#MSN# - Barcelona
Lungthu pakhat bang a dirttimi Messi, Suarez le Neymar hi kan hnu CL zong ah kham khawh lo dingah rak ruahmi an si. Tu kum hi an chuihtti kho tuk rih lo nain an chuihtti taktak ahcun kuanfang ko an lo. An i khawnden a tlawm, bawlung an thiam i Goal sut cu rawlei bang an i fawih. Hi hna pathum nih Barcelona puai paoh cu TV hmai ah an kan toter ko lai.
#BBC# - Real Madrid
Real Madrid i Gareth Bale, Karim Benzema le Cristiano Ronaldo zong nih Barcelona i MSN nakin a thiam lodeuhmi si an duh ve naisai lai lo. Thazaang le pumrua in cun MSN nakin an tthadeuh rih. Champions sinak he vancau in an chuih kho lai. Kan hnu kum thum chung ah CL voi 2 a teitu an si. Tu kum belte hi Zidane nih CL nakin La Liga hi biapi ah kan chiah lai tiah a chim belte.
BBC le MSN bantuk in aa celhtti khomi hi club dang ah an lang kho rih lo. Tu kum ah pumpak in a lang ding asiloah zoh a nuam ding cu:
#Antoine Griezmann# - Atlético Madrid
A pumrua a fa ngai. Asinain nikum CL ah khan caan ttha a ngeihmi tthate in a rak hman khawh i nai Euro2016 ah kham khawh lomi a rak si. Griezmann hi bawlung a duh bakmi a si i Lu-suk thiam a duh caah an khua in Km 60 a hlatnak ah lu-suk cawn a kal tawnmi a si. Europe ah a thiambik timi panga lakah ai telmi a si i tutan zong a zordeuh hlei lai lo.
#Gonzalo Higuaín# - Juventus
Tthal ai thawk ahkhan bawlung vawlei i ceih a tongbik cu Higuain a rak si, nain Manchester United nih Paul Pogba an cawk hnu in philh a si. Sihmanhsehlaw, Champions League a chuih ding cu Pogba a si lo. Higuain hi nikum Serie A puai 35 ah Goal 37 a sut khawh i cu hlannak in a thiamdeuh. Tutan cu Juventus hi CL ah cawisan ngai lai tiah ka zumh.
#Thomas Müller# - Bayern München
A no lio tein vawleicung i a thiambik lakah ai tel lengmang cang. CL zong ah a lang cem lengmang ah ai tel i Robert Lewandowski he hmaikal ttha ngaimi an hong si. A ralaimi CL chuih tikah Bayern he aa tongmi hnukham paoh nih an zenh hna ding an si. Muller tu hi kum dang nakin tu kum ah a lang lai tiah ka zumh.
#Sergio Agüero# - Manchester City
Hmaikal ah cun ka uar pawl a simi Aguero hi Pep Guardiola tang ah a lang chinchin lai tiah zumhnak ka ngei. Goal tampi a ngei ding in ka ruah i City nih Europe i teinak an hmuh khawhnak ding caah amah hi biapibik a hong si te lai.
#Alexis Sanchez# - Arsenal
Arsenal nih hmaikal ttha ngaingai an caw kho lo, i Sanchez hi a biapimi a si lengmang. Champions League ah ruahning tluk in a chuih kho lo, a lang ballo. Cucaah tutan cu biapi ah chia in aa zuam lai tiah ka ruah, i amah hi Wenger a mirhter khotu a si te lai
#Pierre-Emerick Aubameyang# - Borussia Dortmund
Mah pa hi Dortmund nih an zuar siang bak lo ve lo. Kan hnu kum kha Bundeslega ah Goal 25 a sut. CL an rak chuih lo, i tutan cu an chuih ve lai. Amah hi mi tampi nih an zoh te lai, i Real Madrid, Chelsea, United, Liverpool tibantuk Club lian nih phaisa man an khiah te hnga. An group i hnukham caah a fawi lai lo.
Sorry, United le Chelsea kong chim awk a um lo. Mourinho nih bianek in a rak ti hnawh tawnmi hna Europa League kong ttial tik tu ah ka telh ve te hna lai.
Comments
Post a Comment