongh phun khat a si. 

Tthaal ah khan a cung ka chimmi "Back" pawl cu "Free" in a kalter hna. Kolarov belte kha Roma ah a zuar. 

Guardiola nih a lung duh in mi a cawk khawh. "Back" a zuar bantuk in mi thar a cawk hna, Danilo, Kyle Walker, Benjamin Mendy. Cu pinah "keeper" thar Ederson a cawk i Bernardo Silva timi Monaco in a cawk tharmi zong hi City caah bawmtu a si lai tiah an zumh. Guardiola nih a mitthlam i a suaimi System in an chuih khawhnak ding a hung tling cang. 

City cawk tharmi back, Mendy le Walker. Foto: Independent.co.uk

Hnukham a cawkmi hna hi an man a tam, a bik in Tottenham nih an zuarmi Walker hi hnukham ah a manfak bik lakah ai tel cang. Hnukham an tthat a si ahcun Guardiola system ning ah hmaikal nih duh tawk tein bawlung an i celh cang lai. A taktak ti ahcun City hmaikal hi an za tuk. 

Club dang nih mi an thlennawn, mi thar an cawk ciocio ko nain City an i thlennawn ning (back lawng a cawkmi) hi a chuihmi phu ke i theihnak ah a ttha khun lai. Cu pinah tuan tein mi thar a cawk hna. Cu a si caah tu kum cu Premier League a tei kho ding ah City hi an zumh tuk hna hi a si kho. 

Asinain, pakhat a ummi cu teinak an hmuh zong ah phaisa a tom in an hman i mi thar an cawkmi nih hin Goardiola min cu a tthatter hlei hnga lo. A ruang cu City hi kum upa an tamtuk ti men in zeihmanh a rak chuahpi lo caah a si. 

Atu cu Pep nih City a tlaih hnu in Million £400 leng an hman cang. Tthaal chung lawng ah Walker le Mendy caah million £100 hrawng an hman i Ederson £36million, Bernado Silva £45million in an cawk hna. Mah cu Club dang nih an mang lawng in an hman khawhmi a si. Ni kum pakhatnak a hmumi Chelsea Conte hoi hna cu mi thar cawk ding in nau rawl hauh in a hauh hna, nain an pe kho rih lo. 

Philh lo ding! Tottenham nih atu tiang mi thar a caw rih lo. Walker tu an zuar diam khah. 

Chelsea le Tottenham nih teinak an hmuh te lo zong ah mipi i ruahchannak a tlawmdeuh caah an sung lo ti khawh a si. Nain Guardiola caah cun pakhatnak hmuh lo ding cu a si kho lai lo. 

Cu a si caah, Guardiola aa palh tikah zeitindah an ti te lai timi hi ruah ngam a si lo. "A thiam tuk" an rak timi kha belnang thuh a si lai. Leicung manager thiambik timi kong an ceih tikah "a rak thim tuk NAIN" ti a si te lai. A rak zum lem lomi pawl nih "kan chimmi kha a si tak ko lo maw?" an ti te lai. 

Sihmanhsehlaw, Guardiola caah a min cawisan cu a har lai tuk lai lo, a hleiin hi vialte mi thar a cawk hnu in. A tuah khawhmi pakhat cu City nih a phak bal lomi Champions League Final phak hi a si, i aa zuam hrimhrim lai. Cun Premier League zong hi Record thar he a tei lai lo ti kan chim kho lo. 

Zeiti a si hmanh ah Guardiola duhning system le a chuihter hna ning cu Barca le Bayern ah khan kan hmuh cang i aa dawh hringhran ko. Hmaikal an chuihning, an "Passing" a ranning nih Premier League zoh a nuamhter cem te ko lai.

Cabia dang: Guardiola maw thiamdeuh Mourinho?
Cabia Dang: Pellegrini nih Guardiola kong ah City ngeitu a mawhchiat hna.