Conte Hi mourinho bantuk in tuah dawh an si

foto: sky sport

Tu kum tthaal i bawlung chawdawr ah Chelsea nih mi thar an laak ning zoh tikah Conte caah cun lungre theih awk ngaingai a si ko. A hlei in nai zarhpini i Arsenal nih (ni kum FA teitu le PL teitu Chelsea) Community Shield i a tei khan cun Chelsea nih mi thar laak a herh ko ti a fiang.

"Tu kum cu manager ka ttuanmi chung ah a harbik a si lai ti a fiang ko." tiah Conte nih a chim. Tthaal chung i bawlung chawdawr he pehtlai in media ah a chim lengmangmi cu mi tamdeuh cawk ding hi a si, i "Keimah cungah aa hngatmi a si lo," tiah a chim chih lengmang fawn. Mi thar an laakmi a tlawmtuk caah a aipuang pah cang. A bikin Lukaku an lak khawh lo hlei i Manchester United nih an cawk diam komi khi an thinfak khun.

Mi thar cawk kong ah Conte hi nawl a ngei lo. Asinain, a theilai a chiat tikah amah hi riah chuah ding mi cu a si.


Conte lungre theihnak hi theihthiam khawh ngai a si. Chelsea nih naite i Premier League an teimi, cun manager thar nih a duhmi Formation in chuih khawh ding aa zuam lio a si caah Chelsea caah cun "ttih a nungmi caan" a hon si, tiah ka ruah.

A ruang? Premier League an teimi kha Europe ah an rak itel lo ruangah a si ti ahcun kan palh tuk lai lo. Zarh khat ah voikhat (a caan ah FA an chuih.) lawng an chuih i Conte nih minung thleng tuk lo in a chuihter khawh peng hna i PL an tei ah khan, kum khat chung ah minung 16 lawng Conte nih a hman hna ti a si. Cu 16 chung ah Oscar le Ivanovic kha January ah a rak zuar hna khah.

Tutan cu Champions League ah an i tel cang lai, i an chuih ding program a hung tam lai. Cu tikah Manager nih ai ruahmi cu aa khawngmi an tam te lai timi le an chuihmi puai pakhat le pakhat kar ah minung thlennawn an herh lai timi a si. Europe ah chuih ding ngeih lo ahcun PL hi cu an i zuam kho cio ko hnga (Liverpool le Leicester City kha nan theih ko hna.). 

Chelsea nih teinak hmuh an duh i Europe le England ah i hrai thlir an duh rih a si ahcun mi thar pathum/li cu cawk an herh. Community Shield Cup kan zoh tikah Chelsea nih Back (orh le keh), Wing (keh le orh) a herh hna. 

Atu tiang cu mi i chap lo in an zor ai.

Fofo: twitter/screencut/nickmiller

Thawngpang ttha pakhat cu Chelsea nih Willy Caballero, Antonio Rüdiger, Tiémoué Bakayoko le Álvaro Morata an cawkmi hna hi a si i Willy cu goalbawh chawngtu (2nd keeper) lawng a si. A dang hi cu an za, i a hleiin Morata hi Conte duhmi System ah i tlaak dawh a si.

Thawng ttha cu a si nain Chelsea nih a zuarmi a si loah an hnonmi hna zaka i an cawkmi hna lawng an si tikah minung an i chap hlei lo. 

Willy cu Asmir Begović (Bournemouth ah an zuar) airawltu, Rüdiger cu Aston Villa ah alak in a kalmi John Terry, Bakayoko cu Manchester United nih an cawkmi Matić airawltu lawng an si hna. Real Madrid i an cawkmi Morata zong Conte nih a duh ti lomi Costa airawltu a si. 

Chelsea nih an zuarmi a dang cu Nathan Ake, Bertrand Traore hna hi an si. Club dang nih an hlaanmi hna Kurt Zouma, Tammy Abraham, Loftus-Cheek le Kenedy an si. An hmaikal Solanke timi zong Liverpool ah alak in aa tthial. 

Conte nih a hmanmi 3-4-3 system a si i fawite in a thleng lai lo. Rüdiger, Gary Cahill, David Luiz, César Azpilicueta le Andreas Christensen (Club dang an hlanhmi hna an kirtermi) hi hnukham ah a thlennawn hna lai. Wing-back ah tthate in hman khawh ding cu Alonso le Moses lawng an si, Rudiger le Azpilicueta cu hmai an phan kho tawn lo. 

Alaikal cu Matic zaka an cawkmi Bakayoko, Kante, Fabregas an si lai (mi chawngtu pakhat cu cawk an herh), i Wing a tli ding ah Pedro, Willian le Hazard an si. Hazard cu September dih lei lawng in a chuih kho ding a si fawn. Hmaikal ah Morata lawng nih hi vialte chuih ding puai a chei lai lo.

Chelsea nih mi thar cawk ding kong ah nawl a ngeitu hi Manager a si lo, a ngeitu Roman Abramovitsj ruahnak a petu Chelsea Director Michael Emenalo le Marina Granovskaia an si. Conte nih a duhmi a chim nain an cawk piak duh lo. 

Chelsea tuanbia kan zoh tikah 2010 ah CarloAncelotti nih FA le PL a teipi hna nain a hmaikum ah mi thar an cawk piak ti lo. January lawng in mi thar cawk kan herh ti kha an thei i Torres le David Luiz an cawk piak nain pahnihnak lawng an si caah a rian an chuah. 2015 ah khan Mourinho nih cawk a duhmi a chim lengmang nain min ngei cia ah Pedro lawng an rak cawk piak i Chelsea cu top 10 hrawng ah an rak i zit caah Mourinho rian chuah a si. 

Atu cu Conte caah thinphan dai lo a hong si. 

August dih hlan ahhin a si khawh ahcun mi thar cawk khawh hi an duh cio. Cheukhat lebang cu bawlungchawdawr an on bak in cawk hna i PL kum thawk hlan ah ke rak i theih cia dih kha an i zuam hna. 

Conte nih mi kan cawk chap lo ah cun "Mourinho season" kan chuak khan tthan tiah a chim. Sihmanhsehlaw, a tuah khawh mi cu Chelsea Director le admin nih a duhmi an tuah piak ding i ruahchan lawng hi a si. 

Chelsea fan pawl nih zeitin nan ruah? Costa hi Conte nih a rem lo bia maw a si, aa uah caah dah a si? Club dang an hlanhmi hna zong hi Conte nih a kaltermi hna an si, ti a si.