Nihin zing ah zahan a ruak thlah lio TV in an thlah nolhmi ka zoh i USA president B. Obama le president hlun Bill Clinton bia an chimnak a lang.
USA president Barack Obama cu ruak thlami ram hruaitu tampi lakah biachimnak a ting ve. Obama nih a biahmaitthi ah Palestinian hruaitu le President a simi Mahmoud Abbas nih ruak a humh ve mi kong ah Israel le Palestine kar daihnak kong aa lim rih lomi a chim.
Abbas le Israel Prime Minister Benjamin Netanyahu zong Peres ruak cungah an kut an i tlaihnak an langhter.
- Israel/Jew pawl hi mi va uk ding ah a chuakmi an si ballo, tiah Peres nih a rak chim bal. A thinlung chung ah mi dang caah innkhan (rom) a ngeimi pa a si. Ralhrang a rak ton, i Palestine he daihnak kong an ceih lio ah voitampi an rak deuh bu ah Palestine pawl cu Israel he i ruang in anmah tein rorel khawhnak, biaceih khawhnak an ngei timi a rak dirpi peng, tiah Obama nih Peres philh lonak ah a chim.
Shimon Peres kong tawi:
Peres cu 1923 kum Belarus ah a rak chuakmi a si i, kum 11 a si lio ah an chungte in Palestine ah an rak peem. A chuahnak min Szymon Perski cu Shimon Peres in aa thlen. Politics hi Sionist in a rak i thawk ve. 1947 kum in Haganah i Jew pawl hriamnam kong ah hruaitu a rak si cang. 1948 i Israel ram dirh tthannak ding ah an ralkap chung i hruaitu dirhmun in rian tampi a rak tlaih. Israel hi Nuclear Power ram pakhat si ding in a rak i zuam i France ram in voi tampi hriamnam Israel ah a rak luhter. Nihin ah Israel cu Atom-bomb tambik a ngeitu ram ah ai tel.
1959 kum thawk in 2007 tiang kha party aa dangmi panga caah Israel Parliament a simi Kenesset ah a rak tthu. Israel prime minister voihnih, September 1984 in October 1986 tiang, le November 1995 in June 1996 tiang a ttuan. Cozah 12 caah chung ah Minister a rak ttuan i Foreign minister, Defense le Finance minister hi a biapi in a ttuanmi an rak si. 1994 ah Israel prime minister Yitzhak Rabin le Palestinian hruaitu a rak simi Yasser Arafat he tiin Nobel Daihnak Laksawng an rak la tti. 2007 in 2014 tiang Israel President a ttuan.
Obama nih a bia a peh i Peres cu Israel ram ca i a ttuanmi le ralkap tthawng a ser khawhmi cung ah a fak ngaingai.
- Kum zabu 20 chung i vawleicung ram tthawng hna kong a ka ruahter. Mah chan i mi lian a simi pawl a ka ruah ter tthan hna tiah Obama nih a chim i Nelson Madela le siangnuhrang Elizabeth cu tahchunnak ah a lak.
- Cun Israel cu USA i a hawi tthabik a si lai i kan i dirkamh zungzal lai, tiah President Obama nih a chim.
Bill Clinton zong biachimnak caan a ngei kho ve. Amah hi Peres le Arafat nih Nobel Daihnak Laksawng an rak lak lio ah USA president a ttuanka te a rak si.
Peres a ruak thlah ah ram 50 leng i hruaitu an i tel kho. Peres cu kum 93 a si.
Cc: NTB/Wikipedia/Nrk/Reuters
Comments
Post a Comment