Columbia Hi Nobel Committee Nih A Chanh Kho Lai Maw?

September thla dih zarh ah khan Colombia cozah le tapung FARC nih daihnak an rak ser khawh i Vawleipi nih a lawmhpi hna lawng si loin tu kum Nobel Daihnak Laksawng (NDL) cu anmah hi an pek te ttheo hna lai tiah ruahchannak a um.

Asinain tu hi ruah lo piin kap hnih duhnak in an sermi Daihnak cu kum a liam hlan ah rawh tthan dawh in a um. Vawleipi a thin aa dawmh.

Colombia remdaihnak kong Facebook ka post hmasami.

Mah cucu Democracy ruangah a si i Colombia rammi nih hi Daihnak hi kan cohlan awk a si maw? ti biahalnak he zapi duhnak (referendum) an laak i cohlan a duh lomi nih an tei.

An cozah nih kum 60 deng a saumi ram chung ral hi dai cang seh, hmai ah nor cang usih, tthangcho cang usih tiah ruahnak le saduh an thah lio ah a luancia kong ruat in hmai a nor kho lomi ram mipi an rak tampi ve.

FRAC nih hin Cozah an doh i ral an thawh chung ah mi fanu le nupi an tlaihhremmi a rak tampi i an thahmi hna a rak tam tuk ve. Cu vialte cu nai zarh i Cozah he remdaihnak an sermi ah philh cang ding in lungtlinnak an rak ngei. Tazacuai le biaceih um lo ding in Colombia cozah nih remdaihnak a si paoh cun tiah a cohlan, nain ram mipi cheukhat nih an cohlang kho lo.

"Remdaihnak" an tuahmi cohlan ding le cohlan lo ding Referendum an laakmi ah an rammi 30% lawng nih ruahnak (vote) an langhter. Mah ahcun tlawmpal in Cohlan a duh lomi nih an tei hna.


Cu bia a chuah in Colombia cozah cu an lau ngai, i hi Remdaihnak a hruaitu Cozah aiawh pa lila zong a ngaihchia ve i a rian tlamtlinh lomi bantuk in aa ruah caah i ngol ding in a hal colh. Asinain an President nih "kan lung a dong lo," tiah an ram mipi cu a chimh hna.

FARC zong nih Kahdaihnak kan tuahmi cu kan pehzulh rih ko lai, tiah mipi i Remdaihnak an cohlan lonak thawng an theih hnu zong ah an chim. Daihnak hi an duh tuk cang.

Colombia mipi nih an i thimmi hi an ram caah a poimawh taktak khomi a si. Tuanbia nakin a fak, a har, buaideuh khomi thil a chuak kho. Hlan i a thimi an chungkhat sahlawh nakin a thimi an tamdeuh te kho.

Cucaah Remdaihnak minsen an thutmi hi a feh khawh ding Vawleipi nih bawmh le zuanhnawh a herh ko.

Thla ni sarih (Oct. 7) ah Nobel Committee nih 2016 i Daihnak Laksawng cotu a thanh ding nih khin a hleiin Colombia hi a bawmh khawh lai tiah ruahchannak ka ngei. Rian zong an ngei bak tiah ka ruah.

Colombia president le FARC hruaitu hna hi Daihnak Laksawng an pek hna nak thawng in Colombia mipi caah le Vawleipi caah a tthadeuhmi pehtlaihnak le rianttuan ttinak a chuahter lai. Hi daihnak laksawng nih hin an sermi Remdaihnak hi tthawng chinchin in a nunter lai tiah ka ruah. Mah cucu Alfreds Nobel i a roca ning he zong aa tlaakmi a si fawn.

Asinain, Democracy ning in rammi duhnak (referendum) hi Nobel Committee nih a tei kho lai maw timi biahalnak cu a saang taktak.

A donghnak ah chim ka duhmi cu Daihnak asiloah Remdaihnak hi Justice timi Teirulchamnak nakin biapideuh ah a ruat, tuanbia nakin biapideuh ah a chiami caah a rak si. Kawlram remdaihnak kong zong ah mah hi biapi a si te ko lai, i Vawleicung (international) zong ah mi ram tazacuai i Justice hmuhnak in Remdaihnak kawl khawh hi a herh ngaingai.

Cucu Colombia president nih ralhrang bantuk a simi an ram Tapung kha Remdaihnak ding caah Justice cu cabuai tang ah chia in ramtang i saupi a um cangmi hna kha ram chung le an miphun he i cawh in an tthanchonak ding bawmh a duhnak cu a si.


Cc: Ipsnews/ NRK/ Vg/ BBC