Zahan a phichuak nih a ralaimi USA president thimnak i aa zuam ding cu Donald Trump le Hillary Clinton an si tiah fiang ngaiin a phuan. Sihmanhsehlaw, an pahnih in teitu kan si tiah an i chim ngam veve rih lo.
Trump nih zahan ah Ohio dah ti lo, a tei dih. Ohio zong cu John Kasich ramtthen a si caah a si kho ko. Kasich caah cun lunglawmh awk ngai a si nain hi thimnak ah aa tel ve sawh timi a langhnak lawng a si, Trump changtu Ted Cruz hmanh nih a lonh ngaimi pa a si.
A kum nakin a biaci a cang ngai vemi Marco Rubio cu a ukmi Florida ah Trump nih a va den. A cawlte a a cawl lo. Cu a si caah khuadei hlan in White House luhnak innka cu a kirtak. Cu ve bantuk in Khrifa tamnak, Conservative tamnak a simi ramtthen pawl ahdah ti lo teinak a hmu lai lo tiah ruahmi Ted Cruz lawng hi Trump a rem lotu Republican pawl caah cun a taang cang.
Republican aiawh khawh nakding ah 1237 delegates ngeih a herh i Trump nih a tlinh kho lai maw timi hi i hngah hlang ngaimi, a hleiin amah bantuk le amah ttanhtu pawl nih an thindawmh in an hngahmi a si. Zahan zuamnak hlan ah Trump nih 469 delegates a rak ngeih i tu zing i New York Times nih a ttialning ah 621 delegates a hon ngei cang. Asinain a donghnak a si lo.
Relchap: Hitler a lomi Trump
Ted Cruz, Kasich le Trump nih 1100 delegates i cuh ding an ngei rih i Trump tlin lo ding a duhmi hna nih an party ah zeitluk indah rian an ttuan khawh timi nih bia tampi a chim te lai i a biapibik a simi July ah tuah dingmi Party Conference ah a lang te hna.
A tang hi New York Times nih zahan phichuak a langhtermi a si.
Hillary Clinton nih fakpi in teinak a hmuh zan a rak si ve. Kan hnu zarh ah khan Michigan le chaklei ramtthen pawl ah Sanders nih a rak teituk. Zahan cu Illinois le Ohio fiang tuk in teinak a rak hmuh i Missouri zong ah Sanders cu a hon tei. Florida a phichuak an zoh tikah Hillary cu teitu a si tthan.
Voi dang ning a si ahcun Hillary nih Bernie Sanders cu hi zuamnak hin i ngol dingin a chimh cang hna. Asinain atu tiang cu Sanders zong nih a ngol rih lo, i Hillary a dirpitu hna zong nih tei khawh chung tei ding in celhpi rih dingah ruahnak an cheuh ti NRK i USA Correspondent nih a chim. A ruang cu Sanders a ttanhtu le a uartu an tamtuk caah Sanders hi i nek sual lo ding a biapit ngai caah a si. Sanders a tei i USA president aa cuh tikah Sanders dawtu tampi nih an bawmh lo ding kha a phang.
Sanders aa ngol lo i an i zuam pengmi hi Hillary a si pek, amah Sanders a si zong ah an caah a tthami a si. Hillary hi zumh deuhmi a si caah, chim ahcun hi ti an i zuam ruang ah Media nih an langhter ngaingai. Sanders aa ngol colh a si ahcun Media nih Trump lawng an langhter lai, an dawi lai i Democratics le Hillary cu philh an si kho. Cu a si caah Sanders aa zuam peng ve rihmi cu Hillary caah thil ttha a si.
Comments
Post a Comment