Coutinho Nih Klopp A Leirawi Ve Te Hnga Maw?

Liverpool FC nih an i bochan tukmi Phillipe Coutinho cu Barcelona nih cawk an hal lengmang hna. Premier League ah a bawlung chuih aa dawh bak tiah uar ciomi a si i tu kum zong a lang ngaingai lai tiah zumh a si. Liverpool nih Barcelona ah an zuar awk a si tiah Fan-pawl nih nan ruat maw?

Neymar an zuar hnu i Coutinho an cawk khawh a si ahcun Barcelona caah laksawng pakhat a si khomi a si. Neymar zaka ah a chuih kho ding i ruahmi cu amah hi a si. Neymar an zuar man phaisa tamtuk an ngei nain mi thar cawk ding caan tam an ngei ti lo. Coutinho hi an duhbik mi a si.


2016/17 bawlung kum a dih ah khan cun Coutinho nih Liverpool ah um a rak duh kong a rak chim. Liverpool ah cun "milem zuk" ngeih khawh a si, ti a si (Ferguson, Henry tibantuk pawl milem an tuahpiakmi hna bantuk). Asinain minthang le teinak tampi a hmu khomi Barcelona ah i tthial cu a lung ah a um tthiam. Aruang cu Liverpool cu lam canceo lawng an phan rih ti khawh a si.

Liverpool nih 2013 ah khan Coutinho hi £8.5 million (pund) lawng in an rak cawk, nain atu ah Barcelona nih £90 million in cawk an hal hna. Mah cu a tam ngaimi phaisa a si nain Manager Klopp nih a zuar duh lo.

Liverpool nih an manager cungah ruahchannak tampi an ngei. Asinain Klopp a tuanbia zoh tikah leirawi a rak tong lengmang.

Dortmund a rak um lio ah a biapimi minung nih an rak tlik tak. Shinji Kagawa cu Manchester United ah a rak kal. Mario Gotze le Robert Lewandowski cu an ralchan a simi Bayern Munchen nih an rak thur hna. Gotze cu an cawk, nain Lewandowski cu min a thut duh lo caah alak "free" in a kal.

Chim duhmi cu an pahnih in Bayern ah kal hrim an rak duh. Klopp nih a tuah khawhmi a rak um lo.

Atu belte hi cu Klopp a van ttha, a nawlngeihnak a sang. Coutinho nih Liverpool kaltak ka duh a ti ko nain tu kum January i kum nga ca min a thut tharmi nih a tlaihkhih. Neymar an cawk bantuk in "Clausule" timi a chuihtu nih min a thutmi kum chung ah kal a duh ahcun, a man an khiah ning zat a pe khomi sinah zuar siseh timi hi England ah a um lo. Club nih an zuar lo cun zeitluk in an kal duh le man tam zong ah min an thut chung kha cu an um a herh caah Liverpool an hna ngam rih.

"Liverpool nih minung zuar kan herh lio caan a si rih lo." tiah Klopp nih tu zarh ah a chim.

Sihmanhsehlaw, Real Madrid le Barcelona nih England Club pawl cu an duh paoh in an tuah khawh tawn hna. Ronaldo, Fabregas le Suarez te hna kha zuar an rak siang lem hna lo. Club nih phaisa mit an au lo zong ah a chuihtu nih kal an duh cang ahcun a donghnak ah an i tthen tawn ko. Suarez zong nan hngalh ko kha, Barcelona ah tthial a duh tuk i a donghnak ah an thlah ko. Cu bantuk in Manchester City zong nih Sterling cu an rak laak khawh.

Liverpool nih £90 million hi an duh a si ahcun an zuar khawh i Ronaldo, Suarez le Bale an rak zuar lionak ah a tamdeuh lai. Amah belte tu kum caah Liverpool nih amah ai rawl an hmu kho zau lai lo, i Premier League le Europe ah zei huaha an si lo ding a lang ngai.

Coutinho hi Liverpool caah zeitluk in a biapit timi cu kan hnu kum ah khan goal 13 a rak ngei i "assist" pasarih a rak ngei. A chuih caan ah cun amah nih a "Controll" khawh tuk hna. Bawlung a tuahto ning hrim aa dawh peng. Kum 25 lawng a si rih. Atu nakin a thiamdeuh kho rih.

Cabia Dang: Liverpool Caah Manager Thabik

2017/18 bawlung kum an thawk a voikhatnak an chuih ah Watford - Liverpool (3-3) in an rak dih. Asinain Liverpool caah thachiat awk a si lo.

Aruang cu, Liverpool nih a biapimi a minung a zuar hna lo hleiah Mohamed Salah a cawk. Hmaikal Dominic Solanke le hnukham Andy Robertson a cawk hna. Cu hna lakah Salah hi tu kum ah zoh a dawh ding i ngaih ngaimi a si. Mah cu Liverpool nih Coutinhon an zuar zong ah a poi lo ti awk a ttha lo.

Coutinho hi atu caan theng ahhin Klopp le Liverpool nih an herh. Hmaikal ah Mane, Salah, Firmino a ngeih hna pinah a cawk tharmi Solanke, Sturridge (a zuar lo), Origi le Danny Ings hi mi chawngtu ah a ngeih hna. Cu tikah hmaikal bawlung a tuah piak kho bik ding cu Coutinho hi a si, i alai ah a um hrim a herh cang.

Alaikal ah Georginio Wijnaldum, Adam Lallana, Emre Can le Jordan Henderson a ngeih hna nain Lallana cu October lei lawng in a chuih kho lai. Zei a va si hmanh ah, Coutinho hi a "Passing" a ttha, a ke a tthabik si. Amah nihhin Liverpool "Problems" cu a siamremh piak khawh bik ko hna.

Khatlei in Klopp nih cawk a duhmi Van Dijk le Naby Keita a cawk khawh hna lo tikah Coutinho hi an kalter, an zuar khawh ko nain atu cu a caan a si rih hnga lo. A tlawmbik kum khat asiloah kum hnih tel cu an tlaih rih a hau ko hnga.

Liverpool fans nan aw-ka theih ka duh ko.