Circle K. nih Europe i Bensin man report a pekmi ah Norway hi a manfak bik a si i a hon changtu cu Netherlands a si i Norwegian Kroner in 60cent (øre) lawng aa dengdeuh, tiah Fuel Prices Europe zoh in a ttial.
Cawnnikhat ni ah khan Bensin cu Liter khat ah Norwegian Kroner 15,13 (1dollar = 8,9kroner) hrawng a phaknak a um i Diesel cu 13,75Kroner a phan. A zarh ning in cun tihin a man a sang lo, nain ni khat maw ni hnih te lawng hi a man a ttum caan te a si, tiah Circle K. ning in theih a si. Cu hmanh ah khua pakhat le pakhat, le a company an i dang kho ngai.
Norway ah cun zarh dih lei ah a man a ttumdeuh, i cawnnikhat zanlei in a man a kai. Aruang cu i zuamcawhnak ruangah a sibik ko, ti a si.
Bloombergs ning in a si ahcun USA le Kawlram i mawttaw mawngh hi a nuam ding a si hnga, i Norway hi leicung ah a manfak bik ram a si ko. Zeiruang ah mah tluk in a manfah ti ah cun pawngkam zohkhenhnak biapi ah an chiahmi le cozah i an pekmi (avgifter) a tam caah a si bik.
Sihmanhsehlaw, Norway ummi nih khuasak na thiam i phaisa khon na duh a si ahcun Zarhpini le cawnnikhat ni chun hlan paoh ah Bensin/Diesel a khat te in i rawn cia lengmang. Cu hmanh ah mi hngah lomi (Bensinstasjon a si lomi) YX / Uno X pawl khi an i dengdeuh kho ngai.
Bensin a man kai tiah Diesel mawttaw a cawmi zong, zeihlei a si lai lo. Diesel man a kai chin lengmang lai, Diesel mawttaw man pek mi a kai ve lai i zeipi i hlei dawh a si ti lo.
A tanglei ram pawl hi Europe i Bensin/Diesel (petrol) man fahbiknak an si:
2. Netherlands
Norway changtu a si i Shell timi Petrol company lianbik chuahnak ram a simi Netherlands ah Bensin man a fak bak ve. Bensin Liter khat ah 14,45 kroner, le Diesel liter khat ah 11,21kroner a si.
3. Island
Bensin 1liter 13,82 kroner le, Diesel 1liter 13,05 kroner a si.
4. Italy
France ramri a ummi nih cun Italy ah Bensin an rawng lo. France ah Bensin 1liter 11,69 kroner a si lio ah Italy ah cun 13,50 kroner a si. Diesel 10,15kroner a si lio ah Italy ah 12,07kroner a si.
5. Denmark
Bensin 1liter 13,40kroner (norwegian kr.), le Diesel 1liter 11,45kroner a si ve.
6. Portugal
Bensin 1liter 13,37 kroner le Diesel 1liter 11,09 kroner.
7. Turkey
Asia le Europe kar zinan (petrol) chawlehnak lampi a simi Turkey hi Europe ah a manfak bik pasarihnak a si. Bensin 1liter 13kroner le Diesel 11,17 kroner a si. 2013 ah khan leicung ah a manfak bik ram a rak si i Norway 2nak a rak si.
8. Greece
Bensin 12,46 kroner le Diesel 10,54 kroner.
9. Finland
Bensin 12,44 kroner. Diesel 10,67 kroner.
10. Belgium
EU i an khualipi a simi Belgium cu aa deng ngai, Bensin 12,27 le Diesel 11,13 kroner lawng a si. Hi tluk hrawng a rak si lio Norway mawttaw mawngh kha a nuamdeuh ngai.
Sweden hi a manfahnak ram 10 lak ah ai tello caah Sweden he aa neihnak ah a ummi nih cun Sweden i va rawn a hlawk ngai kho men.
Cc: e24/VG
Comments
Post a Comment