US President Barack Obama nih March 20. ah Cuba a va tlawnmi cu thil thar le aa dawhmi a si tiah ka ruah ve. Kum 88 chung avoi khatnak bik American President nih Cuba vawlei laam in a va tlawn a si. Mah hihi John F. Kennedy chan in i naihniam khawh nakding ah puanzar phen biaruah le lamkaltu tampi hna rianttuannak thawng in a si bantuk in biapi bikah Argentina ram in RCM uktu Pope teltumnak a tel ve.
"Kennedy nih Soviet-Union kut in Cuba chuh khawh ding a lam a rak hmuh ko ee," William LeoGrande nih AFP a chimmi NRK nih a ttial chin. Amah hi American University ah Professor a si i "Back Channel to Cuba: The Hidden History of Negotiations between Washington and Havana" timi cauk ttialtu zong a si. USA le Cuba a thlite in an iton le an i pehtlaining a si.
Real: Mandela ruak cungah Obama le Castro an itong
Asinain ruah lo piin J.F.K cu an thah i amah chawngtu president Lyndon B. Johnson nih J.F.K i Cuba kong a rianttuannak cu a rak uar lo caah a pehzulh lo. John F.K. nih a tuah manhmi cu Journalist pakhat a rak thlah i Cuba cozah a rak tonter hna. Lyndon nih a pehzul lo nain amah hnu chuak president pawl nih Cuba he i rem ding caah laamkaltu an rak thlah hna i a thliin an rak i zuam ko timi William ttialmi cauk nih a langhter tiah AFP nih cun a ttial chih.
USA le Cuba i ralnak, tiah a fawinak in chim usih law Communist ram a simi Cuba cu USA nih a ral lianbik ah a rak chiahmi Soviet-Union lei ah a rak ttang i 1961 kum thawk in cozah kar i pehtlaihnak a cah lawng si lo in USA nih sipuazi a rak phih. Cold War chan a si tikah Soviet-Union theih lo ding in Cuba he pehtlaihnak a um khawh tthannak ding a thlithup in USA cozah nih rian an rak ttuan lengmang, thawngpang i kan theihmi bantuk cu a rak si lo tinak cu tutan i President Obama nih a va tlawn hna hin a lang khun fawn.
BBC nih a langhtermi Cuba he rem tthannak rian a rak ttuanmi USA hruaitu hna lakah Nobel Daihnak Laksawng co balmi Secretary of State Henry Kissinger aa tel i amah hi a thli tein a rak i zuam ve. Nain Cuba nih Angola ram communist pawl cu ralkap 25000 in a rak bawmh hna caah Kissinger cu a thin a hong tuk i vanlawng in Cuba ah bomb thlak ding in President Gerald R Ford nih "I agree" a rak ti.
A dang pakhat, Cuba president Fidel Castro zong nih a upat tukmi Jimmy Carter nih USA president a ttuan tlawmpal ah Cuba pehtlaihnak a tluannak ding ah lamkaltu thlah in nawl a rak chuah ve. Fidel nih Carter hi USA le Cuba kar pehtlaihnak a tthat tthannak ding a duh taktak mi pa a si ee, tiah a rak chim. Mah lio zong ahhin dawntu bik a rak simi cu Cuba nih Angola communist a rak bawmh hna mi hi a si.
Republican president a rak simi Reagan le George W. Bush chan ah Cuba le USA pehtlaihnak a rak um lo ti khawh a si. Soviet-Union nih Cuba cu siipuazi a bawmh tawnmi a hon ngol kum 1992 ah Bill Clinton president a rak tling. Mi tampi nih an ram hnih kar pehtlaihnak a tthalei in aa thleng lai tiah an rak zumh. Cu ve bantuk in 1995 ah Cuba ralzaam hna nih USA ah dornak hal khawh a si i dornak zong an rak pek hna.
1996 kum ah Cuba nih American civil vanlawng fate 2 a kah caah USA nih fakpi in an mawhchiat hi Congress nih Cuba hlan nak fak in Siipuazi a phih.
USA le Cuba i ralnak/buainak aa thawk hrawng 1960 chan i ram hnih hruaitu hna cu USA president John F. Kennedy le Cuba ram hruai an i thawk vemi Fidel Castro an rak si. Fidel Castro nih January 1. 1959 i Cuba ram a uk ahhin kum 32 a rak si. J.F Kennedy hi USA president a si kum 1961 ah kum 43 lawng a rak si ve. Communist ram a simi uknak a tlaika te a simi Fidel nih Robert Kennedy (US Justice minister) cu thah an rak i zuam peng bu ah J.F. Kennedy nih Cuba cu Soviet-union in chanhchuah a rak i zuam ti a si.
Nihin i tuanbia thar a ttialtu President Obama nih Cuba a tlawn tikah hin voikhat piah an karlak pehtlaihnak a ttha lai tinak a si lo, nain ruahchannak cu a tam ko tiah USA ah ralzaam in aa dormi hna nih an chim ve. I ral rumro si lo in, a tluangmi pehtlaihnak a si tthan ding kan duh ti a si.
Daihnak laksawng a hmu vemi Obama nih atu bantuk in ram pakhat he remdaihnak le a tluangmi pehtlaihnak a um khawhnak dingah a tlawnmi hi thawngpang ttha pakhat a si ko. President tlin ah J.F.K he an tahchunhnak zong a um bantuk in anmah chung he aa pehtlai ngaimi pa zong a si. USA nih ramdang (international) kong a dirhmun ah Cuba hi a biapi ngaimi karhlannak a si i a herhnak zong a um ve hrimmi a si.
Note: President Obama nih Fidel Castro cu a tong lai lo, ton ding mincazin ah aa tel lo. Fidel nau Cuba president Raul Castro he an itong lai. December 2014 ah Pope nih ram hnih hruaitu hna iton khawh ding fakpi in a rak forhfialnak nak a hmual aa tel tiah BBC, Nrk, le AFP nih an ttial. (a tawinak in theihtlei ah von ttialmi a si.)
Cc: NRK, Aftenposten, BBC, Urix, AFP
Comments
Post a Comment