San Fransisco i Tim Cook nih iPhone7 thlahnak a tuah tikah zeibantuk thil thar dah Apple nih a chuah lai ti kha vawleicung minung million tampi nih kan rak bawh ve.
Cuti a si caah vawleicung i Smartphone chawdawr ah Apple hi a manbik lai tiah kan ruah cio khawh man. Asinain mah ticun a rak si lo. Amah nakin a maneuhmi a rak um ko.
A taktak ti ahcun USA chuak Apple hi Vawleicung i Technology-company hna lakah a manfak bikmi a si, nain Korea chuak Samsung nih vawlei pumpi i a zuarmi hnarcheu tluk hrawng lawng hi a manh ti a si.
April thawk in June thla dih tiang i vawleicung SmartPhone an zuarmi an zoh i an hmuhmi cu:
- Samsung nih Smartphone 77 million hi vawleipi huap in a zuar khawh.
- Vawleipi i an zuarmi Smartphone (phun vialte) hna lakah 22,4 % hi Samsung nih hmun a lak.
- Apple cu 40,4 million lawng an zuar khawh.
- Vawleipi i an zuarmi smartphone hna sinah 11,8% in hmunhma a la ve.
IDC.COM nih fiang tein a langhtermi a si.
Tu kum phak hlan ah khan Apple le Samsung cu an kalnak lam a rak i dang cang. 2015 ah Samsung cu 21,4% in 22,4% ah a rak kai lio ah Apple cu 13,9% in 11,8 ah a rak tla diam. Tu kum thawk ah khan Apple nih iPhone a rak manh ti lo, i ni kum he tah ahcun Smartphone 7million a manh kho lo. Samsung cu chawdawr ah a man a kai lawng si lo in 4 million hrawng um dang nakin tam a zuar khawh ti a si.
iPhone hi 2016 thawk ah khan a man bak lo, a ruang cu mi tampi nih iPhone7 hi an hngah caah a si lai tiah an rak ruah.
Apple cu a ttha sawk, nain nihin ah cun Tuluk chuak Huawai nih chawdawr ah a phak luklak cang (cungbik hmanthlak). A cung i kan chimmi bantuk khan tu kum June tiang ah khan Huawai nih 32,1 million a zuar khawh ve i pathumnak ah 9,4% in a dir ve.
Asinain Apple vantthat maw a si ko hnga, Samsung nih a hnubik a zuarmi Note 7 cu thli lak voih bang, "Phuk" tiah a puak diam ko. "Kan sungh ding ruah ah thinlung a fak hrinhran" tiah an boss nih a chim kha mu, Billions in an sung lai. Atu lebang, Vanlawng chung ah Samsung battery tuun lo ding ti ah USA nih an hon thanh cang.
Mah ti Samsung an daithlan lio ah Apple nih thazaang a laak tthan lo i a kai khawh lo ahcun Tuluk chuak Huawai hi a tthangcho lei a si caah le Tuluk ram ah a hmangtu an tamdeuh lawng si lo in Asia ah zaran nih hman khawhmi a si caah phak le lonh khawh a si ko hnga.
Cc: IDC/e24/Forbes
Kwi Bwi, US ahcun Huawei te hi avan lar ngai ve. Ramdang mipemkaa pawl deuh nih Iphone hi kan uar i si. an mah Mirang pawl tucu Samsung hna Huawei hna hi aman aadeng atha ve fon i an uar deuh ngai...
ReplyDelete