Debate a dih hnu ah Trump nih "Ka tuahmi a ttha tuk," tiah Debate i a chimrelmi a tthatnak a cu Norway thawngpang phu Dagbladet.no ah a chim. A tthat tuk a si ahcun Hillary Clinton hi a tei hnga lo maw?
CNN siseh, media dangdang nih an chimmi cu "Tu zan Debate ah Hillary Clinton nih a tei," timi a si.
Moderator nih a hon sawm hna i, an hong luh ah Hillary Clinton cu a dam i a piangpai ngaingai. Kan hnu i a dam lonak kong he pehtlai in an rak zum lo ngai nain mi ngandam a sinak a langhter khawh ngaingai i suimilam pahnih le mipi hmai ah dir in Trump a dir-onh khawh.
"Secretary Hillary Clinton" tiah a si ti lo nain Hillary cu Moderator siseh, Trump lila nih an auh lengmang. Asinain Secretary lawng siloin President bantuk in bia a chimmi Hillary Clinton nih a voikhatnak President TV Debate cu a tei ko tiah ka ruah ve.
Hillary Clinton hi aa timhtuahnak a ttha, fiang le tliang tein bia a chim i Politician aa theihnak ah a chim duhmi le a dirpimi Politics Program ttha tein a langhter khawh. Mah cu nih a luancia zarh pawl i Trump a hon kainak pawl cu a hon lonh, Trump cu a kai kho lo.
Relchap: Hitler A Lomi TRUPM
Mah TV Debate hi President thimnak ah biakhiaktu a si kho tiah mi tampi nih an rak ruah. Cu ve bantuk in Hillary nih a tei ngai ko zong ah Trump vote pek ding in biakhiahnak a ngei cangmi an tampi kho men.
Cun zahan i Trump cu amah nih "Ka tuahmi a ttha tuk," a ti bantuk in zapi ruahning nakin a ti tthadeuh ti cu al awk a um lo.
Voi tampi Trumpi nih Hillary a bia tan. Trump soiseltu hna nih an ruahning bantuk a si lo, a raltthatnak nih amah uartu lung a tlaih khawh rih lai. Khatlei in Trump nakin Hillary hi mipi nih an zohdeuh, a ti tthadeuh lai tiah an cuanhdeuhmi a si caah Clinton nih a tei bu ah Trump hi a tla, a sung ti taktak khawh cu a si lem lo.
Trump nih American cozah sinah leiba a ngeihnak le mipi sin i a leiba kong a chim, i Trump nih Email pawl ka zohter law, ka leiba/ Tax cazin kan zohter ve lai tiah a hal. Mah zawn ah Hillary nih Email kong ah a palh i, voikhat in caan ngei rih sehlaw, pumpak Email a hman ti lo ding kong fiang ko in a chim. Cu nih Hillary hi zeimaw cu a bawmh khawh ve men. Nain Trump cu Leiba tampi a ngei timi cu al khawh a si lo.
Trump hi Hillary Clinton nakin mipi he iton le biaruahnak a ngei lo deuh timi a lang fawn. Mah cu Clinton nih aa zuammi si dawh a si, a langhter ngai.
Asinain Trump hi cu hlan nakin a biachim holhrel ah aa ralring ngaingai cang ti cu a lang.
Ka ruahnak ah cun Hillary Clinton hi zahan TvDebate ning ah President caah aa tlak bikmi a si. A theihhngalh a kau, i USA chung siseh ram leng zong ah pehtlaihnak ttha a ngeideuh tukmi a sinak le US sipuazi siseh himnak caah lam tthadeuh a ngei tiah ka ruah.
Debate a dih hnu ah CNN nih Debate tuahnak chung i a um vemi minung 20 cu a rannak in bia a hal hna i cu hlan ah hodah vote pek ding ti a rak i khiak rih lomi an si, nain minung 18 nih Hillary vote pe ding in hi Debate an zoh hnu in an i timh kong an chim.
A ralaimi 8. November hlan ah Debate voihnih an ngei rih lai.
Comments
Post a Comment