Zaanglek Thawng: Mourinho Le United Lungtlinnak An Ngei Cang

Europe ah cun tthaal lei kan hon panh cuahmah cang. Laimi i hawikomhnak, civui le tonnak kip ah bawlung chuih, volleyball bengh asiloah zaanglek i hawikomhnak phunphun kan tuah khawh bik caan a si ve. Tu kum hoi hna cu Norway um Chin mino bawlung chuih zuamnak le i hawikomhnak Chin Community nih a tuah lai. Sweden ah Europe Chinmi celhzuamnak le i hawikomhnak kan tuah lai i Sweden, Norway, Denmark, Germany, Netherlands, Czech le UK in phun 8 hrawng cu an chuak kho te lai tiah ruah a si. 2014 ah Norway nih pakhatnak an rak lak, i tu kum zong an i ngaih ngaingai tiah theih a si.

Kanmah kong cu cu vial si rihseh. 2015/16 Season a dih cuahmah cang i caan karlak vawleicung bawlung thlihran tlawmpal in von zoh hna usih.


Manchester United hi kan ttanh cio lo hmanh ah Sir Ferguson aa dinh hnu in a tlaa tuk i khuaruahhar in kan cuanh ciomi a si caah anmah kong in kan thawk lai. Nihin (zarhpi march 20.) ah City hi Derby an chuih i United nih a tei caah top-4 chung i tel ding an chunmang cu an manh khawh rih lai tinak a si. Cutin a si ko nain Louis van Gaal cu United ah sau a um ti lo ding a fiang chin lengmang ko.

Spaine thawngca El Pais nih a ttialmi Daily Mail nih a ttial chinning ah Manchester United le Mourinho cu lungtlinnak an ngei i min zong an thut chung. Cu minthutmi cu Mourinho nih manager rian a tlaih hrim lai tinak cu a si rih lo, nain United nih manager thlen an duh a si ahcun Mourinho lak ding timi a si.

Cu minthutnak nih Mourinho biakamnak a pek khawhmi cu tu kum May 1. hlan ah United nih manager rian an pek lo a si ahcun Pund 5million an pek lai, i June 1. tiang i an pek hlei lo a si ahcun P. 10million an pek lai. Phun dang in chim ahcun Manchester United nih Mourinho hi manager caah an duh bikmi a si.

Mourinho nih United hruai ding a fian pah cangmi cung ah bia a chuakmi cu Tottenham hmaikal Harry Kane hi cawk ding ah a duhbik mi a si tiah zumtlak a simi The Independent nih a ttial. Harry Kane cu tulio Premier League ah a langbik pakhat a si i mino te a si rih. Chelsea hmaikal Costa hi Mourinho nih Atletico Madrid in a rak cawkmi a si i Atletico nih cawk tthan an duh nain United zong nih an duh ve ti a si. A fiangmi cu Mourinho nih hmaikal ttha a duh tinak a si ko hnga.

Zlatan Ibrahimovic cu United ah a hawi le saya hlun a simi Jose he an kal lai tiah bia a rak chuak tuk ve nain Arsenal nih tu thla chung ah an duhnak an langhter ve caah England ah aa tthial ahcun Arsenal hi an zumhbik. A ruang cu Arsenal nih Sweden i a chuih lio (a ngakchiat lio) ah cawk an rak duh i an sin zong ah cikhat cu a ke zoh ah an rak chuihter bal. Olivier Giroud cu Juventus nih Cavani kan cawk khawh lo ahcun amah hi kan duh lai an ti i Wenger nih a zuar lai ti zong an zumh.

Pep Guardiola le City kong cu bawlung thawngpang ah hmunhma an ngei ngaingai. Sunday Express tialning ah Robert Lewandowski cawk an i tim. Real Madrid, United le Liverpool nakin tamdeuh an chuah lawng ah a minthut lak khawh a si i Pund 60million nih City nih a hal hna.

Chelsea an fahniang Eden Hazard cu club lian pawl nih an orh ko, i Real Madrid le PSG ah hin pakhat paoh ah a kal lai tiah an zumh lio ah Zidane le Real Madrid nih tthaal ahhin lak ding in kap hnih lungtlinnak a um tiah bia a chuak. Kum 24 a simi Hazard cu Chelsea nih Euro 100million lo cun kan siang lo an ti phot.

Hazard hmunhma pek duh ah Isco le James cu zuar ding ah an pho hna.

Cc: Daily Mirror, Mail, The Independent, VGsport Live, MSN